―Kachi ta ndaa koun nuu yuꞌu tyi yuꞌu kuví Nyoo, ra iyó tandɨꞌɨ tunyee iñi chi. 2 Ta kua tyiꞌi taꞌin tuꞌun chuꞌun, ta yaꞌa xaan cha kuaꞌa ñáyɨvɨ taton kua kuꞌve ―katyí Nyoo chi ra.

3 Tyikuan ta chikuɨñɨ̱ chɨtɨ ra Abram nu ñuꞌún, ta chaku̱n ra tyaan ra nya nuu ñuꞌún, ta kaꞌán Nyoo chiꞌin ra tyeꞌe kaa:

4 ―Ikan tuꞌun iꞌya kua tyiꞌi taꞌin chuꞌun, kua kuvun sutu kuaꞌa xaan ñáyɨvɨ. 5 Vityin ta ityi nuu, kua kunañun Abraham, tyi tyaa̱ yuꞌu kuꞌva chuun cha kuvun sutu kuaꞌa xaan ñáyɨvɨ. 6 Ta kuaꞌa xaan ñáyɨvɨ taton kua koo saꞌa yuꞌu, ta kuaꞌa xaan ñuu naꞌnu kukuvi ñu, ta yukuan kukita ra kukuvi rey naꞌnu. 7 Ta tuꞌun cha natyiꞌi taꞌin chuꞌun, kua ndoo ndɨꞌi tuꞌun kuan chiꞌin ñáyɨvɨ taton ityi nuu ka. Tuꞌun iꞌya ma ndɨꞌɨ ka maa, vatyi Nyoo ndo kua kuvi yuꞌu tandɨꞌɨ maa kɨvɨ. 8 Ta chuun nakuꞌve tandɨꞌɨ ñuꞌún Canaán nu iyón vityin ta chi ñáyɨvɨ chuun, ta yuꞌu kua kuvi Nyoo ñu.

9 Ta katyí Nyoo chi ra Abraham inga chaꞌa:

―Tyikuan ri maa kua sakuvun tandɨꞌɨ cha katyi chuun chiꞌin tandɨꞌɨ maa ñáyɨvɨ taton 10 cha kukoo ityi nuu ka. Ikan iꞌya kuví tuꞌun cha natyiꞌí taꞌin chiꞌin ndo, vatyi sakuvi ndo: maun, seꞌun, ta tandɨꞌɨ rayɨɨ cha iyó veꞌun, chiꞌin seꞌe musun: Kutaꞌnya chiin ñɨɨ^a nu yɨka chi ra. 11 Ta ikan kuan kuvi tuñi cha sañaꞌá chi tyi na tyiꞌi̱ taꞌan yo tuꞌun, yukuan chaꞌa kuñí chi kaꞌnya ndo chiin ñɨɨ nu yɨka chi ndo. 12 Tandɨꞌɨ maa seꞌe ndo rayɨɨ cha lee nu ku uña kɨvɨ ra, ta kukaꞌnya ndo chiin ñɨɨ nu yɨka chi ra, suri tyikuan kaa sakuvi ndo chi tandɨꞌɨ rayɨɨ cha kukaku veꞌe ndo, ta chi musu cha kusaton chiꞌin xuꞌun. 13 Tandɨꞌɨ ra cha ñima ñáyɨvɨ chuun kuví, ma ndoo ra cha ma taꞌnya ñɨɨ nu yɨka chi ra, ra cha kaku̱ veꞌun, ta ra cha sato̱n chiꞌin xuꞌun. Ta yukuan kuvi tuñi kua kunyaa chi ndo, takuꞌva ma ndɨꞌɨ tuꞌun cha natyiꞌí taꞌin chiꞌin ndo. 14 Ta ra cha ma taꞌnya ñɨɨ nu yɨka chi, ñima ñáyɨvɨ ñuu yuꞌu kuvi ra vatyi ña tyaá yaꞌvi ra tuꞌun cha sandoí chiꞌin ndo ―katyí Nyoo chi ra Abraham.

15 Ta katyí ndɨꞌɨ ra chi ra Abraham:

―Vityin ta ityi nuu ka ma kunañi ka ñasɨꞌun Sarai, soko Sara kua kunañi ña. 16 Ta kua nasoke chi ña, ta kua koo noo seꞌe ndo. Ndicha vaꞌa kua nasoke chi ña, vatyi sɨꞌɨ ñáyɨvɨ ñuu naꞌnu kukuvi chi ña, ta tata seꞌe ndo kukuvi ra rey kuaꞌa ñuu ―katyí Nyoo chi ra Abraham.

17 Tyikuan ta chikuɨñɨ̱ chɨtɨ ra Abraham chiꞌin nuu ra nya nu ñuꞌún, ta chakú yuꞌu ra ta chiká iñi ra: “Cha cientu kuiye, ¿atu kuvi ka koo seꞌi chiꞌin ku Sara, ñasɨꞌi? Tyikuan kaa tuku maa ña, cha chaꞌnu xaan ña, cha kumi xiko uchi kuiya ña”, katyí ra. 18 Tyikuan ta katyí ra chi Nyoo:

―¡Ñana cha vaꞌa tatu kuvi koo ra Ismael ñayɨvɨ̱ chiꞌin cha nasakón chi ra! ―katyí ra.

19 Ta katyí Nyoo chi ra:

―Cha ndicha vatyi ku Sara, ñasɨꞌun, kukoo noo seꞌe ña chuꞌun, ta sakunañi ndo Isaac chi kue. Ta chiꞌin ra kusakucha vaꞌi tuꞌun cha natyiꞌi taꞌin chuꞌun, ta kukuvi chi tuꞌun cha ma ndɨꞌɨ chiꞌin tata ndo, cha yaꞌa̱ kúvi ra. 20 Chiñi̱ tiki cha chiko̱n kuenda ra Ismael, ta kua nasoke chi ra, kua sandukuaꞌi tata ra, ta kukoo uchi uvi taꞌan seꞌe ra ta kukuvi ra nuu, tyi kaꞌnu xaan ñuu kua kuvi tata ra. 21 Soko chiꞌin ra Isaac, seꞌe ndo, ra cha kua sakaku ku Sara chichi cha noo kuiya vityin, chiꞌin ra kuan kusañiꞌin natyiꞌi taꞌin tuꞌun cha natyiꞌi̱ taꞌin chuꞌun ―katyí ra chi ra Abraham.

22 Tyikuan ta kuaꞌan ra cha ndɨꞌɨ ndatuꞌu̱n ra chiꞌin ra Abraham. 23 Suri maa kɨvɨ kuan chaꞌnya̱ ra Abraham ñɨɨ nu yɨka chi ra Ismael, seꞌe ra, ta taꞌnya tuku ñɨɨ tandɨꞌɨ musu ra cha kaku̱ veꞌe ra, ta musu cha sata̱ ra chiꞌin xuꞌun. Tandɨꞌɨ maa ra kasaꞌatyiñó nu kuví veꞌe ra Abraham, chaꞌnya̱ ra ñɨɨ nu yɨka chi ra suri maa kɨvɨ kuan, tari kuꞌva katyí Nyoo chi ra. 24 Ta kumi xiko chaꞌun kumi kuiya ra Abraham kɨvɨ cha taꞌnya̱ ñɨɨ nu yɨka chi ra. 25 Ta uchi uñi kuiya ra Ismael, kɨvɨ chaꞌnya̱ sutu ra ñɨɨ nu yɨka chi ra. 26 Ɨɨn ri kɨvɨ taꞌnya̱ ñɨɨ nu yɨka chi ra Abraham, ta ra Ismael. 27 Ta tandɨꞌɨ rayɨɨ cha kaku̱ veꞌe ra, musu cha sata̱ ra inga ñuu, taꞌnya̱ ñɨɨ nu yɨka chi ra chiꞌin ra Abraham.