4-5 देवुळ वेहतपे अब्रम हारान नाटेनाहि कनान दायलाहि पेसतोग़. अस्के ओग़ 75 वर्सानोग़ मतोग़. अब्रम तना मुते सारयि ओसो तमदादाना पेकाल लोट अद्रमे तना मालसोम, मूकोदोयोङ ओसो तना असिस मतोर ओर्युलतोर,^a वेर सबेटोरिन पोसि कनान देसेमते एवतोग़. 6 अब्रम कनान देसेमतगाह्‌क अनेके, सेकेम नाटेनगा वातोग़, वासि अगा मता मोरे इनदनद जागाते बेरा पूसमरातगा डेरा कीसि रोमतोग़. अद तूकने कनानि लोकुर अद देसेमते मंदुर

7 अस्‍के देवुळि अब्रमनगा वासि, “इद देसेमि नना नीवा जालपिलतुह्‌कु ईकन,” इनजोर इता. ईतस्‍के देवुळि नाक वळ्‍ह्‌कता इनजि अगा ओग़ उंद गर्या पंडटोग़. 8 पया ओरु अग्डाह पेसिस अनजि मेटा बूमतगा एवतोर. अद जागाता पोळ्‍द अरयना बाजे बेतेल इनदनद नाग़ मता, पोळ्द पेसना बाजे आय इनदनद नाग़ मता. अगान ओरु डेरा कीसि रोमतोर. अद जागातगा अब्रम यहोवा देवुळतुह्‌कु इनजि उंद गर्या पंडिस पार्तना कीतोग़. 9 ताना पया ओरु अग्डाह पेसतोर, अनेक अनेके नेगेब एरियाते एवतोर.^b

10 अद तूकने अद देसेमते बेरा दुकळ अरताह्‌कु अनम पुटो. अदिह्‌के अब्रम दुकळताहि पिसकन इनजि मिसर देसेमते मनदलाह अतोग़. 11 एरेटा मिसर देसेमतगा एवतस्‍के अब्रम तना मुते सारयिन केयिसि इद्रम इतोग़, “इके केंजा रि, निमा दिसलाह पका बेस नेह्‌ना दिसिह्‌निन, इनजोर नना आलिह कीय्ह्‌नन. 12 अदिह्‌क मिसर देसेमता कोय्तोर नीक ऊळिसि, ‘इद ओना मुते आंदु रा, ओन हव्कतेके इद माक आयग़ा,’ इनदनुर. 13 अदिह्‌क बोग़ाय कलियतेके, ‘नना वेना एलानन’ इनजि वेहा, अद्रम वेहतेके ओरु नाक हव्‍कोर आयनुर, मति नीवा मेटे नावा जीवा पिसग़ा,” इनजोर तान इतोग़.

14 अद्रमे पया, ओरु मिसर देसेमते एवतस्के, अग्डोर लोकुर ऊळतोर, ऊळिसि इद आंचाळ पका बेस दिसिह्‌ता इन्दुर. 15 पया मिसर देसेमता पिरोन^c राजानाङ मंत्रिर ‍ वने सारयिन ऊळतोर. ऊळिसि ओरु तमा राजानगा ताना लोप्पा इद पका बेस दिसिह्‌ता इनजि वेहतोर, वेहतस्के राजाल तान ततलाह तनाङ सीपय्किन लोहतोग़, पया सीपय्क सारयिन पोसि राजमिदेतगा तचि तासतोर. 16 सारयिना मेटे अब्रमिना जीवा पिसता. अब्रम सारयिना दादाल आंदोग़ इनजोर विचर कीसि पिरोन राजाल ओन्‍कु एर्रेङ-गोरेङ, कोंदाङ-एर्मिङ, गाळ्दिङ-रूटुह्‌कु ओसो ओर्युलतोर आस्क-कोय्तोरिन वने ईतोग़.

17 अस्‍के पिरोन, अब्रमना मुतेन तन्क मुते कीयलाहि तना लोते तताह्‌कु, देवुळि बेराङ बेराङ रोगह्‌किन पिरोनना लोतगा लोहता. पया अद अब्रमना मुते आंदु, इनजि राजाल पुतोग़. 18 पुनजि पिरोन राजाल अब्रमिन केयिस ताल्‍ह्‌कतोग़, “निमा नाक बाराह्‌क इद्रम नाळेह कीतिन? इद नीवा मुते इनजि नाक मुनेन बाराह्‌क वेहविन? 19 इद नीवा एलो इनजि नाक वेहताह्‌कु तान नना मुते कीयलाह तच मतन. ऊळा, नना नीवा मुतेन नीक मल्हच ईय्ह्‌नन, इंजेक तान पोसि इग्डाहि पेसिस अन,” इनजोर राजाल तेर्हतोग़. 20 अस्‍के अब्रमि सारयिन ओसो सबे ओरा मालसोमतुन पोसि अग्डाहि पेसतोग़. अस्के ओरिन पेहच ईयलाहि पिरोन राजाल तनाङ सीपय्किन उकुम ईतोग़.