¹ आदरणी थियुफिलुस,

नरा लोगहुंण ने उण बातहुंण का बारामें लिखवा को काम अपणा हात माय ल्यो जो हमारा माय घटी। ² ठीक वीज बातहुंण जो हमारे उण लोगहुंण से मिळी, जिणने इनी बातहुंण के सुरु सेज देखी थी अने जो परमेसर का बचन का सेवक था। ³ इकासरु सुरु सेज इनी सगळी बातहुंण के होसियारी से अने सई-सई परखवा का बाद, तमारा सरु लिखणों म्हारे सई लाग्यो। ⁴ जेकासे के तू उण बातहुंण की सच्चई के जाणी ले जिणकी थारे सीख दइगी हे।

⁵ यहूदिया का राजा हेरोदेस का राजकाल माय जकरियाह नामको एक पुरोहित^b थो जो पुरोहित अबियाह का दळ को थो। अने उकी बइरा को नाम इलीसिबा थो जो हारुन^a का कुळ की थी। ⁶ वी दोइज परमेसर की नगे माय धरमी था अने उणका चरित्तर परभु का सगळा हुकम अने नेम-बिधान का मुजब निरदोस था। ⁷ वी बे-ओलाद था, क्योंके इलीसिबा बांझ थी अने दोइज डोकरा-डोकरी हुई ग्या था।

⁸ असो होयो के जदे जकरियाह अपणा दळ की सारी आवा पे परमेसर का सामे पुरोहित को काम करी र्‌यो थो ⁹ तो पुरोहितहुंण की रीति मुजब चिट्ठी लाखी के उके छांटी ल्यो के परभु का मन्‍दर माय जई के धूप-बत्ती जळाय। ¹⁰ अने धूप-बत्ती जळावा का बखत सगळा मनखहुंण बायरे पराथना करी र्‌या था। ¹¹ अने उके धुप-देवा की बेदी का सुदा हाताड़ी परभु को एक सरगदूत उबो नगे आयो। ¹² अने उके देखी के जकरियोह घबरायो अने डर का मारे उबो को उबोज र्‌यो। ¹³ पण सरगदूत ने उकासे क्यो, "हे जकरियाह डरे मती, क्योंके परमेसर ने थारी पराथना सुणी ली हे; थारी बइरा इलीसिबा से थारा सरु एक बेटो पेदा होयगा अने तू उको नाम योहन राखजे।" ¹⁴ थारे आनन्द अने खुसी रेगा, अने उका जनम से नरा लोग आनन्द मनायेगा। ^15 c क्योंके परभु की नगे माय उ म्हान रेगा। उ दाखरस अने दारु नी प्येगा, उ अपणी मेतारी की कोख सेज पवित्तर आतमा से भर्‌यो होयो रेगा। ¹⁶ उ इसराइल जात का कुळ माय से नरा के उणका परभु परमेसर आड़ी फेरी लायगा। ^17 d अने उ परभु का अगड़े-अगड़े एलियाह नबी की आतमा अने सामरत माय हुई के चलेगा, के पूरखाहुंण का हिरदा बाळ-बच्चाहुंण आड़ी फेरी दे अने हुकम नी मानवा वाळाहुंण के असी समज देगा के धरमिहुंण का जसा बिचार राखे जेकासे के उ परभु सरु एक लायक परजा तय्यार करे।"

¹⁸ जकरियाह ने सरगदूत से पुछ्‌यो, "हूं इके पक्‍की तरा से कसे जाणी सकूं? क्योंके हूं तो डोकरो हुई ग्यो हूं अने म्हारी घराळी बी डोकरी हुई गी।"

^19 e सरगदूत ने जुवाब द्‍यो, हूं जिबराइल हूं जो परमेसर का सामे उबो रूं हूं। म्हारे इकासरु मोकल्यो के थार से बातहुंण करूं, अने थारे यो सुब-समिचार सुणउं। ²⁰ देख, जेना दन तक ई बातहुंण पूरण नी हुई जाय तू गुंगो रेगा अने बोली नी सकेगा, क्योंके तने म्हारी बातहुंण पे जो ठीक बखत पे पूरण होयगा बिसास नी कर्‌यो।"

²¹ उना बखत लोग जकरियाह पुरोहित की बाट देखी र्‌या था, अने उणके अचरज हुई र्‌यो थो के उके मन्‍दर माय इतरी देर कायसरु लागी री हे? ²² पण जदे उ बायरे आयो तो उणका से बोली नी सक्यो, अने वी जाणी ग्या के उके मन्‍दर माय कईं को दरसन मिळ्यो हे, क्योंके उ इसारो करतो र्‌यो अने गुंगो बण्यो र्‌यो।

²³ अने असो होयो के जदे उका पुरोहितपणा की सेवा का दन पूरण होया तो उ अपणा घरे अई ग्यो। ²⁴ इना दनहुंण का बाद उकी घराळी इलीसिबा भारीपग से हुई अने उने या कई के खुद के पांच मइना तक छिपाड़ी राखी। ²⁵ उने क्यो, "इना दनहुंण माय परभु ने म्हार पे किरपा भरी नगे करिके, मनखहुंण माय म्हारो लांछण मिटावा सरुज, उने म्हारी बिणती सुणी।"

²⁶ इलीसिबा का छटवां मइना माय परमेसर आड़ी से जिबराइल सरगदूत गलील का नासरत नगर माय ^27 f एक कुंवारी कने मोकल्यो, जेकी सगई यूसफ नामका एक मनख से हुई थी जो दाऊद का बंस को थो, अने उनी कुंवारी को नाम मरियम थो। ²⁸ अने भित्तरे अई के सरगदूत ने मरियम से क्यो, "हे परभु की किरपा-पावा वाळी, परणाम! परभु थारा गेले हे।" ²⁹ या बात सुणी के मरियम घणी डरी गी अने वा सोंच-बिचार माय पड़ी गी के यो कसतरा को परणाम हे। ³⁰ पण सरगदूत ने उकासे क्यो, "हे मरियम, डरे मती! क्योंके थार पे परमेसर की किरपा हुई हे। ^31 g देख, तू गरभ धारेगा अने एक बेटो जणेगा, अने तू उको नाम ईसु राखजे ^32 h उ म्हान रेगा, अने परमपरधान को बेटो केवायगा। परभु परमेसर उका पुरखा दाऊद को राज ईसु के देगा। ³³ अने उ याकूब का घराणा पे हमेस्या तक राज करेगा, अने उको राज कदी नी मिटेगा।"

³⁴ मरियम ने सरगदूत से क्यो, "यो कसे हुई सके, क्योंके हूं तो कुंवारीजⁱ हूं?"

³⁵ सरगदूत ने उकासे क्यो, "पवित्तर आतमा थार पे उतरेगा अने परमपरधान की सामरत को छायळो थार पे रेगा। इकासरु उ पवित्तर बाळक जो जनमेगा, परमेसर को बेटो केवायगा। ³⁶ देख, थारी नातेदारनी इलीसिबा के बी इना बुड़ापा माय एक बेटो होवा वाळो हे अने जो बांझ केवाड़ी जाती थी यो उको छटवों म‍इनो हे। ^37 j क्योंके परमेसर सरु कइंज अबगो हयनी।"

³⁸ मरियम ने क्यो "देख, हूं तो परभु की दासी हूं। थारा बचन मुजबीज म्हारा गेले होय।" अने सरगदूत उका कने से चल्यो ग्यो।

³⁹ तो उणाज दनहुंण माय मरियम उठी ने झट बळ्डा आळा परदेस माय यहूदा का एक नगर आड़ी गी, ⁴⁰ अने जकरियाह का घरे जई ने उने इलीसिबा के परणाम कर्‌यो। ⁴¹ असो होयो के जसोज इलीसिबा ने मरियम को परणाम सुण्यो असोज बाळक उकी कोख माय जोर से उछळी पड़्यो अने इलीसिबा पवित्तर आतमा से पूरण हुई। ⁴² अने उने उंची अवाज से हेला पाड़ी ने क्यो, "तू सगळी नारीहुंण माय धन्‍य हे, अने थारी कोख को फळ बी धन्‍य हे! ⁴³ म्हार पे या किरपा कसे हुई के म्हारा परभु की मेतारी म्हारा कने अई? ⁴⁴ देख, जसाज थारा परणाम का सबद् म्हारा कान माय पड़्या, बाळक म्हारी कोख माय खुसी से उछळी पड़्यो। ⁴⁵ धन्‍य हे वा नारी जेने बिसास कर्‌यो के जो कंई परभु ने उकासे क्यो, उ पूरण होयगा।"

^46 k तो मरियम ने क्यो,

⁵⁶ गीत खतम करवा का बाद, मरियम इलीसिबा का गेले तीन मइना तक रई के अपणा घरे नासरत पाछी अई।

⁵⁷ जदे इलीसिबा के बाळक जणवा का दन पूरण होया तो उने एक बाळक जण्यो। ⁵⁸ उका पड़ोसी अने नातेदारहुंण ने जदे यो सुण्यो के परभु ने उका पे घणी किरपा करी हे तो उणने उका गेले खुसी मनई।

^59 o असो होयो के वी मनख आठवां दन बाळक को खतणो करावा आया अने उका पिता का नाम पेज उको नाम जकरियाह राखवा लाग्या। ⁶⁰ पण उकी मेतारी ने क्यो, "नी! उको नाम योहन राख्यो जायगा।"

⁶¹ तो उणने उकासे क्यो, "तमारा नातेदारहुंण माय से कइंका कोज यो नाम हयनी!" ⁶² उणने उका पिताजी से इसारो करी ने पुछ्‌यो के "तू उको कंई नाम राखणो चावे?"

⁶³ जकरियाह ने लिखवा की पट्टी मंगाड़ी अने उका पे लिख्यो, "उको नाम योहन हे।" अने सगळा के अचरज होयो। ⁶⁴ झट उकी जीब की गठाण खुली गी अने जीब से परमेसर की इसतुती, करतो होयो बोलवा लाग्यो। ⁶⁵ इका पे अड़ोसी-पड़ोसिहुंण डरवा लाग्‍या अने यहूदिया का आखा बळ्डा परदेस माय इनी सगळी बातहुंण की चरचा होवा लागी। ⁶⁶ जिणने इनी सगळी बातहुंण के सुणी उण सगळा ने अपणा-अपणा मन माय बिचारी ने क्यो "यो बाळक कसो रेगा?" क्योंके जरुरीज परभु को हात उका पे थो।

⁶⁷ अने उको पिताजी जकरियाह पवित्तर आतमा से भर्‌यो होयो, यो कई के भविसबाणी करवा लाग्यो;

⁸⁰ अने उ बाळक बड़तो अने आतमा माय बळवन्‍त होतो अने इसराइल पे परगटवा का दन तक सुनसान जगा पे र्‌यो।