Kolɔs bo tie Asi dingbanbig i, g be *Rom diem n. L doug bo be Efɛs doug puol i. Pɔl tuonsunlua Epafras n bo cind g muand *Laabamann l doug n ninŋ g kaan Kristo-yab *tintaanu l buol. Wano Epafras bo tie l doug n ninŋ big i. Pɔl bo be dansaldieog n ninŋ i, k Epafras tan baal g maad’o nifanm n baal yen tundfana nba Kolɔs doug n ninŋ g tuln Kristo-yab.

L nifanm bo tund niib g tua g nil gii bua wan bann Yendu g la *fielu, k l tie k wan gii cɔln danm bogda i. Lann n tie kɔnd yen kɔa nba nyuan jied po yen daam po. K lann kukua kaa, k l tie k l daan ń biɛ gii pug ŋanduna ne bona nba mɔg paalu g ciln niib i, lann n tie *malɛg-nba yen nindanm.

Pɔl bo gbad lann i g diɛn kadaaɔg g tie’b g guan g tiɛd’b g Yendu n tien niib fielu nba *Kristo n ninŋ nyan dagd. G maad’b k ban suol b kua yen l faaɔgdanm.

L puol po i k u ŋanm g ŋɔn’m Kristo n tie yua nba, g maad’b g Kristo mɔg nuu bonn kul po, k u bo be g sua g siɛl kul daa g tag, k wano n tie Yendu tagm kul yudaan. G yua nba ŋua Kristo ń ji daa jie siɛl.

Tisiik yen Onesiim n bo gad yen l kadaaɔg.

Cegli bonciɛnn be kadaaɔg ne ninŋ k l nyuan t binbepaanm po yen t binbekpelm po. L cegli ŋɔnŋ Kristo-yua n baa be nand i.

Pɔl juod u kadaaɔg yen fuondi, g ŋɔn Kolɔs Kristo-yab b naataanu Epafras n kɔn jad bonciɛnn b po nand jaandi n ninŋ k ban fid gii sie k l paa, g tie danm nba k b dindann cie, g bobn g gbenn g bu tien Yendu n bua yal nba.