Yendu n lugd Pɔl k wan muand buolfanu yab Laabamann
3
1 L po n te g Yiesu Kristo po,
k min Pɔl te dansalg g dugn yinm *buolfanu yab po.
2 I yen baa gbad Yendu buam n ninŋ wan bil’n tuonn nba k n gii suun i po.
3 Wano n dɔgd g ŋɔn’n wan bobn yal nba k l be wuol n ninŋ.
N bo da g maad’i l ŋasiil po n nyan mɔlane.
4 I gii lii kadaaɔg ne,
i bu fid g bann min mɔg banm nba *Kristo ŋasiil po.
5 Youg n ninŋ,
Yendu bo g ŋɔn niib l ŋasiil.
Mɔlane i,
k u ji te g *Foŋanm dɔgd l ŋasiil,
g ŋɔn wano Yendu n lugd yab nba g tien’m u *sundi yen u *sogni-nba.
6 L ŋasiil tie g *Laabamann po te g buolfanu yab bu taan g di faal yen *Suif-nba,
b kul ń taan gii tie gbannanyend,
g taan g yend Yendu n bo puon k u bu tien yal nba Yiesu Kristo po.
7 Yendu n yaan bua’n po n te k u tie’n u paalu,
g cab’n k n te u tuonsunn g muand u Laabamann.
8 Kristo-yab n ninŋ min n ji l ŋanm g juod canyiin.
Ama min i g Yendu pii’n u paab,
k n muand buolfanu yab,
g Kristo n mɔg bonŋana nba tie ŋalman nba g mɔg po,
9 k min fand niib kul,
k ban bann Yendu nba tie bonn kul tagtua n bu tien bona nand,
wan bo bobn k u bu tien yal nba,
k l tie ŋasiil g be u ninŋ hal bina nba g mɔg dugl.
10 Mɔlane k u ji bua g yab nba be polu po g mɔg yikod yen yab nba mɔg paalu kul ń la Kristo *Tintaanu buol g bann g Yendu yanfuom be jiɛg jiɛg g yab bonciɛnn.
11 Yendu n bo tuod g bobn k u bu tien yal nba hal bina nba g mɔg dugl nyan,
u ji tien l kul t Yonmdaan Yiesu Kristo n ninŋ i g dud.
12 Tin taan g be yen Kristo g biɛ dug u po n te k t bu fid g nagn Yendu,
youg kul,
k t pala biɛ paa u po.
13 L po n te k n maad’i k yin daa ŋaa i pala ń wad g dugn min laad fala nba i po.
L kul ne tie k lan don yinm i.
Kristo bua’ti
14 L po n te k n gbaand t Baa Yendu nintual n ninŋ,
15 wano nba tie yab nba be polu po yen yab nba be tinŋ n ninŋ kul Baa,
16 n miɛd’o,
k wano nba mɔg yudand bonn kul n ninŋ ń te k u *Foŋanm ń ŋanm g pugn’i u paalu k i pala ń cie.
17 G *Kristo ń gii be i pala n ninŋ,
g dugn i *dindann po.
N miɛd’o g buam ń gii tie fiɛgl nba po k i sie,
k yin kpaa jiina l buam po gii sie k l paa.
18 Nnyan i k yinm yen Kristo-yab nba tenn kul bu fid g bann Kristo buam n yaln,
g fag,
g kped g biɛ nyua nand.
19 I bu bann Kristo buam,
nnyan i g Yendu bu kua i ninŋ g yend i munn kul,
ama i yen kan l fid g bann l buam kul g gbenn.