Pɔl n bo kaan Galasi Kristo-yab *tintaanu. L puol po yo g Yendu mɔmamuanda yuand g baal g tund niib, g Kristo-yua nba g tie *Suif-nba buolu n nil, g g kɔnd Suif-nba *kɔnd, g biɛ g cɔln Moyis *yiko, k l daan kan la *fielu. Galasi Kristo-yab siign ninŋ yenm ji bo diɛ l tundl i g suun yenn tuonn, g siɛb ji g tuod mɔno g Pɔl tie Yiesu *sundu. Pɔl n gbad g Galasi yab bua n ŋaa ban guan g kuan’m yonmd n nyan, k u diɛn kadaaɔg ne g tie’b.

L kadaaɔg n ninŋ u ŋɔn’m wano mɔno n te Yiesu sundu nand, lann n tie g Yiesu mɔno n sun’o k wan muand *buolfanu yab *Laabamann, g ŋɔn’m wano yen Yiesu sundlieb n bo taan lieb Serusalɛm g suol yal nba. Lann n tie g sua ń daa mabn Kristo-yua nba g tie Suif-nba buolu n nil wan kɔnd. Pɔl nyii Yendu Kadaaɔg po i g ŋɔn’m g fielu g nya Moyis yiko cɔlmu n ninŋ kaa, k l nya nil n dug Yiesu po nand i.

U juod g paan Galasi Kristo-yab pala i, g maad’b g sua kul ń ŋaa g *Foŋanm ń gii ŋmagd’o k wan yal u kua g fid gii be Yendu n bua nand, mandg gii bua u lieb.