4
1 Yendu n bo puon puoni nba k u bobn fuom k u niib bu fuod nyan,
l puoni biɛ daa l be i.
Lann,
suol man i kua k i ninŋ sua ń daa ŋaa k lan paad’o k u kan la l fuom.
2 G dugn t mɔ gbad l laabamann nyan yab nba bo be *tinkuonŋ n ninŋ n bo gbad nyan i.
Ama laabaal nba k b bo gbad nyan,
b bo g duo siɛl yaa nyuad l po,
g dugn youg nba k b bo gbad l laabaal b bo g tuo g gaal k l tie mɔni.a
3 Yen mɔni,
tinm nba tuo g gaal l laabaal,
tinm n bu la Yendu fuom.
U maad l fuom po k nne :
" N pabienn n ninŋ i,
k n bo pol g maad k nne :
“ B kan ban g kua doug nba ninŋ
k min Yendu bo bobn b po
k ban kua g fuod nyan. ” "
Yendu n bo maad nand n nyan,
g yen sua k u bo bobn l fuom,
g sun u tuonn g gbenn hal ŋanduna cilg youg o,
4 g dugn l diɛn Yendu Kadaaɔg n ninŋ siɛl buol g maad daa ŋanlile daal po k nne :
" Yendu bo sun u tuona kul g gbenn,
g daa nlile daal k u fuod. "
5 L biɛ diɛn l buol g maad :
" B kan ban g kua doug nba ninŋ k min Yendu bo bobn b po k ban kua g fuod nyan. "
6 Yab nba bo kpiɛ g gbad l laabaal bo g la Yendu n bo bobn fuom nba b po nyan g fuod,
g dugn b bo g tuo g gaal k l tie mɔni.
Yen l yaa kul nifanm be g bu fid g la l fuom g fuod.
7 L po n te g Yendu guan g sen daal g yi l daal g dinne.
Yendu n bo maad yen t yaajanm,
l bo wai yo,
k u tan te g *Dafiid maad l daal po nyan tin kpiɛ g diɛn nand nyan :
" Dinne,
i gii gbad Yendu niɛlu,
yin daa nyal i tuba. "
8 Yen mɔni,
l bo gii tie g Sosuwe te k b la fuom,
Yendu biɛ ji bo tan kan gii maad diliel po.
9 Lann,
l bua n maad g fuom biɛ daa tenn g be Yendu niib po.
L fuom tie nyan Yendu n bo fuod daa nlile daal nyan i.
10 Lann,
yua nba la Yendu n bo puon fuom nba g fuod,
u mɔ gbenn u tuona g ji fei nyan Yendu n bo gbenn u yal g fuod nand nyan i.
11 L yaa po,
tin gii gbaa man k tin la l fuom g fuod,
g baa sua ń tan daa ŋmaa t yaajanm taabuod n ninŋ g mɔ ń yie g kan cenŋ Yendu g kua tudm n.
12 Yen mɔni,
Yendu maam suun tuonn g biɛ mɔg paalu.
L biɛ man g cie jug nba man u mɔi nle kul po.
L tu kua hal t ninŋ g daan sii t pala,
g kua hal t tugda ninŋ yen t kpaba ninŋ,
g ŋɔn t pala n ninŋ yen t maalm n ninŋ yal ŋan yen yal nba g ŋan.
13 Baa siɛl g be g wuo Yendu po.
Wan tag yal nba kul,
u nyuan l kul ne g ban yal n tie kul.
U buol i g sua kul tan bu sed g dugn wan sun yal nba kul.
Yiesu n tie t salg-yidkab kul ciɛn
14 Tin mɔg *salg-yidkab kul ciɛn nba ne g mɔg u lua.
Wano n tie Yiesu,
Yendu Bija nba duo hal polu po g pund Yendu buol.
Lann,
l bual k tin ŋanm gii diɛ tin dug yal po k lan gii paa i.
15 Tin ji mɔg salg-yidkab kul ciɛn nba ne g tie yua nba kan fid g jie’ti ninbaaɔg t gbalm youg kaa.
B bign’o bona kul ninŋ nyan tinm nyan,
ama wano g ban g tien biid.
16 Lann,
tin gii nagd man Yendu badkog buol yen papaal,
l buol i g *ŋalbalg be.
Yendu bu jie’ti ninbaaɔg,
tin la u ŋalbalg youg nba k t bua todl.