मंदिर बूळेम आयनालोप्पा कबुरि
24
1 पया येसु मंदिरताहि पेसिसि पलत अनेके, मंदिरताङ बंग्लाङ तोहतलाहि माट कग़यवालोरोम ओनगा वातोम. 2 अस्के येसु माक इतोग़, “मीट इव सबेटविन बेस ऊळाटु. इह केंजाट, नना वेहतह्नन, इव बेचोन बूळेम आयनुङ इतेके, इविस्कनगा बंडाता पोग़ोन बंडावने मनो आयग़ा, बूळे केवालोरु कतम अर्हतनुर,” इतोग़.विस्वसिराङ तिपल्क
3 पया येसु जय्तुन मराना मेटातगा वग़ोग़े उदिस मनेके, माट ओनगा वासि ताल्ह्कतोम, “इव पोल्लोङ बेस्के बह आयनुङ, गूरु? नीवा वायनद वेला ओसो इद बूम मुळ्न्दनद वेला एवयना मुने, बेद्रमताङ सीनाङ आयनुङ?” इन्ज ताल्ह्कतोम.
येरुसलेम सहरता मुनेह जय्तुन मराना मेटा (24:3)
4 येसु माक इतोग़, “मीक बोग़ाय नाळेह कीयनायो इनजि उसरते मन्ह्टु. 5 बाराह्क इतेके वेल्लाटोरे नावा पेदिर पोस वासि, ‘नना देवुळ लोहतोग़ राजानन आंदन,’ इनजोर वेल्लाटोरिन नाळेह कीयनुर. 6 इहनाङ-आहनाङ नालुङ मूलाङ आसि लळय्क आस्ताङ इनजि मीक एर्का आयग़ा. अस्के मीट रेयमाटु. इव पोल्लोङ निटम इह आयनुङे, मति इचोट्के बूम मुळन्दो. 7 जातिना पोग़ोन जातिङ तेदनुङ, राजेह्कना पोग़ोन राजेह्क तेदनुङ. बेगा इतेक अगा दुकळ अरयग़ा, जागाङ-बूमिङ मेलियनुङ. 8 मति इव सबे पोल्लोङ वायनाङ पीळाना सिरप मुर्ङुल आयग़ा, ओसो इंका पका बेरा गोसा वायग़ा.
9 “अद तूकने मीवाङ कोंटेतोर मीक जेलते वाटनुर, तिपल कीयनुर, हव्कनुर वने. मीट नाक नमवालोरिर आताह्कु सबे जातिनोर मीक कोंटे कीयनुर. 10 अस्के नाक नमवालोर वेल्लाटोर तमा विस्वसतुन विळ्सिसि, ओर्विह्क-ओर्वोग़ कोंटेतोरा कयदे पोसीयनुर, ओसो ओर्विह्क-ओर्वोग़ कोंटे कीयनुर. 11 ओसो वेल्लाटोर जोलाहलोर कबुरतोर जोल कबुर वेहचि लोकुरिन लेसिह कीयनुर. 12 ओसो पापम पकाय वीळताह्कु, वेल्लाटोर लोकुर मुनेतलेह्का ओर्विह्क-ओर्वोग़ जीवा केवोर आयनुर. 13 मति आक्रि एवनाह बोर दीरा पोस मन्ह्तोर, देवुळि ओरिने पिसिह कीयग़ा. 14 ओसो देवुळता राजेम कीयनदिना लोप्पा बेसता कबुरतुन सबे जातिनोर केंजना इनजि इद कबुर बूममेंड आबुर आयग़ा. अस्के कोनि पया बूम मुळ्न्दग़ा.”
येरुसलेमतगा वायनद गोसा
15 “दानियेल इनवाल मुनेतोग़ देवुळता कबुरतोग़ वेहच मतपु, देवुळतुह्क एग़्ङ वायनदु कळ्वोग़ कीयनद बोमा मंदिरता पवित्र जागाते निच मनदनदिन मीट ऊळकिर. (मीट अर्ववालोरिर इदिन सीताते तासाटु.) 16 अस्के यहुदा पटटे मनवालोर लोकुर कोंटेतोरग्डाह पिह्ट अरयलाह मेटानके रोमवा वितिर. 17 बोग़ाय लोता पोग़ोन मतेके, ओग़ तना लोता सामन ओयलाह लोनलोप्पा नेङमाकेग़. 18 ओसो बोग़ाय मन्कल पोलमते मतेके, ओग़ तना कोटजगातुन ओयलाह लोन मलमाकेग़. 19 अव दियाने नेलाङ हव्कतव आस्किह्क ओसो पाल उहतनव तलिस्किह्क बेचोटा गोसा आयग़ा! 20 ‘माट मुसुर पेग़दस्के ओसो वारमता पोल्वादियाते वितनायो,’ इनजि मीट देवुळतुन पार्तना कीम्ह्टु.a 21 बाराह्क इतेके अद वेलाते पका बेरा गोसा आयग़ा. अचोटा गोसा बूम पुटिह कीतग्डाह बेस्केन आयो वने, ओसो बेस्केन आयो आयग़ा. 22 अव वायनव गोसाताङ दियान देवुळि कमि केवेके, बोग़े मन्कल पिस पग़वोग़ आयनोग़. मति तनाङ आचतोर लोकुरिन पिसिह कीयनेनाह्कु देवुळि अव दियान कमि कीयग़ा.”
देवुळ लोहतोग़ राजाल डीसाते मल्स वायनोग़
23 “अद वेलाते बोग़ाय मीक इनदनोग़, ‘ऊळाट, देवुळ लोहतोग़ राजाल इगाडोग़!’, ‘देवुळ लोहतोग़ राजाल अगाडोग़!’, अस्के ओनाङ सेतेम पोयमाट. 24 बाराह्क इतेके ‘नना देवुळ लोहतोग़ राजानन,’ इनवालोर जोलाहलोर, ओसो ‘देवुळता कबुरतोनन,’ इनवालोर जोलाहलोर, इद्रमतोर पुटनुर. ओर बेराङ-बेराङ बामिह कीयनाङ सीनाङ तोहचि, देवुळताङ आचतोर लोकुरिन वने लेसिह कीयलाह ऊळनुर. मति ओर अह कीया पग़वोर आयनुर. 25 ऊळाट, नना इतेके मीक मुनेन वेहतन, उसर मन्ह्टु.
26 “अदिह्क मीकु बोराय इनदनुर बारा, ‘ऊळाट, देवुळ लोहतोग़ राजाल पेळ्ह्कल बूमते मन्ह्तोग़,’ इतेक अगा मीट ओन पर्ह्कलाह अनमाटु. ओसो मीकु ‘देवुळ लोहतोग़ राजाल लोप्पाडाङ अरानगा मन्ह्तोग़,’ इनजोर इनदनुर बारा, मीट अदिन वने सेतेम पोयमाटु. 27 बाराह्क इतेके, बेद्रमि पुसुल-उळ्म मिळ्स्कसोरे, उंद बाजेताहि दुस्रा बाजेवनाह मिळ्स्किह्ता, अद्रमि माने-मन्कना नडुम पुटटोनन वायनस्के कतमतोर नाक ऊळनुर. 28 बेगा हातद सेत्ता मनदग़ा, अगा गीदस्क निटमे जमा आयनुङ.b
29 “अव दियानाङ तिपल्क मारताहे,
‘पोळ्द मांजो आयग़ा,
नेला दींचो आयग़ा,
उकाङ पोग़ोटाह इळ्न रालनुङ,
इद्रम पोग़ोटा बूमतगा सबे मेलियनुङ.’c
30 “अस्के माने-मन्कना नडुम पुटटोनन, नना मोयुदगा सीना तोहतकन. पया दुनियाता सबे जातिनोर मन्कलोर अर्युल पासोर हामुर-रेगाङ अळयनुर. नना मोयुलपोग़ोन उदिसि, बेरा डीसाते वायनदिन ओर ऊळनुर. 31 अस्के पया नना नावाङ देवतुल्किन अकुमता बेह्रा आल्काते दुनियाता मूलाह्क-मूलाह्क लोहतकन. पया अवु इद बूमतगा सर्ने मनवालोर नावाङ आचतोर लोकुरिन गुम कीयनुङ.
32 “गेळाताङ मरान ऊळिसि इद पोल्लो कग़याटु. आकिङ रालिह्ताङ अस्के डोय एरे एवता इनजोर मीट पुह्निर. 33 इद्रमलेह्का मीटवने इव पोल्लोङ आयनदिन ऊळकिर अस्के, ‘सामि गट्नेन एवतपे मन्ह्तोग़,’ इनजोर पुन्ह्टु. 34 इह केंजाट, नना वेहतह्नन, मीट सबेटोरिर हायनामुनेन, येरुसलेम बूळेम आयनालोप्पा इव नना वेहतव गोटिङ करल आयनुङ. 35 पोग़ोटा बूमि, इळ्ता बूमि बूळेम आयनुङ, मति नावा पोल्लो मात्रमि बेस्केन मायो आयग़ा.”
येसुना वायनद वेला बोन्के तेळियो
36 “मति देवुळ लोहतोग़ राजाल मल्स वायनद दियातुन, वेलातुन बोग़े पुनोग़. देवुळदीपताङ देवतुल्क वने पुनोङ, नना इंका पुनोन, सिरपि नावा बाबाल पुन्ह्तोग़. 37 मुनेतोग़ पेदामुय्तोग़ नोहानस्केडाङ दियाने बेद्रम आता, अद्रमलेह्का माने-मन्कना नडुम पुटटोनन वायनस्के वने आयग़ा. 38 अस्के बेद्रम नोहा मुय्तोग़ तना लोतोर बार ओडातगा नेङनाह्जोम, लोकुर तिनजोर-उनजोर मतोर, मर्मिङ आंदुर, मर्मिङ कीसींदुर, 39 ओसो ओरिनु बेरा उड्रा वासि सबेटोरिन पोळ्ह्च ओनाह्जोम, ओरिह्क मुर्तिय तेळियो आसि; अद्रमि माने-मन्कना नडुम पुटटोनन वायनस्के वने आयग़ा. 40 अद तूकने, पोलमते इर्वुर मन्कलोर मनदनुर. मति नना विस्वसतोन वग़ोन नयके पोस ओयकन, विस्वसलेवोन बारा बूळेम आयलाह अगान विळ्सकन. 41 अहे रेंड आस्कु जेताते पिंड नोग़सोर मनेके, नना विस्वस मनदनदिन उंदतुन नयके पोस ओयकन, विस्वसलेवदिन बारा बूळेम आयलाह अगान विळ्सकन.
42 “अद्रमलेह्का बेद दियाते मीवा सामि वायनोग़, इद मीक तेळियो, अदिह्कु मीटु उसर आसोर मन्ह्टु. 43 इद उंद पोल्लो केंजाटु. नग़्का बेदो उंद वेलाते कले वायना मन्ह्ता इनजि लोता माल्काल पुन्ज मतेके, ओग़ु उंजवा उसरते मनजि, तना लोतुन कलेनु विर्हता एवोग़ आवेग़. 44 अद्रम मीटवने तयर मन्ह्टु, बाराह्क इतेके मीट नावा अग़ ऊळवा वेलाते नना, माने-मन्कना नडुम पुटटोनन वायकन.
सेतेमतोग़ सेवक बहु, लाग्वोग़ सेवक बहु
45 “बोग़ मेटि लोता माल्काना ओर्युदोरिह्क कगोत्क-कगो अडिया ईस्तोग़ ओग़े बेसता बुदतोग़ इमनदारते कबळ केवाल मेटि. मीटवने अहे मनदना. 46 पया माल्काल वानेके, इद्रमे बेस कबळ कीसोर मनवाल मेटि, पका देय्वातोग़ आयनोग़. 47 इह केंजाट, नना वेहतह्नन, ओग़ माल्काल ओन मेटिनु, तना कतम सम्सरमतुन ऊळलाह तासनोग़.
48 “मति ओग़ मेटि लाग्वोग़ आस मतेके, ‘नावा माल्काल वायलाह आल्सेम आयनोग़ इनजि नना विचर वातप कीकन,’ इनजोर इनदनोग़. 49-50 ओसो तना ऐंगेटोर सेवकिरिन नल्हतना-कोह्कना ओसो कल लोटिरा संगे तिनदना-उनडना, इद्रम कीसोर मनेके, ओग़ु माल्काना अग़ ऊळवस्के, माल्काल वायनोग़. 51 मेटि इद्रम कीयह्पा कलियतेके, तना माल्काल ओन पका सिक्सा कीयनोग़. पया अळयना, केयना, मुडुर-मुडुर पल्क कोग़्कना जागातगा ओन मेटिन सोङ केवालोरा संगे वाटिसीयनोग़.