1 अदिनेनाह्‌क मावोर पवित्र विस्वसिरिर! देवुळि मीक बेद पिसमुळते केयता, अवटे मीट वने कलियतिर. अदिनेनाह्‌क येसुना लोप्पाडा पोल्‍लोतुन बेस-नेह्‌ना विचर कीस ऊळाट! ओग़ देवुळ लोहतोग़ माक पिसिह केवाल ओसो मावा पेर्माल इनजि माट कबुल आय्ह्‌नल. 2 बेद सेवातेनाह्‌क देवुळि मोसान केयता, अदिन ओग़ देवुळता लोतोरगा तपवालेवा कीतोग़. अद्रमे बेद सेवातेनाह्‌क देवुळि येसुन निल्पिह कीता, अदिन ओग़ वने तपवालेवा कीतोग़. 3-4 लोतुन पंडवाल इतेके मन्कले मन्ह्‌तोग़. मति देवुळ बारा सबेटविन पंडटा. बेद्रम लोतुन पंडवाल अद लोतुह्‌काय एक्वा मान-कदरतोग़ आस्तोग़, अद्रमे येसु मोसाह्‌काय एक्वा, पका मान-कदरता लायकतोग़ आंदोग़. 5 मोसाल देवुळता लोतोरगा सबे पोल्‍लोने तपवालेवा सेवा कीतोग़; मति ओग़ सिरप सेवके मतोग़. वायनद कालमते देवुळि पुन्पिह कीयनव सेतेम पोल्‍लोन ओना कबळ मुनेन तोहचीता. 6 मति किर्स्तु बारा देवुळता मग़ि मनजि देवुळता लोतोरिन ऊळसोर मनवाल आतोग़. अदिह्‌क माट आसा कीतल अद पोल्‍लोतगा रेयवालेवा, आक्रि एवनाह मेग़्किस आसा ताससोर मतेके माट वने ताना लोतोरल आय्ह्‌नल.

इनजोर रासिस मन्ह्‌ता.

इनजोर रासतद इद पोल्‍लोतुन ओसो ऊळकल. 16 देवुळता पोल्‍लोतुन केंजिसि, तान ओङ वानाह कीस मतोर बोरु? मिसर देसेमताहि मोसाल पेहच ततोरु, ओरे मन्कलोरु! 17 रेंड वीसाङ वर्साङ देवुळि बोरिन ओङ आस मता? पापम कीतोर मन्कलोरिन ओङ आस मता. ओर पापम कीताह्‌कु, पेळ्ह्‌कल बूमतगाने डोलतोर! 18 आरम कीयलाह ओरेनाह्‌क तासतद जागातगा एवमाकिर इनजोर देवुळि बोर मन्कलोरा लोप्पा ओङते किरिया कीता? ताना पोल्‍लोतुन केंजवोराय लोप्पा. 19 ओर मन्कलोर देवुळतुन विस्वस केवाह्‌कु, आरम दोर्कनद देसेमतगा ओळिय पग़वोर इनजोर माक एर्का आस्ता.