Nifosaal lanm n suun yal
3
1 N naataani,
yab nba bua ban gii tund niib,
ban gii tie waam nne kua.
G dugn yinm mɔno,
i ban k tinm nba tund niib,
t buud tan baa biɛ g cie yab g tund.
2 G dugn t kul paa g kpiɛd bona bonciɛnn n ninŋ.
L gii tie g nil maad g g kpiɛd palb,
l daan g mɔg ban bu jalg’o yal po.
U tie nil nba fid g paad u gbanu kul i.
3 T tu kpign taani tanbiɛg k ban gii cɔln’ti nii.
Nnyan i k t bu fid g paad’b gii saa yen’m tin bua naan.
4 Biɛ diid man ŋadnciɛnd,
i la ban ja nand a,
faaciɛnu n tu piend’b k b sonm nyum po.
Yen l kul ne,
b sitiɛ tie bonbig nne i k b diɛ g ŋmagd’b.
B dɔlb-nba n bua naan i k b saa.
5 Nifosaal lanm mɔ tie nnyan i.
U tie bonbig nne i nil gbannand n,
ama g yen pua jipaad k wan suun tuona nba yab.
I la i,
mubig nne n tu suol g tan yabd g di fuasiel.
6 Lanm mɔ tie nyan muu nyan i.
Biidbuolu kul n yaan taan naan n nyan.
Lanm be t gbannand n i,
g jɔgnd gbanu kul,
g di nifosaal binbem kul nyan muu nyan.
L muu nya *Sitaan buol i.
7 Nifosaal fid g paad muaɔg n bonkobd,
yen bonyugda,
yen bonbalnkaa,
yen nyum n bonfuoda kul.
8 Ama baa sua g ban g fid g paad u lanm.
U tie bonbiɛdl nba kan fid g sed suoo nii,
g gbie yen lɔbd nba kpi kuum.
9 Lanm nba k t diɛ g pag t Yonmdaan t Baa nyan,
t biɛ diɛ l lanm i g polg niib mɔb,
banm nba g Yendu tag’b k b naan yen’o.
10 Pinpagd yen mɔpola kul nya mɔyenm n i.
N naataani,
l g dagd k lan gii tie nnyan.
11 Nyunbunbunn bu fid gii buni g nya bonyenn n ninŋ,
nyunmanm yen nyuntonm ii ?
12 N naataani,
kinkanŋ kan fid g lon sankpasaana,
dimɔunŋ tiig mɔ kan fid g lon kinkana.
Nyunbunbunn nba mɔg yaalm mɔ kan fid gii buni nyunmanm.
Yanfuom nba nya Yendu buol
13 Ŋmaa n mɔg yanfuom g biɛ gbiɛ bona niimn i siign i ?
L daan ń ŋɔn u binbeŋanu n ninŋ,
k u jiin u kua g sun tuonŋana yen yanfuom.
14 Ama l gii tie k i mɔg i pal n ninŋ nankuonŋ g biɛ kpaan k i gii cie i lieb,
yin daa donŋ i kua,
yin biɛ daa fa k i tuag mamɔni sɔnu !
15 L yanfuom g nyiɛ Yendu buol kaa.
L tie *ŋanduna ne ninŋ yal yen nifosaal maalm i.
L nyiɛ *Sitaan buol i.
16 G dugn nanŋ gii be naan buol,
g niib biɛ kpaan k ban gii cie b lieb,
l buol i g ŋmadl yen tuonbibuolu kul be.
17 Ama yanfuom nba nya Yendu buol g mɔg jɔgnd.
L yanfuom kpaan g niib yam ń gii dua i,
g biɛ kuand manu b siign.
G kpaan g niib ń gii taa mɔb.
U jie niib ninbaaɔg bonciɛnn g biɛ suun tuonŋana.
L yanfuom g paad niib g senŋ,
u biɛ g mɔg ŋalaaciidug.
18 Yab nba kpaan g niib yam ń gii dua,
banm n buul l yanduanm k l luon luana nba ŋan Yendu nunŋ n.