Yua nba diɛn kadaaɔg ne g ŋɔn u sann. Ama yua nba lii l kadaaɔg gii tien suoo, u bu bann g yua nba diɛn tie *Suif-nba buolu n jua i (1.1). Wan diɛn bona nyua nyua nand nyan, l ŋɔn k u ban Suif-nba danm bogda ŋanu, mandg yal nba nyuan *salg-yidkab tuonn yen *sali nba k b bo yid Yendu *jaanddeciɛɔnŋ n nyan.

Wan da l kadaaɔg g tien yab nba mɔ tie Suif-nba nba te Kristo-yab i. U Kristo-yab lieb pala bo wad bonciɛnn, g siɛb ji mali mɔno k ban ŋaa g ji daa ŋua Yiesu g guan g tug b danm bogda sɔnu. U paan b pala k ban daa ŋaa *Kristo g dugn wano n tie sɔnu yen mɔni. U tie sɔnu g dugn, u tie Yendu Bija mɔno i. U cie Yendu *sogni-nba (1.1-3), g cie *Moyis nba bo ŋmagd wano Yendu buolu, Israyɛl yab (3.1-5), g cie *dɔnnkpelu n ninŋ salg-yidkab nba bo yid Yendu salg youg kul (4.14-5.10, 7.1-28), g cie *malɛg-nba nba g Yendu bo suun’m mɔno (1.4). U bo g mɔg siɛl yaa biid, ama wan jie’ti ninbaaɔg bonciɛnn nyan i k u bo tug u kua g yid Yendu salg yenm kua g nyan’ti biid n ninŋ yen kuum n ninŋ. L bua n ŋɔn k u salg gaal sali nba bo be kul yiɛl n nyan.

Yua nba diɛn kadaaɔg ne tug dɔnnkpelu n ninŋ niib nba bo kpiɛ g dug Yendu po nyan binbiug u g ŋɔn’m k lan ŋanm g paan b pala, k ban daa ŋaa b *dindann (11). Ama yal nba ŋanm g tie bonmɔnn tie k t ji be dɔnnpaanu n ninŋ i. Yiesu n baal yen l dɔnnpaanu.

Yua kul ninbina ń gii maa Yiesu po (12.2), wano kukua n bu fid g te yua kul ń nagn Yendu badkog buol.

Kadaaɔg ne g nyuan Suif-nba nba te Kristo-yab kua kaa, l nyuan nil kul i. L mɔg cegli bonciɛnn g paand nil kul pal.