Yiesu n tie t salg-yidkab kul ciɛn
8
1 Tin maad yal nba ne kul,
mayul tie ne i :
t mɔg *salg-yidkab kul ciɛn nba tie nnyan g be polu po,
g kal Yendu yudanddaan badkog nuujendu po.
2 U suun u salg-yidkab kul ciɛn tuonn Yendu ŋaag n mɔno i polu po.
L buol n tie *Yendu-cend-buol-jounŋ yen mɔni.
Nifosaal kaa caan l jounŋ,
Yonmdaan Yendu mɔno n caan l jounŋ.
3 B gii kaan salg-yidkab kul ciɛn nba,
l tu tie k wan gii piin Yendu paab,
g biɛ gii yid’o salg i.
Lann,
l bual k t salg-yidkab kul ciɛn mɔ ń gii mɔg siɛl g yid Yendu i.
4 L bo gii tie k u be tinŋ po ne,
u bo kan te salg-yidkua mɔno,
g dugn salg-yidkab be g yid Yendu salg nyan *yiko n bual nand nyan o.
5 Ban suun b salg-yidkab tuonn naan buol tie yal nba be polu po yaa ninnaɔnŋ yen l junjunŋ u.
Yen mɔni *Moyis n bo bua n caan Yendu-cend-buol-jounŋ,
Yendu bo maad’o k nne :
" Ŋanm g cenŋ ne,
a bu pua l jounŋ lan gii naan nyan min ŋɔn’a k l naan nand jual po nyan i. "
6 Ama mɔlane Yendu n tie Yiesu salg-yidkua tuonn nba nyan mɔn g cie l salg-yidkab tuona.
Yendu n suol dɔnnpaanu nba yen niib nyan,
Yiesu n tie l sandindaan.
L dɔnnpaanu mɔn g cie dɔnnkpelu g dugn l puoni mɔn g cie dɔnnkpelu puoni.
7 L bo gii sua g *dɔnnu nba bo kpiɛ g be nyan bo g mɔg siɛl yaa maam,
Yendu ji bo kan guan g suol dɔnnu yen niib.
8 G nyaan Yendu bo la nil bontitied i,
g fu yen’o g maad :
" Min Yonmdaan n maad,
dana baad k n bu suol dɔnnpaanu
yen Israyɛl buolu yen Suuda buolu.
9 L dɔnnpaanu ji kan gii tie nyan dɔnnu nba k n bo suol yen’m yaa youg nba k n bo diɛ b yaajanm nui
g nyan’m Esipt doug n nyan kaa.
Ban bo g cɔln l dɔnnu nyan,
l po n te k n mɔ bo nyɔl’b.
Min Yonmdaan n maad.
10 L dana po gii pend,
dɔnnu nba k n bu suol yen Israyɛl buolu n ne :
“ N bu diɛn n *Mɔmaam b pala n ninŋ,
g kuan l Mɔmaam b maalm n ninŋ.
N baa tie b Yendu k b mɔ tie n buolu ”.
11 B ninŋ sua ji kan tund u lua lann i kaa u ninja g maad :
“ Bann Yonmdaan ”
g dugn b kul tan baa ban’n
lan cil yab g tie siɛl g daan pund nigbenŋa.
12 B gii sun tuonkpiɛdl,
n bu jie’b ninbaaɔg,
n ji kan ban g tiɛd b biid po. "
13 Yendu gii maad dɔnnpaanu maam,
l bua n maad g dɔnnu nba bo kpiɛ g be ji g mɔn n nyan.
Yal nba ŋanm g wai,
g g mɔn mɔ yen kan wai yen lan bod.