Yab tund faaɔg tundl
2
1 Siɛnyoug,
niib bo be Israyɛl yab siign ninŋ g yi b kua Yendu *sogni-nba,
g yen fa faaɔg.
I mɔ yaa siign ninŋ,
niib tan baa be g wuond g tund’i faaɔg tundl nba bu kuan nil tudm n.
B bu yie b Canbaa nba bo fiel’b nyan,
g te g Yendu ń biɛn’m tonm.
2 Niib bonciɛnn bu ŋuan’m b binbem nba mɔg fai nyan ninŋ.
B po bu te g niib ń gii maad mabiid Mamɔni Sɔnua po.
3 Ban bua ligli nyan,
b baa pua mɔb i g diɛ b yul po maalm g bɔnd g di’i.
Ama Yendu tuod b po k l fag g bu dad b tubl.
U kon bu l biɛn’m k l ji kan wai.
4 G dugn Yendu g ŋaa *malɛg-nba nba bo tien biid nyan,
ama u lu’b buoug nba nyua g g mɔg po nyan ninŋ i,
k b luo bunbɔnn n ninŋ,
g guu buud daal.
5 Yendu biɛ bo g ŋaa ŋanduna niib nba bo be hal siɛnyoug g g dad b tubl.
U bo te g taag baa baa g biɛn niib nba bo g cɔlm’o kul.
Ama u bo tan fiel Nowe yen niib banlile i.
Wano Nowe bo muand g niib binbem ń gii ŋan Yendu po.
6 Yendu biɛ bo dad niib nba bo kua *Sɔdɔm yen *Gomɔr nyan tubl,
g juu l doi muu k l dii g buod.
Yal bo baal’b nyan tie binbiug u yab nba g cɔlm’o po,
k ban la l buol g bann yal nba tan bu baal’b.
7 Ama u bo nyan Lɔt l n ninŋ.
Lɔt bo tie *nimɔn i,
k l bo yiɛl’o yen l doi n ninŋ niib n bo tie ban bua nand nba,
k b binbem biɛ mɔg fai.
8 Wano Lɔt bo be l nibiid siign ninŋ,
g gbiɛ g biɛ laad bona nba k b tie,
k l tuonbiid ŋmad u yam daal kul g dugn wan tie nimɔn nyan po.
9 Lann n ŋɔnŋ g Yonmdaan ban wan bu tien nand g nyan yab nba cɔlm’o bigna n ninŋ,
g yen guu g tan bu dad nibiid tubl daal nba k u tan bu bu’b.
10 Yab nba suun b gbannand n bua yal nba k l kuand’b jɔgnd n ninŋ,
g biɛ nund Yendu yikod nyan,
banm i k u bu mand g dad b tubl.
Banm nba tund niib faaɔg tundl k n maad’i ne,
b tie kangbada i g biɛ ŋanm g dug b kua po k l pend.
B g jie yen ban sugl yab nba be polu po g mɔg yudand.
11 Baa malɛg-nba nba ŋanm g mɔg paaciɛnu g cie banm yab nba tund faaɔg tundl nyan mɔno g jalg l polu po yab,
b biɛ g sugd’b Yonmdaan nunŋ n ninŋ.
12 L niib tie nyan bonkobd nba g mɔg siɛl yaa maalm,
g be k ban tu suol’b g kpi nyan i.
B sugd yal nba k banm mɔno g ban i.
B tan bu kpe nyan bonkobd nyan i.
13 Ban sun tuonbiid nba nyan,
b tan bu la l tuonbiid nyuad.
Yendu n i k b suun b gbannand n bua yal nba.
B biɛ gii taan yen’i g bu di jied,
b bontitied tu biil i sann g biɛ kuan’i fai i.
B tie nnyan i g bɔnd’i k l man b po.
14 Banm l kpaan puob i,
g bua ban gii tie biid kukua youg kul.
B bɔnd yab nba g ŋanm g dug *Kristo po i,
k b ŋua’b.
B l sun g bonn kul ń gii tie b yal i.
Banm i g Yendu pol’b mɔb.
15 B ŋaa sɔnŋanu i,
g bod g fagd g ŋuan Bosɔr bija Balaam sɔnu.
Wano Balaam bo buad jied i,
g tuo g gaal ban bo tie’og yal nba g bu sun bonbiil.
16 Ama Yendu bo fu yen’o l bontitied po,
g te g bonŋ,
bonkobg nba tu g maad,
maad yen’o yen nifosaal niɛlu,
g bel wano Yendu *sogni Balaam k u g sun u jadm tuona.
17 L nibuolu nba tund faaɔg tundl tie nyan caakuona nyan i.
B biɛ tie nyan tawalgband nba g faalu tu pien g te lan kaad nyan i.
Yendu bobn yiɛl g bil g guun’m bunbɔncild n ninŋ.
18 B tu sed yen maband g maad maam bonciɛnn k l yen g mɔg niimn,
g tug nifosaal n niɛn yal nba k l g ŋan nyan,
g diɛ diɛɔg g suol yab nba daa l gbaa gbaa g yie g ji g be yen yab nba tud Yendu sɔnu.
19 B tu puon’m yal-n-kua i,
k banm mɔno yen ŋaa k b gbannand n bua bona nba yend’b g bu biɛn’m.
Yal yen yend nil mɔ,
l nil ji tu te l bonn yonm i.
20 L gii tie g niib gbaa gbaa g tan ŋmad g nyiɛ *ŋanduna ne jɔgntuona n ninŋ,
k l tie k ban bann t Yonmdaan t *Fietua Yiesu Kristo po i,
g biɛ ŋaa b kua g guan g baa l jɔgntuona n ninŋ,
l ji baa biɛ l danm po g cie ban bo kpiɛ g be nand.
21 L danm bo gii g bann mɔnkund sɔnu lann n su yen ban bann l sɔnu u,
g biɛ yie g ŋaa Yendu *mɔmaam nba k b bo tund’b nyan.
22 B bontitied ne n ŋɔn g makpanjam ŋanle ne tie mɔni :
" Sangbann gii siin u tu guan g di wan siin yal nba i ",
" Duol gii wul u biɛ tu guan g pagn bagd n i ".