Munmu po naatunn
9
1 G munmu po *malɛg pieb u naatunn,
k n la g ŋmaabig nne dua tinŋ n.
L ŋmaabig bo nyiɛ polu po i g baa,
k b tie’og buoug nba nyua g g mɔg po pienu.
2 K u luod l buoug,
g munyinaajuaɔg nyiɛ l n ninŋ nyan ŋulg nba yab muunyiiug nyan.
K l muunyiiug legn yendu g tinŋ kul bɔnn.
3 G lankpand nyiɛ l muunyiiug n ninŋ g lal yen tinŋ.
K b tie’b paalu k ban gii jund nyan nani n jund nand nyan,
4 g bel’b k ban daa tie muaɔg siɛl,
g daa tie bona nba k b bul siɛl,
g biɛ daa tie tiidi mɔ siɛl.
G nyaan k ban gii cagn niib nba kul g mɔg Yendu banm b yutuna po.
5 G tie’b mɔb k ban cagn’m ŋmaali yinmu g yen daa kpi’b.
G cicagm nba k b ŋɔnŋ niib tie nyan nanŋ n tu jun nil k u cagn nand nba nyan.
6 L dana n ninŋ,
niib bu kpaan kuum g yen kan la,
b tan baa mɔ kuum po,
g yen kan kpe.
7 G lankpand ŋann naan nyan taani nba k b bobn’m g bu gad g pua tɔb nyan,
g yua kul yil bonn nne k l tie nyan wula feglg nyan,
k b nunŋ po tie nyan nifosaal nunŋ nyan.
8 K b yud tie nyan puo yud nyan,
k b nyina mɔ tie nyan yanbɔl yal nyan.
9 K b pal po tie nyan b liɛ kudliɛdl nyan,
k b kpinkpand mɔg fuug nyan told nba g taani bonciɛnn tu diɛl tɔb n ninŋ k l mɔg fuug nand nba nyan.
10 L lankpand bo mɔg jɔa nyan nani nyan i.
K b jɔa n ninŋ mɔg paalu nba k b baa diɛ g cagn niib saa yen ŋmaali yinmu.
11 B bo mɔg b bad,
wano n tie malɛg nba bo guu buoug nba nyua g g mɔg po nyan,
k *Ebro-nba maam n ninŋ k b yi’ug " Abadɔn ",
g Grɛk-nba maam n ninŋ mɔ k b yi’ug k " Apoliyɔna ".
12 Cincinn yaa yubɔnn pend o,
yubɔna ŋanle n biɛ tenn g baad nyan.
Munluob po naatunn
13 G munluob po *malɛg mɔ pieb u naatunn,
k n gbad g niɛlu nne nyiɛ *salg binbindl mɔgbanjuodi ŋanna buol.
L salg binbindl bo tien yen wula i,
g be Yendu nintual n.
14 K l niɛlu maad munluob po malɛg nba diɛ naatunn nyan :
" Lod g ŋaa malɛg-nba banna nba k b lol lol’b g kpiɛn bɔnciɛɔnŋ nba k b yi Efrat nyan. "
15 K u lod’b g ŋaa’b.
L sua k b bo bobn’m g youg ne yen daal ne yen ŋmaalg ne yen binn ne tan gii pund,
ban kpi tinŋ po ne niib kul bɔgdm taal muntaa po.
16 K b ŋɔn’n sijenm nba bo jag taani n ja nand.
B bo tie sijenm miiliɛɔnŋ kobiinle i.
17 Nnyan,
min daa bo l nyuan l bona k l tie nyan danŋd n ninŋ nyan,
k n la taani ŋann yen b tanjagla n naan nand nba.
B bo liɛ b pala po kudliɛdl k l mɔn nyan muu nyan,
g tie bonbɔnyinyinn,
g biɛ tie bonduud.
G taani yula tie nyan yanbɔl yul nyan,
k b mɔi n ninŋ nya muu yen muunyii yen celbilb.
18 K l muu yen l muunyii yen l celbil tie yubɔnbuolu ŋantaa nba baal g biɛn tinŋ po ne niib kul bɔgdm taal muntaa po.
19 L taani paalu bo be b mɔi n ninŋ yen b jɔa n ninŋ i.
B jɔa bo naan yen wai i,
g mɔg yula k b diɛ g cagn niib.
20 Niib nba bo tenn g yubɔna ŋantaa ŋann bo g kpii’b nyan,
bo g lebd b binbem.
B bo l ŋua *sanpola i,
g pug yennaankad k b yen g nyuan,
g g gbiɛ,
g biɛ g sonm.
B bo maal l yennaankad yen wula yen ligli yen nabnd lann i kaa g kpied yen tana yen daad i.
21 L niib bo g ŋaa nikpinu yen nyɔgdinu yen cunconm yen naayigm.