Yendu Pebig n fiel yab yani
14
1 Lann i k n biɛ la Pebig,
k u sie Siyɔn jual po.
G niib tuda kobg yen tuda piinna yen tuda ŋanna be yen’o,
k u sann yen u Baa sann diɛn b yutuna po.
2 K n gbad g fuug nne nyiɛ polu po,
g tie nyan mɔgl n nyunguona n tu fu nand nyan,
g fu nyan taag n tu tand yen paalu nand nyan.
L fuug biɛ bo tie nyan ban tu pua biɛd k l mɔ nand nyan i.
3 L niib nba bo g mɔg dindin bo sie badkog nintual n yen bonfuoda banna ŋann nintual n yen nikpela ŋann nintual n g yiin yanpaanu.
Sua bo kan fid g yin l yanpaanu l gii g tie banm niib tuda kobg yen tuda piinna yen tuda ŋanna nba g Yendu bo fiel’b ŋanduna n ninŋ nyan i kaa.
4 Banm n tie jab nba ban b kua diɛnu g g tien cunconm g biɛ g ban g dua yen puoa.
Banm n ŋua Pebig naan buol nba kul k u saa.
Banm i,
g Yendu bo fiel’b niib siign,
k b tie nyan jekpiɛla nyan k wano Yendu yen Pebig gaal’b.
5 B g ban g gbad k b fa siɛl yaa faaɔg.
B tie niib nba g mɔg siɛl yaa jalgi i.
Malɛg-nba n maad yal nba buud po
6 Lann i k n biɛ la *malɛglua k u yuug hal polu polu.
U bo diɛ *Laabamann nba kan ban g bod g bu muand ŋanduna ne doi kul n ninŋ niib yen cuga kul n ninŋ niib yen mabuoli kul n ninŋ niib yen buoli kul n ninŋ niib.
7 U bo yign yen paalu g tua :
" I cɔln man Yendu gii tien’o yudand,
g dugn youg pund yen wan jiɛl niib buud o.
I pug man yua nba tag polu yen tinŋ yen mɔgl yen nyunbunbuna kul. "
8 G munle po malɛg ŋuan cincinn yua g maad :
" U baa o,
dogbenŋl *Babilɔnn baa o.
U te g ŋanduna ne doi n ninŋ kul niib tien cunconm k l daan pend.
L tie nyan dimɔunŋ u k u nyun’m nyan. "
9 G muntaa po malɛg ŋuan cincinn yab g yign yen paalu g tua :
" Yua nba pug bonkobbiiug nba nyiɛ mɔgl n yen u ninnaɔnŋ,
g biɛ tuo g gaal l bonkobbiiug banm u yutunn po lann i kaa u nuu po,
10 l daan n bu nyu Yendu mutuol dimɔunŋ.
B bu tien’o l dimɔunŋ Yendu mutuol ŋmanŋ n ninŋ,
g kan ŋmad yen baa siɛl.
Danm nba kul suun nnyan,
b bu la fala,
celbilb nba so muu nyan n ninŋ,
Yendu malɛg-nba nunŋ n yen Pebig nunŋ n.
11 G muu nba cagn’m nyan muunyiiug baa do youg kul g g mɔg gbennu.
G yab nba kul pug bonkobbiiug yen u ninnaɔnŋ,
g biɛ tuo g gaal u sann banm b po,
b kan gii laad fuom yendu n g bual nyiɛɔg.
12 L po n te k l ŋan g yab tie Yendu niib g cɔln u *Mɔmaam,
g ŋua Yiesu yen b pal kul ń gii mɔg mindl. "
13 K n biɛ gbad g niɛlu nne nyiɛ polu po g maad’n k min diɛn :
" Lan cil mɔlane gii saa,
yab kpenn g dug Yonmdaan po,
pamann tie b yal i.
" *Foŋanm mɔ maad lann n nyan :
" Banm ń ji gii fei,
g dugn b tan bu la b tuona nyuad. "
Bonkukuod yendu
14 Lann i k n biɛ diid g la tawalgbanpieonŋ,
g la k l tie nyan nil nyan g kal l po,
g yil badfeglg k b tien yen wula,
g kub jug nba ŋanm g man.
15 G *malɛglua nyiɛ *jaanddeciɛɔnŋ nba be polu po nyan ninŋ,
g yign yen paalu g maad yua nba kal tawalgbaɔnŋ po nyan k wan tug u jug g yend k l maa yendu youg pund o,
g tinŋ n bonkukuod bie g dagd yen yendu u.
16 Lann i g yua nba kal tawalgbaɔnŋ po tug u jug g yend tinŋ n kpaand kul.
17 G malɛglua biɛ nyiɛ jaanddeciɛɔnŋ nba be polu po nyan ninŋ,
g mɔ kub jug nba ŋanm g man.
18 G malɛg nba mɔg nuu muu po nyan nyiɛ Yendu *salg binbindl buol,
g yign yen paalu g maad malɛg nba bo kub jug nyan,
k wan tug u jug g pual dimɔunŋ tiidi luana nba be tinŋ po ne k l maa l luana kul bie o.
19 G malɛg tug u jug,
g pual dimɔunŋ tiidi luana nba be tinŋ po nyan,
g tug l luana g tien buoug nba ninŋ k b tu ŋmaad g nyanŋ l luana nyum nyan.
L buociɛɔnŋ bo tie Yendu mutuol buoug u.
20 K b nyiɛ doug kunŋ,
g ŋmaa dimɔunŋ tiidi luana buoug n ninŋ,
g sɔm nyiɛ l n ninŋ hal bonciɛnn g puub nyan taabana tuda kobiintaa nyan.
Taanm bo gii jiid l sɔm n ninŋ,
l bo bu pund hal u lanyiɛg.