Akaayi Kristo-yab n bobn paab nba g bu te Serusalɛm Kristo-yab
9
1 Yal nba nyuan paab nba k i bu te Kristo-yab nyan,
l ji g bual k n diɛn’i kadaaɔg l po.
2 G dugn n ban k i pal kɔn l po.
N daan pag’i Maseduann yab nunŋ n l po g tua mii hal jel yo k yinm Akaayi diem n Kristo-yab bo bobn i paab g gbenn.
I pakɔnn paan bonciɛnn pala k b mɔ ji bua ban tod.
3 N suun t naataani n nyan i buol,
k n pinpagd ń daa tie pinpagkuond kaa,
ama k yin kon l bobn g gbenn nyan min maad nyan.
4 L g ŋan g Maseduann yab n yeg yen’n g baal g sua k i g bobn g gbenn.
T pala n daan paa i po nand nyan,
l ji baa tie fai nba yab i t po.
Fai nba bu suol’i nuan,
n kan fid g maad l yaa maam.
5 L po n te k n mali k l dagd yen k n baln t naataani k ban gaal liig g daan ŋanm g diid yin bo puon paab nba nyan ninŋ,
k t gii pund tin sua k l kul bobn g gbenn k lan ŋɔn k i pii yen papienn i,
k l g tie yen mabl kaa.
6 Ŋanm gii tiɛn man ne :
yua nba bul waam nne,
u tan bu yend waam nne i,
yua nba bul k l yab n tan bu yend lan gii yab.
7 Lann nil kul ń pi wan suol u yam n ninŋ nand,
g siɛl yaa gbiɛndi ń daa be l n ninŋ g bual mabl.
K l maa Yendu bua yua nba piin yen pamann i.
8 Yendu bu fid g te’i bonŋana kul,
g youg kul yin gii mɔg yal nba bu nyan’i payiɛnu kul n ninŋ,
g biɛ tenn yal nba k i baa diɛ g tie ŋanmbuolu kul.
9 Nyan lan diɛn Yendu Kadaaɔg n nyan :
" U piin tali yen bulcind,
u nimɔnd g mɔg gbennu. "
10 Yendu n tien tanbuul bonbuoli k u buul,
g tien’o jied k u di,
u bu te i mɔ bonbuoli,
g te lan nɔbl,
k i nimɔnd ń lon luana bonciɛnn.
11 U bu te yin mɔgd bonn kul n ninŋ k yin fid gii piin yen bulcind youg kul.
Nnyan i g niib bonciɛnn bu tien Yendu balg paab nba k i bu te’ti tin te’b nyan po.
12 G dugn todl tuonn nba k i suun ne g nyanŋ Kristo-yab payiɛnu kua kaa,
l baad yen pinpagd mɔ bonciɛnn Yendu po.
13 B bu la yin suun tuonn nba g tod’b nyan n tie bonmɔnn nand b po g don Yendu sann,
g dugn lann n bu ŋɔn k i cɔln *Kristo *Laabamann g biid yin mɔg yal nba yen’m,
yen lieb nba tenn kul.
14 B baa jaand i po,
g ŋɔn’i k b bua’i g dugn Yendu *ŋalbalg nba k i gaal g mɔg po.
15 Yendu ń gaal balg u paab nba g mɔg dugnu po.