Ra Abraham chiꞌin ra Abimelec
20
1 Ta ra Abraham kita̱ ra kuaꞌan ra ityi Neguev ta chikoo̱ noo ra ñuu Gerar nu kuví xaꞌñi Cades chiꞌin Shur. 2 Ta ra Abraham katyi̱ ra chi ñáyɨvɨ iyó yukuan, tyi kuꞌva ra kuví chi ku Sara, ñasɨꞌɨ ra.Ta ra Abimelec, rey ñuu Gerar kuan, tachi̱ ra tyiño na kukeꞌen chi ku Sara, tyi kuvi ñasɨꞌɨ ra chi ña. 3 Soko kuꞌva cha kumañi ka koo ra chiꞌin ña ta chakuaa kuan kaꞌa̱n Nyoo chiꞌin ra Abimelec chichi ñumaꞌna ta katyí ra: “Vityin kukúvun, vatyi keꞌu̱n chi ñaꞌan kuan, ta ñaꞌan iyó yɨɨ kuví ña”, katyí Nyoo chi ra Abimelec.
4 Soko ra Abimelec ta kava ka ra chiꞌin ña, yukuan kuenda katyí ra chi Nyoo tyeꞌe kaa: “Tata, ¿atu kua kaꞌñun chi noo ra cha ñaꞌri kuatyi iyó? 5 Vatyi maa ra Abraham katyi̱ chii tyi kuꞌva ra kuví chi ña, ta tyikuan katyí tuku maa ña ñandɨꞌɨ: ‘Kuꞌve kuví chi ra’, katyí ña. Yukuan kuenda sakuvi̱ yuꞌu tyeꞌe kaa chiꞌin cha vii ta chiꞌin cha vaꞌa, chiká iñi”, katyí ra.
6 Ta katyí Nyoo chi ra chichi ñumaꞌna kuan: “Chitó vaꞌa mai tyi chiꞌin cha vaꞌa chiká iñun sakuvu̱n tyikuan kaa. Yukuan kuenda ña chaꞌi̱ cha sakuvun kuatyi chiꞌin ña nui. 7 Vityin na̱kuꞌva kuenda chi ña chi yɨɨ ña, tyi profeta kuví ra, ta maa ra kukakan taꞌvi ra cha kuendon ta ma kúvun, tyi tatu ma nakuꞌva kuendon chi ña, kukúvun chiꞌin tandɨꞌɨ ñáyɨvɨ chuun”, katyí Nyoo chi ra.
8 Tyikuan ta ñaꞌan kuii ri ndɨkuita̱ ra Abimelec ta kana̱ ra chi tandɨꞌɨ musu ra ta nakatyi̱ ra ñumaꞌna cha nyeꞌe̱ ra. Ta yaꞌa̱ xaan cha kanayuꞌvi̱ ra. 9 Yaꞌa̱ kuan, ta kana̱ ra Abimelec chi ra Abraham ta katyí ra:
―¿Ñáá cha yaꞌi̱ nuun?, vatyi nduku̱n kuꞌva cha kanakava ndi nu kuatyi kaꞌnu, yuꞌu ta ñuu nu nyaká ñaꞌi. Cha ña taꞌán chi sakuvún chii, ta sakuvu̱n chii. 10 ¿Ñáá cha chiká iñun cha sakuvu̱n tyikuan kaa? ―katyí ra chi ra Abraham.
11 Nakaꞌa̱n ra Abraham ta katyí ra:
―Chiká iñi mai vatyi ñáyɨvɨ iꞌya ñáyɨvɨ ña yuꞌví chi Nyoo kuví ñu, ta kuví kaꞌñi ñu chii cha katyi ñasɨꞌi, chiká iñi. 12 Soko cha ndicha kuví vatyi kuꞌve kuví chi ña. Ɨɨn ri sutu ndi soko sɨɨn sɨɨn sɨꞌɨ ndi, ta keꞌi̱n chi ña. 13 Ta kɨvɨ katyi̱ Nyoo chii tyi kite veꞌe suti, chike̱n tumañi iñi chi ña: “Tandɨꞌɨ maa nu kuꞌun yo, ta kukatyun tyi kuꞌvon kuví chii”, katyi̱ chi ña ―katyí ra Abraham chi ra Abimelec.
14 Tyikuan ta nakuꞌva̱ kuenda ra Abimelec chi ku Sara chi ra Abraham. Ta chaꞌa̱ maa ra Abimelec mbee, ta sɨndɨkɨ, rayɨɨ ta ñusɨꞌɨ vatyi kuvi ñu musu ra. 15 Ta katyí ra:
―Nɨɨ kaꞌnu maa iꞌya kuví ñuꞌín, na̱nduku maun nya nuu taꞌán iñun koun.
16 Yaꞌa̱ kuan ta katyí tuku ra Abimelec chi ku Sara:
―Mil xuꞌun kuichin chaꞌi̱ chi ra kuꞌvon, yukuan kuvi noo cha ndaa nuu ñáyɨvɨ cha iyó chiꞌin ndo, tyi ñaꞌri kuatyun chikoo̱ chiꞌin ―katyí rey kuan chi ku Sara.