Kristo-yua n bu tien nand g manŋ Yendu pal
13
1 Nyan yin tie Kristo-yab nyan,
i bua man i lieb youg kul.
2 Ŋanm man gii gaan saanm,
g dugn siɛb bo tie nnyan i g tan gaal saanm g g bann k b tie *malɛg-nba.
3 I tiɛn man dansali po nyan b taan g luon yinm yen banm kul i dansaldieog n nyan.
Biɛ gii tiɛn man yaa danm nba k b cagn’m nyan po,
gii ban k i mɔ mɔg gbannand nyan banm nyan i.
4 Nil kul ń gii cɔln puobiɛnn,
g puo yen jua,
baa sua ń daa nya cincann po.
G dugn Yendu tan bu bu yab nba suun cuncontuona kul yen jab nba kul jaan puob lann i kaa puob nba kul jaan jab.
5 Daa tug man i yul g kun yen ligli,
ŋaa man i pal ń gii man yin mɔg yal nba po g dugn Yendu mɔno maad :
" N kan ŋaa’a,
n biɛ kan ban g nyɔl’a. "
6 L po n te k t bu fid g pua pal g maad k nne :
" Yonmdaan n tie n todkua,
n ji kan gii jie siɛl.
Nifosaal bu fid g tien’n bɛ i ? "
7 I canbaa-nba nba bo muand’i Yendu maam nyan,
i tiɛn man b po.
Diid man ban bo ŋuan Yendu nand hal g tan kpe,
g mɔ ń tɔgn *dindann sɔnu nba k b bo tuag nyan.
8 Yiesu Kristo n won tie nand nyan,
u biɛ l tie nnyan i dinne mɔ,
g biɛ baa l tie nnyan i youg ń tuu youg.
9 Daa ŋaa man g tunda nba k b tund k l g tuag yen mamɔni sɔnu nyan ń te k yin tud sɔnu.
L ŋan g Yendu *ŋalbalg ń gii paand t pala,
ama lan daa tie kɔa nba nyuan jied po kaa.
Yaa danm nba cɔln l kɔa g ban g la siɛl yaa nyuad l po.
10 T mɔg *salg binbindla.
*Suif-nba *salg-yidkab nba suun *Yendu-cend-buol-jounŋ n g mɔg *yiko yen ban di salg nba yid t salg binbindl po.
11 Salg-yidkab kul ciɛn tu tug bonkobd nba k b kod nyan yaa sɔm i,
g kua yenn Yendu-cend-buol-jounŋ denuagn g daan yid salg g Yendu ń piin niib biid,
g nyaan ban tug bonkobd nba k b kod nyan g nya yenn doug kunŋ g daan juu.b
12 L po n te g Yiesu mɔ bo kpe doug kunŋ k u sɔm nba wul nyan ń te g niib ń gii ŋan canyiin Yendu nunŋ n.
13 Lann,
t nya man g gad u buol doug kunŋ g tuo ban fiɛg’ti nyan wano nyan.
14 G dugn ŋanduna nba ninŋ k t be ne,
t g mɔg doug nba baa tun g be youg kul,
ama t kpaan yal nba baad i.
15 Tin gii dond Yendu,
Yiesu sann po.
L dondl tie salg i k t yid’o.
Tin gii yiin g donŋ u sann youg kul.
16 Daa sunm man k yin gii tie ŋanm g biɛ gii tod i lieb.
L salg buolu n man Yendu po.
17 I cɔln man i liig yab,
g biɛ daa kand man b mɔi po.
G dugn banm n nyuan i ninŋ g ban g daal baad k b bu dugn Yendu ban sun nand.
Mɔnd man k ban gii suun b tuonn yen pamann g daa ŋaa k ban gii suun g buln.
B gii suun yen bunbulmi,
i kan do siɛl yaa nyuad l po.
18 I jaand man t po.
T ban k t kan fid g jalg t kua baa siɛl yaa po,
g dugn tinm kpaan youg kul k tin gii suun yal nba ŋan i.
19 N l miɛd’i nii,
i jaand man n po g Yendu ń luod sɔnu k min guan i buol tonm.
Jijuog jaandi
20 Yendu nba tien niib yanduanm nyan n te k t Yonmdaan Yiesu yied kpienm siign.
Wan yid u kua *salg g wul u sɔm nyan n te k u te g Yendu suol *dɔnnu nba kan ban g gbenn yen niib.
Nnyan i k u te pekpaaciɛn.
21 Wano Yendu ń te k yin fid gii tie ŋanm bonn kul ninŋ,
g biɛ fid gii tie u buam.
G Yiesu Kristo paalu po wan te tin gii suun yal nba man u po.
Yudand ń gii tie Yiesu Kristo yal youg ń tuu youg.
*Amɛnn.
Jijuog maam yen fuondi
22 N naataani,
n miɛd’i k yin di sugl g cenŋ maam nba k n maad g paand i pala ne,
g dugn min diɛn g maad’i yal kadaaɔg ne ninŋ g yab mɔno.
23 N bo bua k min tiɛd’i k b luod t naataanu Timote o.
L gii tie k u pund n buol tonm,
min yen wano n bu yeg g baal g la’i.
24 Fuond man yab nba tie i liig yab kul yen Kristo-yab kul.
Itali yab mɔ fuond’i.
25 Yendu *ŋalbalg ń gii be yen i kul !