Yiesu *sundu Pɔl n diɛn kadaaɔg ne g tie u dɔnn Filemɔn. Filemɔn bo tie Kolɔs jua i. U ŋaag n ninŋ i g Kristo-yab bo taand g tie jaandi. U bo mɔg yonm k b yi’ug Onesiim. Wano Onesiim bo san g yaad i g daan cend Pɔl dansaldieog n *Rom doug n. L n ninŋ i g Pɔl ŋɔn’o Yonmdaan Yiesu *Laabamann k u te Kristo-yua. Pɔl ji bo lebnd Onesiim u canbaa buol i g tie’og kadaaɔg ne k wan daan te’og.

L youg, yonm bo g mɔg yua bu kɔn u po. U canbaa n bua nand u bu tien’o i g siɛl biɛ g mab’o. Yonm nba san k u canbaa suol’o, u bu fid g kpi’ug lann i kaa g cagn’o wan bua nand. Pɔl n bo bua Onesiim g ban k u gii guan l daan baa paa u po nyan, u bo nyii dɔnnu nba be wano Pɔl yen Filemɔn siign nyan po i g diɛn kadaaɔg ne g tie Filemɔn g kpaan k wan nyan Onesiim walu n ninŋ.

L kadaaɔg n ninŋ Pɔl miɛl Filemɔn k wan gaal Onesiim nyan u tie u ninja nyan i. U bo maad nnyan g dugn Kristo-yab kul tie ninjann i. Pɔl bo g niid Filemɔn k wan fabl g tien wano Pɔl n bua yal nba kaa, ama u bo bua g yal nba g Filemɔn bu tien ń nya wano mɔno po i.