―Yuꞌu kuví ra saꞌá kuenda chuun, ma yuꞌvun, Abram, kaꞌnu xaan nyatu kua kuꞌve chuun ―katyí ra.

2-3 Ta katyí ra Abram chi ra:

―¿Ñáá cha kua kuꞌvon chi yuꞌu, Sutu Mañi yuꞌu, ta yuꞌu, yori ni noo seꞌi iyó? Ta tandɨꞌɨ maa cha iyó chii kundoo chi musi, ra Eliezer, ra ñuu Damasco, vatyi maun ña chaꞌu̱n noo seꞌe chi ndi ―katyí ra Abram.

4 Ta nakaꞌa̱n Nyoo chiꞌin ra, ta katyí ra:

―Ñima ra Eliezer kundoo chiꞌin cha tyayɨun, soko noo seꞌun kundoo chiꞌin cha tyayɨun ―katyí ra.

5 Tyikuan ta kuaꞌan ra chiꞌin ra Abram nu keꞌe, ta katyí ra chi ra:

―Na̱nyeꞌe ityi sɨkɨ ta nakaꞌvun yoso taꞌan tiñoo iyó andɨvɨ, vatyi tyikuan kaa cha kuaꞌa ñáyɨvɨ taton kua koo ―katyí ra.

6 Ta chino̱ iñi ra Abram cha katyí Nyoo chi ra, yukuan chaꞌa tɨɨ̱n kuenda Nyoo chi ra tari noo ra vaꞌa.^a 7 Ta katyí Nyoo:

―Yuꞌu kuví ra Jehová, ra cha tava̱ chuun nya ñuu Ur nu iyó ñáyɨvɨ Caldea vatyi kuꞌve ñuꞌún iꞌya chuun ―katyí ra.

8 Ta katyí ra Abram chi ra:

―Sutu Mañi yuꞌu, Jehová, ¿yoso kaa koto yuꞌu vatyi kutaꞌan chi ñuꞌún iꞌya chii? ―katyí ra.

9 Ta katyi ra Jehová chi ra:

―Nya̱ka noo sɨndɨkɨ cha uñi kuiya, ta noo ndixiꞌyu sɨꞌɨ cha uñi kuiya, ta noo mbee cha uñi kuiya, ta noo kuku ta noo paloma ―katyí Nyoo chi ra.

10 Yukuan ta keꞌe̱n ra tandɨꞌɨ kɨtɨ kuan ta chaꞌñi̱ ra chi tɨ, ta chaꞌnya̱ sava ra chi tɨ. Ta chaku̱n ra taꞌan taꞌan sava kɨtɨ kuan ityi nuu inga sava tɨ, soko ña chaꞌnya̱ sava ra chi kuku kuan ta nɨɨ ri chi paloma. 11 Ta kichaꞌa̱ chaá koyo chii, kuñí tɨ kachi tɨ koño kuan, soko ra Abram sakono̱ ra chi tɨ. 12 Tyikuan ta kuꞌva cha kee̱ ñanyii, ta tɨɨ̱n ñumaꞌna chi ra Abram ta kixi̱ ra. Ta nakava̱ noo cha ñaa iñi kaꞌnu sɨkɨ ra, ta yaꞌa̱ xaan cha yuꞌví ra kuvi̱. 13 Tyikuan ta katyí ra Jehová chi ra Abram:

―Cha ndicha vatyi ñáyɨvɨ cha kukuvi taton koo ñu inga ñuu, ta kumi cientu kuiya kua nyeꞌe xaan ñu tɨndoꞌo, ta kua kuvi ñu musu ñáyɨvɨ ñuu kuan. 14 Soko kua tachi tuñi yuꞌu chi ñáyɨvɨ ñuu nu kukuvi ñu musu, ta cha yaꞌa kumi cientu kuiya kuan kukita ñu chiꞌin kuaꞌa xaan cha tyayɨɨ. 15 Ta yoꞌo, kuaꞌa xaan kuiya kukoun ta kukúvun ta kutyiꞌi ñu chuun chichi ñuꞌún, ta kunyitatun chiꞌin ñáyɨvɨ chuun cha chiꞌi̱ ta cha naꞌa. 16 Ta cha yaꞌa̱ kumi cientu kuiya cha ka iyó ñu ñuꞌún Egipto kuan, kundichi koyo ñu nu ñuꞌún iꞌya, vatyi vityin ta ndukuaꞌa ka kuatyi ñáyɨvɨ Amor cha iyó iꞌya ―katyí ra Jehová chi ra.

17 Ta kuꞌva cha kɨꞌvɨ̱ ñanyii ta chakun chi cha ñaa iñi, tuvi̱ noo horno tavá ñuꞌma ta noo sukun yɨtɨ kɨvɨ kayú ñuꞌu̱n nuu yaꞌa̱ sava maꞌñu nu kayukú koño kɨtɨ cha chaꞌnya̱ sava ra kuan. 18 Suri kɨvɨ kuan natyiꞌi̱ taꞌan ra Jehová tuꞌun chiꞌin ra Abram, ta katyí ra:

―Ñuꞌún iꞌya chi ñáyɨvɨ kukuvi taton kukuꞌve, nyakua nya yuꞌu yuvi ndutya iyó ñuꞌún Egipto ta nyakua nya yuꞌu yuvi ndutya kaꞌnu Éufrates kua kuvi chi ñáyɨvɨ taton: 19 nu kuví ñuꞌún nu iyó ñáyɨvɨ Cen, ñuꞌún nu iyó ñáyɨvɨ Cenez, ta ñuꞌún nu iyó ñáyɨvɨ Cadmón, 20 ñuꞌún nu iyó ñáyɨvɨ Het, ñuꞌún nu iyó ñáyɨvɨ Férez, ñuꞌún nu iyó ñáyɨvɨ Refa, 21 ñuꞌún nu iyó ñáyɨvɨ Amor, ñuꞌún nu iyó ñáyɨvɨ Canaán, ñuꞌún nu iyó ñáyɨvɨ Gerges, chiꞌin ñuꞌún nu iyó ñáyɨvɨ Jebus. Tandɨꞌɨ ñuꞌún iꞌya kua kuꞌve chi ñáyɨvɨ cha kukuvi taton ―katyí ra chi ra Abram.