5 मीट नाक पर्ह्‌किस ऊळना वाटो, मीवा विस्वस निटम मन्ह्‌ताया इनजि मीट कुदतुने पर्ह्‌किस ऊळाट. अद्रम ऊळतस्के मीवा जीवातगा येसु किर्स्तु मन्ह्‌तोग़ इनजोर पुनमुळ आस्ता. अद्रम लेवेके मीट ओना लोकुरिर आयविरे कोनि. 6 अद्रम पर्ह्‌किस ऊळतेके, मयगा वने बळयिरा अदिकर निटम मन्ह्‌ता इनजोर मीट पुनदकिर बहे. 7 मीट मावाङ केंजवा बाताले लाग्वा कबळ कीयना आयो इनजोर मियेनाह्‌क देवुळतुन पार्तना कीय्ह्‌नोम. मयगा किर्स्तुना बळयिरा अदिकर मन्ह्‌ता इनजोर मीट रेयिस ताकलाह, इदिन इनोन. अद अदिकर माट मीक तोहवेक वने बार आयो, मति मीट सेतेमते ताकनदे माक विचर वास्ता. 8 मीट सेतेम काग़्हमुळतुन माळतेके, माट मीवा विरुद बेद्रम आयकोम? माट अद्रम आयवा मीवा तोळे मनदकोम! 9 माट लावलेवोरोम दिसतेक बार आयो, मीट लावतोर मतेक माट गिर्दा आय्ह्‌नोम. मीट मीवा ताकमुळते तपतव पोल्‍लोन सुद्रे कीसि देवुळतुह्‌क विचर वानाह पिसना इनजोर पार्तना कीय्ह्‌नोम. 10 मीवा विस्वसतुन बेर्सिह कीयलाहि सामि माक अदिकर ईतोग़, तान बूळे कीयलाहि आयो. मियगा वातस्के इद अदिकरते मीक कळकते वेहतनाह आयमाकि इनजोर, इंजेक मियग्डाह जेक मनदह्‌पा, इव पोल्‍लोन रासलाह आतन.

11 मावोर विस्वसिरिर! इव नावाङ आक्रिताङ पोल्‍लोङ आंदुङ: बेस गिर्दाते मन्ह्‌टु, सुद्रेम आसोर मन्ह्‌टु, सुकमते मन्ह्‌टु, उंदिय विचरते मन्ह्‌टु, ओर्विह्‌क-ओर्वोग़ कलियिस-मलियिस मन्ह्‌टु, अस्के माक जीवा कीयनद, सुकम ईयनद देवुळि मीवा ऐंगे मनदग़ा. 12 मीट देवुळता लोकुरिर इनजि ओर्विह्‌क-ओर्वोग़ जीवा वाटसोरे जोहर कीम्ह्‌टु. 13 इग्डोर देवुळता मन्कलोर सबेटोर मीक जय येसु इन्ह्‌तोर. 14 मीट सबेटोरिह्‌क येसुसामि किर्स्तु देय्वा ईयेग़, देवुळि जीवा कीसोर मनि. ताना जीवा मीट सबेटोरगा कलियसोर मनि.