Bonkobbiiug nba nyiɛ mɔgl n
13
1 L puol po k n la g bonkobbiiug nne nyiɛ mɔgl n ninŋ g mɔg yina piig yen yula ŋanlile.
G badfeglg ciib yinn kul po,
g sana nba sugd Yendu mɔ diɛn yul kul po.
2 G bonkobbiiug nba k n la nyan naan yen bonpienŋ,
k u titala tie nyan mɔbonkobg nba k b yi’ug ursa nyan yal,
k u mɔb tie nyan yanbɔl mɔb nyan.
G bonbiiug nba tie nyan waakpel nyan tie’og u paalu,
g kaan’o u badkog po,
g biɛ tie’og yikod nba yab.
3 K l bonkobbiiug yuyenn tie nyan b pua g pad k l naan u kpe,
ama k l yiɛɔg yen tan buul.
K l kpii niib nba kul be tinŋ ne po gbanu k b ŋua g nyuan’o.
4 K b ji pug bonbiiug nba tie nyan waakpel nyan,
k l maa u tug yikod g tie l bonkobbiiug.
Lann i k l niib biɛ pug l bonkobbiiug mɔ g tua :
" Ŋmaa paalu n tie nyan bonkobg ne paalu nyan i ?
Ŋmaa n bu fid g sed g kɔn yen’o i ? "
5 K b cab l bonkobbiiug sɔnu k wan gii maad jipaamaam gii sugd Yendu.
G biɛ cab’o yiko k wan gii ŋɔnŋ u yikod g daan biin piinna yen ŋmaali yinleb.
6 Lann i k u ji cil g maad g sugd Yendu,
g biid u sann,
g biid Yendu n kua naan buol nba nyan sann,
g biɛ sugd yab be polu po kul.
7 K b cab’o k wan pua tɔb yen Yendu niib,
g paad’b.
K b biɛ tie’og yikod k u yend cuga kul n ninŋ niib yen buoli kul n ninŋ niib yen mabuoli kul n ninŋ niib yen ŋanduna ne doi kul n ninŋ niib.
8 G niib nba kul be tinŋ po ne,
k b sana g diɛn miɛl kadaaɔg n ninŋ hal ŋanduna cilg youg nyan,
ji baa pug l bonkobbiiug.
L miɛl kadaaɔg bo tie pebig nba k b kpii’ug nyan yal i.
9 Yua n mɔg tuba g bu gbad wan gbad.
10 Yua nba tie k wan te yonm,
u tan bu l te yonm i.
G yua nba mɔ k l tie g jug n tan bu kun yen’o,
jug n tan bu l kun yen’o.
L po n te k l ŋan g yab nba tie Yendu niib ń gii mɔg mindl g biɛ gii ŋua’ɔg yen b pal kul.
Bonkobbiiug nba nyiɛ tinŋ n laabaal
11 Lann i k n biɛ la g bonkobbilieog nyiɛ tinŋ n ninŋ g mɔg yina ŋanle k l naan yen pebig yina.
K u maad nyan bonbiiug nba tie nyan waakpel nyan.
12 L bonkobbiiug bo diɛ bonkobbiiug nba nyiɛ mɔgl n ninŋ nyan yikod kul i,
u sann po k u niind niib nba kul be tinŋ po ne,
k ban gii pug cincinn bonkobbiiug nba k b bo pua g pad u yuyenn,
k l naan u kpe ama k u yiɛɔg yen tan buul nyan.
13 Bonkobbiiug nba bo nyiɛ tinŋ n ninŋ nyan bo tie yaalidug bona bonciɛnn,
g tan te mɔno g muu nya polu po g ji tinŋ n ninŋ niib kul nunŋ n.
14 B bo cab’o k u tie yaalidug bona cincinn bonkobbiiug ŋann sann po k l bɔnd niib nba be tinŋ po ne.
U bo maad niib ŋanm k ban naan bonnaankal k lan gii naan yen bonkobbiiug nba k b bo cua g duol’o yen jug,
k u biɛ yen daa be g mɔg miɛl nyan.
15 Lann i k b biɛ cab’o k wan pieb fuom g kuan bonnaankal ŋann n ninŋ k wan ji fid gii maad,
g yab nba kul yie k b kan pug bonnaankal,
l bonnaankal ń te ban kpi’b.
16 G bonkobbiiug nba bo nyiɛ tinŋ n nyan niind niib kul,
nigbenŋa yen yab g tie nigbenŋa,
ŋalmandanm yen taladdanm,
yonmi yen yab g tie yonmi,
k ban tien banm b kul nuujendu po lann i kaa b yutuna po.
17 G nil nba kul g mɔg l banm u po,
u kan fid g daa siɛl lann i kaa g kuad siɛl.
L banm bo tie cincinn bonkobbiiug sann,
lann i kaa u sann lanml i.
18 Ne buol ne bual yanfuom i.
Yua nba kul yam fo wan dugn g bann l bonkobbiiug lanml.
L tie jua lanmlc i.
K l lanml tie kobiinluob yen piinluob yen ŋanluob.