6 “पया नडुमनग़्का, इद्रम आळो वाता, ‘मर्मपेकाल वातोग़, अले रि! ओन कलियलाह दट.’ 7 अव दहा लेयास्‍क पया तेदिसि, तमाङ कंदिस्‍किनु ओर्कुल कीया बोटटाङ. 8 अस्‍के अव बैरिस्‍कु उसरतविन इन्ह्‌ताङ, ‘अल रि, मीवा नेय उचुन माक ईम्ह्‌टु, मावाङ कंदिस्‍क पिवयलाह आताङ,’ इनजोर इताङ. 9 मति उसरताङ इन्ह्‌ताङ, ‘अलो देवन, इद नेय बोन्‍क इन्‍ज बोन्‍क आलग़ा, रि? ईतेके माक वन आलो, मीक वन आलो. अह आयो मति, मीट दूकनतगा अनजि मियेनाह्‌क नेय असिस ताट,’ इनजोर इताङ. 10 अव बैरिस्‍कु नेय असलाह अताङ अस्‍के बार आता, मर्मपेकाल एवतोग़, एवसि मर्मपिलातुन ओना लोन ओतोग़. उसरताङ एयुङ लेयास्‍कु कंदिस्‍किन पोतिह कीस तयर आस मताह्‌कु, मर्मपेकाना संगे ओना लोतगा मर्मिह्‌क अताङ. पया तेल्पतुन गोल्‍स वाटिसीतोर.

11 “गळ्क मनेके अव बैरिस्‍कु एयुङ लेयास्‍कु मर्म-लोतगा वासि केयलाह आताङ, ‘दादा, दादा, माट वातोम, मयेनाह्‌क तेल्प तेग़या, रा!’ 12 अस्‍के मर्मपेकाल अविस्‍किन लोप्पाडाहि पळ्मिङ ईतोग़, ‘मीट बेविस्‍कनिरो? नना करल वेहतह्‌नन, मीक मुर्तिय पुनोन.’ ”

13 पया येसु माक कग़यवालोरिन इतोग़, “अदिह्‌क मीट वने उसरते मन्ह्‌टु, बाराह्‌क इतेके माने-मन्‍कना नडुम पुटटोना वायनद इहलेह्‌काने मन्ह्‌ता. ताना दियातुनु, वेलातुनु मीट मुर्तिय पुनविर.

14 “नना बेस्‍के राजाल आस वायकन अस्‍के इद्रमलेह्‌का ओसो आयनुङ. ओर्वोग़ माल्‍काल दुस्रा देसेम दायना मताह्‌कु, तनाङ सेवकिरिन केयिसि, तना मालसोमतुन ऊळलाह ओरिन वेहतोग़. 15 ओर्विह्‌क ओग़ु बंगरताङ कल्‍दर्कनाङ एयुङ मोटाङ ईतोग़, ओसो ओर्विह्‌क बारा रेंड मोटाङ ईतोग़, ओसो ओर्विह्‌क बारा उंदिय मोटा ईतोग़. इद्रम ओर्विना-ओर्विना बुद ऊळिसि, माल्‍काल ईतोग़. ईसि, तना पय्नमते पेसिस अतोग़.

16 “ओग़ अतस्‍के, बोन्‍क एयुङ मोटाङ दोर्किस मताङ, ओग़ु चट्ने अव मोटाना रुप्‍यानु दंदा कीया बोटटोग़, दंदा कीसि, कल्‍दर्कनाङ ओसो एयुङ मोटाङ एक्‍वा दोर्किह कीतोग़. 17 अद्रमे बोन्‍क रेंड मोटाङ दोर्किस मताङ, ओग़वने दंदा कीसि, ओसो रेंड मोटाङ एक्‍वा दोर्किह कीतोग़. 18 मति बोन्‍क उंद मोटा दोर्किस मता, ओग़ अनजि बूमतुन काचि, माल्‍काल ईतद मोटातुनु बोंदातगा मिसतोग़.

19 “पया वेल्‍लाङे दियाना पेग़्‍के, ओर सेवकिरा माल्‍काल मल्‍स वातोग़. वासि, ‘नना मीक ईतव मालसोमता इसब ईम्ह्‌ट रा,’ इतोग़. 20 अस्‍के बोन्‍क एयुङ मोटाङ दोर्किस मताङ, ओग़ु एक्‍वा दोर्किह कीतव एयुङ मोटान तचि, माल्‍कान इतोग़, ‘महरज, निमा नयगा कल्‍दर्कनाङ एयुङ मोटाङ ईस मतिन. ऊळा, अव कोताना दंदा कीस नना ओसो एक्‍वा एयुङ मोटाङ दोर्किह कीतन.’ 21 ओग़ सेवकनेनाह्‌क माल्‍काल गिर्दा आस इतोग़, ‘बेस-नेह्‌ना कीतिन, निमा बेस सेतेमतोग़ सेवकिनिन. इचुटा पोल्‍लोतगा निमा सेतेम दिसतिन, अदिह्‌क नना नीकु वेल्‍ला मालसोमतगा अदिकर ईकन. वाय, माट कलियिसि गिर्दा आयकल,’ इतोग़.

22 “पया बोन्‍क रेंड मोटाङ दोर्किस मताङ, ओग़वने माल्‍कानगा वास इतोग़, ‘महरज, निमा नयगा कल्‍दर्कनाङ रेंड मोटाङ ईस मतिन. ऊळा, अव कोताना दंदा कीस नना ओसो एक्‍वा रेंड मोटाङ दोर्किह कीतन.’ 23 ओग़ सेवकिन वने माल्‍काल गिर्दा आस इतोग़, ‘सबस, बेस सेतेमतोनिन सेवकिनिन. इचुटा पोल्‍लोतगा निमा सेतेम दिसतिन, अदिह्‌क नना नीकु वेल्‍ला मालसोमतगा अदिकर ईकन. वाय, माट कलियिसि गिर्दा आयकल,’ इतोग़.

24 “पया उंद मोटा दोर्कतोग़ ओना एरे वासि इतोग़, ‘महरज, निमा कळक मन्कनिन इनजि नना पुतन. वीतवालेवा कोयवाल, तूळ्‍हवालेवा गुम केवाल, अद्रमतोना लेह्‌का निमा दुस्रोरा कह्‌टेमता पाय्‍दा एनवनिन. 25 अव कोताङ लेसतेके निमा ओङ आयकिन इनजि नना रेयतन, रेयिह्‌कु नीवा मोटातुन बूमतगा मिसिसि तासिस मतन. ऊळा, इद मोटा नना नीवा नीके मल्‍स ईय्ह्‌नन,’ इनजि इतोग़. 26 अस्‍के ओना माल्‍काल ओन इतोग़, ‘एय लाग्वोग़, लंडा सेवकनिन, वीतवालेवा कोयवाल, तूळ्‍हवालेवा गुम केवाल, नाक अद्रमतोग़ इह्‌निना? कळक मन्कनन इनजि निमा नाक पुतिना? 27 अह इतेके नावा माल कमसेकम साव्‍करनगा तासना मता. अह कीतेके नना वासि नावा मादुन सवयते तेंडिस मनेनन.’ 28 अह इनजि, माल्‍काल उय्‍तुर तनाङ सेवकिरिन केयिस वेहतोग़, ‘मीटु वेनग्डाहि कल्‍दर्कना मोटा ऊंदिसि, दहा मोटाङ मनवाह्‌क ईम्ह्‌ट. 29 बाराह्‌क इतेके बोग़ सेतेमते मनजि, तन्‍क ईतद मादुन असल काळ्‍ङिह्‌तोग़, ओन्‍कु नना ओसो इंका ईकन, ओन्‍कु वेल्‍लाय दोर्कग़ा. मति बोग़ सेतेमते मनवा, तन्‍क ईतद मादुन बेस काळ्‍ङोग़, ओनगा उचुक मतविन वने नना तेंडकन. 30 वेग़ सेवकि बेदे कबळतुह्‌क ओजोग़! वेन पलत मुर्गंगाते पोहचीम्ह्‌ट. अगा मनवालोर अळयना-केयना, मुडुर-मुडुर पल्‍क कोग़्‍कना कीसोर मनदनुर,’ इनजि माल्‍काल वेहतोग़.”

31 “माने-मन्‍कना नडुम पुटटोनन, नना राजाल आसि, सबे देवतुल्‍कना संगे नावा डीसाते वायकन अस्‍के, नना नावा राजगादेतगा डीसाते उदकन. 32 अस्‍के नावा मुनेह सबे जातिना मुल गुम आयनुर. अस्‍के बहलेह्‌का कोपाल एर्रेनग्‍डाहि गोरेन एग़्‍पिह कीस्‍तोग़, अहलेह्‌का नना ओर लोकुरिन ओर्विनग्‍डाह-ओर्विन एग़्‍पिह कीकन. 33 अह कीसि बेद्रम कोपाल तना तिनळ बाजे गोरेन तासिह्‌तोर, तना दावळ बाजे बार एर्रेन तासिह्‌तोर, अद्रमे नना सेतेमतोरिन बारा नावा तिनळ बाजे तासकन, लाग्वोरिन बारा नावा दावळ बाजे तासकन.^a

34 “अस्‍के नना नावा तिनळतोर सेतेमतोरिन इनदकन, ‘ओ नावा बाबाल देय्‍वा ईता लोकुरिर, बूम पुटटग्डाहि ओग़ मियेनाह्‌क इनजि बेद राजेमतुन ओप्पे कीस तासतोग़, अद राजेमता अदिकर मीट वासि एनाटु. 35 बाराह्‌क इतेके नना कग़्वते मतन अस्‍के मीट नाक तिनदलाह तिंडि ईतिर; ओसो नाक एग़ उंडा वसिस मतस्‍के नाक उनडलाह एग़ ईतिर; ओसो नना पर्गेन लेह्‌का मतन अस्‍के नाक मीवाङ लोह्‌कने जागा ईतिर; 36 ओसो नना गेंदेङलेवा मतन अस्‍के मीट नाकु केग़यलाह गेंदेङ ईतिर; ओसो नना दुकते मतन अस्‍के मीट नाक तोळ आयलाह वातिर; ओसो नना जेलते मतन अस्‍के मीट नाक कलियलाह वातिर.’

37 “अस्‍के तिनळ बाजे मनवालोर सेतेमतोर नाक इनदनुर, ‘सामि, माट नीकु कग़्वते अरतदिन ऊळिसि बेस्‍के तिनदलाह ईतोम? नीक एग़ उंडा वसतदिन ऊळिसि बेस्‍के एग़ उनडलाह ईतोम? 38 माट नीकु पर्गेन लेह्‌का आतदिन ऊळिसि बेस्‍के केयिस लोन-जागा ईतोम? नीक गेंदेङलेवा ऊळिसि बेस्‍के गेंदेङ केग़यलाह ईतोम? 39 ओसो निमा दुकते अरतदिन, जेलते मतदिन ऊळिसि, बेस्‍के माट नियके कलियलाह वातोम?’ इनजि ताल्ह्‌कनुर. 40 अस्‍के नना ओरिन सेतेमतोरिन इनदकन, ‘आयो रा, इह केंजाट, नना वेहतह्‌नन, नावा लोकुर ओसोय पोहचीतप उड्लोर मतेकाय, ओरग्‍डाहि बोनाय वग़ोन इह बेस कीतिर इतेके, नाके कीतप आस्‍ता,’ इनजि इनदकन. 41 पया दावळ बाजेतोर लाग्वोरिन नना इनदकन, ‘ओर सरपते मनवालोरिर, नयग्डाहि पेसिस अन्ह्‌टु. देयह्‌किह्‌कु ओसो अविस्‍कना मुक्‍याह्‌कु ओप्पे कीतदु बेस्‍केन पिववद किसबटटगा अन्ह्‌टु. 42 बाराह्‌क इतेके नना कग़्वते मतन अस्‍के मीट नाक तिनदलाह तिंडि एविर; ओसो नाक एग़ उंडा वसिस मतस्‍के नाक उनडलाह एग़ एविर; 43 ओसो नना पर्गेन लेह्‌का मतन अस्‍के नाक मीवाङ लोह्‌कने जागा एविर; ओसो नना गेंदेङलेवा मतन अस्‍के मीट नाकु केग़यलाह गेंदेङ एविर; ओसो नना दुकते, जेलते मतन अस्‍के मीट नाक कलियलाह वाविर.’

44 “अस्‍के ओरवने नाक ताल्ह्‌कनुर, ‘सामि, नीक माटु बेस्‍के कग़्वते मतस्‍के, एग़ उंडा वसतस्के, पर्गेन लेह्‌का मतस्‍के, गेंदेङलेवा मतिन अस्‍के, दुकते ओसो जेलते मतस्‍के, बेस्‍के माट ऊळिसि नीक साय्‍ता केवोम?’ 45 अस्‍के नना ओरिन इनदकन, ‘इह केंजाट, नना वेहतह्‌नन, वेर नावा लोकुर ओसोय पोहचीतप उड्लोर मतेकाय, ओरग्‍डाहि बोन आय वग़ोन इह बेस केविर इतेके, नाकवने बेस केवप आस्‍ता,’ इनजि इनदकन.

46 “ओर इतेके अमेसाता सिक्‍सा आयलाह दायनुर, सेतेमतोरिह्‌क बारा अमेसा पिसलाह दोर्कग़ा,” इनजि येसु माक कग़यवालोरिन इतोग़.