8 आरम कीयनद जागा ईकन इनजोर देवुळि पोल्‍लो विळ्सिस मता. इद पोल्‍लोतुन अर्विसि माक बाताल तेळियिह्‌ता? कनान इनदनद देसेमते मावा तादोर-बाबोरिन यहोसा मुय्तोग़ ओस मतोग़.^e अद देसेम आरम कीयनद जागा आया पग़वो, आस मतेके आरमतेनाह्‌क ओसो उंद दियातुन देवुळि वेहो आवालि. 9 अदिनेनाह्‌क इदे पोल्‍लो मन्ह्‌ता: देवुळि बेद्रम वारमता आक्रि दियाते तना कबळताहि रोमता,^f अद्रम तना मन्कलोरेनाह्‌क वने आरम कीयनद जागा मन्ह्‌ता. 10 बेद्रम देवुळि तनाङ कबस्कनाहि रोमता, अद्रमे तानाङ मन्कलोर, देवुळि तासतद आरम कीयनगा ओळियिसि तमाङ कबस्कनाहि रोमिह्‌तोर. 11 अदिनेनाह्‌क माट वने अगा, आरम कीयनद जागातगा एवयलाहि जिद कीयिङ. मयग्डाहि बोग़े, मुनेतोर मन्कलोरा लेह्‌कान, देवुळता पोल्‍लो केंजवाह्‌क बूळेम आयनद आयो. 12 बाराह्‌क इतेके देवुळ वेहतद पोल्‍लो जीवात मन्ह्‌ता. मावा लोप्पा कबळ कीस्ता. रेंड बाजेङ वाय्व मनदनद तल्वर कसेग़ बेद्रम बोकातुन, मुळ्गुंजतुन पग़्क पहतना लेह्‌का गडिह्‌ता; तान्काय एक्वा वीळिस देवुळता पोल्‍लो मन्कलोरा जीवातुन, बुदतुन पग़्क पहतना लेह्‌का गडिह्‌ता. अद मन्कलोरा सीतातुन, विचरतुन पर्ह्‌किस ऊळिह्‌ता. 13 देवुळि पुटिह कीतद बेदे आयि तानाङ कोंडानाहि मक पग़वो; मति सबेटव तान्क पोळ्क्ने दिसिह्‌ताङ. तान्के माक पूरा इसब ईया पोयह्‌ता.

14-15 मति मयेनाह्‌क बेरोग़ पेर्माल मन्ह्‌तोग़; ओग़ आंदोग़ देवुळता मग़ि येसु. ओग़ देवुळदीपते देवुळबाबाना बाजे उदिस मन्ह्‌तोग़. मावा लेह्‌कान ओन्क वने पापम कीया वेसनाह सबे रीतिनाङ विचर्क वाताङ, तेला मति ओग़ बेस्केन पापम केवोग़. अदिह्‌क ओग़ मावा कमजोरतुन ऊळिस जीवा लोपवाल आंदोग़. अदिनेनाह्‌क येसुनगा विस्वस कीयनद बेद पोल्‍लोतुन माट कबुल आय्ह्‌नल, अद पोल्‍लोतुन विळ्सवालेवा मेग़्किस पोस मनदना गावले. 16 माक बेस्के गर्ज अरयह्‌ता, अस्के देवुळ माक ऊळिस जीवा लोपि, दया कीस तोळ ईयि इनजोर, दया कीयनद देवुळता एरे माट दीरा पोस दाकल.