Nu katyí Nyoo chi ra Abraham tyi kua kuꞌva ra noo seꞌe ra
18
1 Noo kɨvɨ kuan maa maa ora kuví ta tuvi̱ ra Jehová nuu ra Abraham nu nyitatú ra ityi nukeꞌe yuveꞌe chichi veꞌe nu iyó ra chichi kuꞌu ra Mamre nu iyó kuaꞌa xaan tunyii. 2 Ta nanyeꞌe̱ ra tayukú uñi taꞌan rayɨɨ. Ta kita̱ ra yuveꞌe chisataꞌa̱n ra chi ra, ta chikuɨñɨ̱ chɨtɨ ra nyakua nya taꞌan tyaan ra nu ñuꞌún. 3 Ta katyí ra:―Sutu mañi yuꞌu, tatu ñiꞌín yuꞌu, ra kuví musun, tumañi iñi nuun, chikén chuun vatyi kuatun iꞌya, 4 na kichi nyaka ñu ndutya ta nakatya ndo chaꞌa ndo ta nyitatu ndo chaꞌa yutun iꞌya. 5 Ta nɨɨ ri kua keꞌin suꞌva cha kachi ndo vatyi nakeꞌen ndo tunyee iñi ta kuꞌun ndo. Vaꞌa xaan vatyi yaꞌá ndo nu iyó yuꞌu ra kuví musu ndo ―katyí ra Abraham.
Ta kakatyí ra kuan:
―Vaꞌa ―kakatyí ra chi ra.
6 Tyikuan ta numi ri kɨꞌvɨ̱ ra chichi veꞌe nu ñoꞌón ku Sara, ta katyí ra chi ña:
―Ke̱ꞌen uñi taꞌan kuꞌva yutyi paan cha vaꞌa ka ta savaꞌun paan ―katyí ra chi ña.
7 Ta chinó ra kuaꞌan ra nu kañoꞌón sɨndɨkɨ sana ra, ta nakachi̱ ra noo becerru yutya ta xaꞌan vavaꞌa tɨ. Ta chaꞌa̱ ra chi ra kuví musu ra, ta numi ri sanduvaꞌa̱ ra chi tɨ. 8 Ta keꞌe̱n tuku ra mantequilla chiꞌin sɨkuɨ ta nyayu sandɨkɨ kuan ta chinanyaa̱ ra nu kanyikú ra nu vatɨ chaꞌa yutun kuan. Ta ndoo̱ ra chiꞌin ra nu kachachí ra.
9 Yukuan ta kandaka̱ tuꞌun ra chi ra Abraham:
―¿Nya nyaá ku Sara, ñasɨꞌun?
―Ñoꞌón ña chichi veꞌe ―katyí ra.
10 Tyikuan ta katyí noo ra kuan.
―Chichi cha noo kuiya ta kukichi inga chaꞌa nu nyaún, ta ku Sara, ñasɨꞌun, kukoo noo seꞌe ña―katyí ra.
Ta chiñí ku Sara cha ndatuꞌún ra nu nyaá ña yatyin yuveꞌe kuan ityi chata ra. 11 Ta ra Abraham ta ku Sara cha chaꞌnu xaan ñu, ta cha yaꞌa̱ tyembu cha kuví koo seꞌe ñu. 12 Tyikuan ta kichaꞌa̱ chakú ña ta chika̱ iñi ña: “Vityin cha chaꞌni, ta cha chaꞌnu tuku yɨi ñandɨꞌɨ, ¿atu kuvi ka kusɨɨ kuñi ndi?”, chiká iñi ña.
13 Ta katyí ra Jehová chi ra Abraham:
―¿Ñáá tuꞌun chakú ku Sara?, ta katyí ña: “¿Atu ndicha cha kukoo seꞌi vityin, ta cha chaꞌnu xain?”, katyí ña. 14 ¿Atu iyó cha yaꞌá xaan yɨɨ cha ña kuví sakuvi yuꞌu cha kuvi yuꞌu Nyoo? Chichi cha noo kuiya ta kukichi tiki inga chaꞌa, ta cha nyisó ku Sara noo lee seꞌe ña ―katyí ra kuan.
15 Tyikuan ta ku Sara, nayuꞌví ña ta katyí ña:
―Ña chakú yuꞌu, Sutu mañi yuꞌu ―katyí ña.
Ta katyí ra chi ña:
―Chitó vaꞌi tyi chaku̱n ―katyí ra.
Nu chikán taꞌvi ra Abraham cha kuenda ñuu Sodoma
16 Yaꞌa̱ kuan ta kandukuita̱ ra ta tyaa nuu ra ityi ñuu Sodoma, ta ra Abraham kuaꞌan ra chiꞌin ra kua saña ra chi ra. 17 Ta katyí ra Jehová: “¿Atu tyiꞌí xeꞌi cha kua sakuvi chiꞌin ñuu Sodoma chi ra Abraham? 18 Ma tyiꞌi xeꞌi, vatyi ñáyɨvɨ tata ra kukuvi ñu noo ñuu kaꞌnu xaan, ta cha kuenda ra ta kunasoke tandɨꞌɨ maa ñuu cha iyó sɨkɨ ñuꞌún ñáyɨvɨ. 19 Vatyi yuꞌu chité tyi ra Abraham kua sañaꞌan ra chi seꞌe ra ta chi ñáyɨvɨ tata ra, na kunyikon ñu ityi yuꞌu, ta kua sakuví ra cha vaꞌa ta cha ndaa, ta tyikuan ta sakichi tandɨꞌɨ cha tyai̱ kuꞌva vatyi kuꞌve chi ra”, katyí ra Jehová. 20 Tyikuan ta katyí ra Jehová chi ra Abraham:
―Chite̱ tyi ñáyɨvɨ Sodoma ta ñáyɨvɨ Gomorra kuaꞌa xaan kuatyi sakuví ñu, ta kuaꞌan ndukuaꞌa ka, ta yaꞌa xaan cha kaꞌnu kuatyi ñu. 21 Kua noi ta kua kote tatu ndicha cha kaꞌán ñáyɨvɨ tyi kaꞌnu xaan kuatyi ñuu kuan iyó, kuꞌun maa maa yuꞌu kunyeꞌi ―katyí ra Jehová.
22 Tyikuan ta kuaꞌan koyo uvi taꞌan ra kuan ityi ñuu Sodoma, soko ra Abraham ndoo̱ ra chiꞌin ra Jehová. 23 Ta tuꞌva̱ ra Abraham nuu ra ta katyí ra:
―¿Atu kusanaun chi ñáyɨvɨ vaꞌa chiꞌin ñáyɨvɨ kiñi kaá? 24 Na saꞌa yo tuꞌun tyi iyó uvi xiko uchi taꞌan ñáyɨvɨ vaꞌa ñuu kuan, ¿atu kaña iñun sanaun ñuu kuan? ¿Atu ma saꞌun tukaꞌnu iñi chi ñuu kuan cha kuenda uvi xiko uchi taꞌan ñáyɨvɨ vaꞌa cha iyó kuan? 25 Ma kaña iñun kaꞌñun chi ñáyɨvɨ vaꞌa chiꞌin ñáyɨvɨ kiñi kaa cha iyó kuatyi. ¡Yuꞌu chité vatyi ma kaña iñun sakuvun ɨɨn ri kuꞌva chi ñu vaꞌa ta chiꞌin ñu kiñi kaa! Vatyi maun, ra kuví juee nɨkakaꞌnu ñayɨvɨ̱ kuvún, ¿atu ma sakuvun cha ndaa? ―katyí ra Abraham chi ra Jehová.
26 Tyikuan ta nakaꞌa̱n ra Jehová chiꞌin ra:
―Tatu nañiꞌín uvi xiko uchi ñáyɨvɨ vaꞌa ñuu Sodoma, cha kuenda ñáyɨvɨ kuan, kusaꞌi tukaꞌnu iñi chi tandɨꞌɨ ñáyɨvɨ ñuu kuan.
27 Ta katyí ra Abraham inga chaꞌa:
―Vityin cha kichaꞌa̱ kaꞌín chuꞌun, Sutu mañi yuꞌu, vasɨ yori ra kuví yuꞌu, 28 soko tatu iyó uvi xiko oꞌon ñáyɨvɨ vaꞌa ñuu kuan, ¿atu saꞌun tukaꞌnu iñi chi ñuu kuan cha kuenda uvi xiko oꞌon ñáyɨvɨ vaꞌa kuan?
Ta katyí Nyoo:
―Tatu nañiꞌín yuꞌu uvi xiko oꞌon ñáyɨvɨ vaꞌa, ma sanai ñuu kuan.
29 Ta katyí tuku ra Abrahan inga chaꞌa:
―Tatu iyó uvi xiko ñáyɨvɨ vaꞌa, ¿atu sanaun ñuu kuan?
Ta katyí Nyoo:
―Cha kuenda uvi xiko ñáyɨvɨ vaꞌa cha iyó kuan, ma sanaí ñuu kuan.
30 Ta katyí ra Abraham:
―Sutu mañi yuꞌu, ma kuxaun tatu ndaká tuꞌin chuun inga chaꞌa, ¿tatu nañiꞌun oko uchi taꞌan ñáyɨvɨ vaꞌa ñuu kuan? ―katyí ra.
Ta nakaꞌa̱n Nyoo chiꞌin ra:
―Ma sanai ñuu kuan tatu iyó oko uchi ñáyɨvɨ vaꞌa ñuu kuan ―katyí ra.
31 Ta katyí ra Abraham:
―Vityin cha kichaꞌá kaꞌan yuꞌu chuꞌun, Sutu mañi yuꞌu ¿tatu nañiꞌun oko taꞌan ri ñáyɨvɨ vaꞌa ñuu kuan? ―katyí ra.
Ta katyí Nyoo:
―Ma sanai ñuu kuan cha kuenda oko taꞌan ñáyɨvɨ vaꞌa kuan.
32 Ta sañiꞌín ka ra Abraham kaꞌán ra chiꞌin Nyoo:
―Sutu mañi yuꞌu, ma kuxaun, vityin noo ri ka chaꞌa kua ndaka tuꞌin chuun, ¿tatu nañiꞌun uchi taꞌan ri ñáyɨvɨ vaꞌa ñuu kuan? ―katyí ra.
Ta katyí Nyoo chi ra:
―Ma sanaí ñuu kuan cha kuenda uchi taꞌan ñáyɨvɨ vaꞌa kuan.
33 Yaꞌa̱ kuan ta kuaꞌan ra Jehová cha yaꞌa̱ ndɨꞌɨ ndatuꞌu̱n ra chiꞌin ra Abraham, ta ra Abraham kuanuꞌu̱ ra nya veꞌe ra.