3 नेगेब एरियातुन विळ्सिसि, बेतेल नाटेनेके दायलाह पेसतोग़. उचुक दियाङ पय्नम कीसि, पया बेतेल, आय इव नाह्‌कना नडुमि, मुने बेद जागाते टमिङ तेहच मतोग़, अदे जागाते एवतोग़. 4 एवसि मुने यहोवा देवुळतुन कोळ्‍व कीस मतोग़, अदे गर्यातगा इंजेक ओसो मोळ्कतोग़.

5 अब्रमना संगे मतोग़ु, तमदादाना पेकाल लोटनगा वने एर्रेङ-गोरेङ, कोंदाङ-एर्मिङ ओसो ओना ओर्युलतोर वेल्‍लाटोरे मतोर. 6 अब्रमनाङ ओसो लोटनाङ मूकोदोयोङ इचोन बोल्‍गिस मताङ इतेके ओरिह्‌कु मेहतलाह जागा बूमि आलो, आलवाह्‌कु ओर इर्वुर उंदिय जागाते मनदा पग़वोर. 7 अदतूकने अब्रमनाङ, लोटनाङ कोपालोरु अमेसा जग्‍ळम आंदुर. (ओसो वेरे आयोर मति अगा दुस्रोर कनानिर ओसो परिजि जाततोर लोकुर वने मंदुर)

8 अस्‍के अब्रम लोटिन इतोग़, “नीवा-नावा नडुमि, अद्रमे मावोर कोपालोरा नडुम वेने जग्ळम आयमाकि. माट उंदिय लोतोरल आयवला? 9 माटु इंजेक इद्रम कीकल, वेगुर आतेके बेस आयग़ा. निमा बेस ऊळिसि नीक विचर वातद बूम आचा. निमा दावळ बाजे अतेके नना तिनळ बाजे दाकन, निमा तिनळ बाजे अतेके नना दावळ बाजे दाकन,” इनजोर अब्रम गूनमते लोटिन इतोग़.

10 अस्‍के लोट योर्दन बेरेटा दल्‍पा जागातुन ऊळतस्‍के ओन्‍कु सोवर सहर एवनाह वेल्‍लाय एग़ दिसता. अकेडा जागा देवुळ पंडटद एदेन वाळुमलेह्‌का ओसो मिसर देसेमता बूमलेह्‌का बेस नेह्‌ना दिसिंदु. (अस्के अद जागाते मतव सोदोम-गोमोरा इव सहर्किन देवुळि बूळे केवाय मता.) 11 अदिह्‌क लोट योर्दन बेरेटा दल्‍पा जागातुन आचतोग़. पया वेर इर्वुर वेगुर आसि लोट पोळ्‍द पेसना बाजे दायलाह आतोग़. 12 अह आस पया अब्रम कनान देसेमतेने रोमतोग़, मति लोट इसि योर्दन बेरेग़ कचुलता सहर्कनेके अतोग़. अनजि अग्डा सोदोम सहरता कचुलि तना टमिङ तेहतोग़. 13 सोदोम सहरता लोकुर इतेके दुनियामेटोरिह्‌काय नेका लाग्‍वोरु, ओसो देवुळता विरुद पापम केवालोर मतोर.

14 लोट वेगुर आसि अतापया देवुळि अब्रमिन कलियिस इद्रम वेहता इतेके, “नीवा एरे-गूरे ओसो नालुङ बाजे, बेचोन नीवा कोंडा एवयह्‌ता अचोन जेक ऊळा. 15 इद पूरा बूमि, निमा बेचोन ऊळतिन अचोन नीकु ओसो नीवा जालपिलतुह्‌कु इनजि अमेसा अमेसातुह्‌कु ईकन. 16 अद्रमे नीवा जालपिलतुन इसबलेवा बोल्गिह कीकन. बेद्रम इद बूमता उस्को लेक पग़वाह मन्ह्‌ता, अद्रमे नीवा जालपिल वने लेक पग़वाह मनदनुर. 17 निमा इग्डाह तेदिसि, इद जागातुन पूरा तिरियिस ऊळा. इद सबे बूमि नना नीक ईय्‍ह्‌नन,” इनजोर देवुळ अब्रमिन करल कीता.

18 अस्‍के पया अब्रम तनाङ टमिङ लेहचि हेब्रोन नाटेना कचुल अतोग़. अगा अनजि मम्रे इनवाल मन्कना जागाते पूस मराङ मताङ, अगा अनजि टमिङ तेहतोग़. अगावने यहोवा देवुळतुन कोळ्‍व कीयलाहि उंद गर्या पंडटोग़.