Nu kaku̱ ra Isaac
21
1 Ta sakuvi̱ ra Jehová chiꞌin ku Sara tari kuꞌva cha katyi̱ ra chi ña. 2 Ta cha chaꞌnu xaan ra Abraham ta chikoꞌo̱n seꞌe ña chiꞌin ra. Ta ikan tyembu kuan kuví cha katyi̱ Nyoo chi ra tyi koo seꞌe ra. 3 Ta sakunañi̱ ra Abraham Isaac chi cha lee seꞌe ra cha sakaku̱ ku Sara. 4 Ta uña kɨvɨ ra Isaac, seꞌe ra Abraham, ta chaꞌnya̱ ra ñɨɨ nu yɨka chi cha lee kuan, tari katyi̱ Nyoo vatyi sakuvi ra. 5 Ta cientu kuiya ra Abraham kɨvɨ cha kaku̱ ra Isaac, seꞌe ra. 6 Ta katyí ku Sara: “Sakuaku̱ Nyoo chii, ta tyikuan kaa tuku ñáyɨvɨ cha koto tyi iyó seꞌi, sɨɨ xaan kua kuñi ñu chiꞌin”, chiká iñi ña. 7 Ta katyí tuku ña: “Yori maa chika̱ xiñi cha kukoo noo seꞌe ndi, soko chikoo̱ seꞌe ndi vasɨ cha chaꞌnu xaan ra Abraham yɨi”, chiká xiñi ña.8 Ta chaꞌnu ra kueꞌe luꞌlu seꞌe ñu, ta sakoo̱ ra Abraham noo viko kaꞌnu kɨvɨ kita̱ yuꞌu ra Isaac cha chaxín ra.
Nu sakuꞌu̱n ra Abraham chi ku Agar chiꞌin ra Ismael
9 Ta nyeꞌe̱ ku Sara tyi ra Ismael, seꞌe ra Abraham chiꞌin ku Agar, ñaꞌan ñuu Egipto, chakú kueꞌe ra nyeꞌé ra chi ra Isaac, seꞌe ña. 10 Tyikuan ta katyí ña chi ra Abraham: “Ka̱tyi chi ku Agar na sayaꞌa ña chi ña, kuꞌun ña chiꞌin seꞌe ña, vatyi tandɨꞌɨ cha iyó chi yo, chi ra Isaac, seꞌe yo, kutaꞌan chi, ta ñima chi ra Ismael, seꞌe ñaꞌan kuan”, katyí ña.
11 Ta yaꞌa̱ xaan cha ndukuiꞌya kuñi̱ ra Abraham chiꞌin tuꞌun kuan tyi seꞌe ra kuví chi ra luꞌlu kuan. 12 Tyikuan ta katyí Nyoo chi ra Abraham: “Ma kaka iñun cha kuenda ra luꞌlu chiña chiꞌin sɨꞌɨ ra. Sa̱kuvi tandɨꞌɨ cha katyí ku Sara, ñasɨꞌɨ chuun, vatyi cha kuenda ra Isaac, seꞌe ndo, ta kua kita taton cha kua kuiso sɨvun. 13 Tyikuan kaa tuku ra luꞌlu, seꞌe ñaꞌan kuví musu ñasɨꞌun, kua koo tuku kuaꞌa tata ra tyi suri seꞌun kuví chi ra”, katyí Nyoo chi ra Abraham.
14 Tyikuan ta ñaꞌan kuii ri ndɨkuita̱ ra Abraham, ta keꞌe̱n ra paan ta noo kɨyɨ ñɨɨ cha yɨꞌɨ́ ndutya, ta chaꞌa̱ ra chi ku Agar, ta nakuꞌva̱ kuenda ra chi ra Ismael, seꞌe ña, chi ña, ta sakuꞌu̱n ra chi ña. Tyikuan ta kuaꞌan ña chiká noo ndaꞌvi ña ityi nu chiki ndɨɨ nu nañí Beerseba. 15 Ta kuꞌva cha ndɨꞌɨ̱ ndutya cha yɨꞌɨ́ chichi kɨyɨ ñɨɨ cha nyisó ña, ta keꞌe̱n ña chi ra luꞌlu seꞌe ña, ta chaku̱n ña chi ra noo xityin yutun vatɨ, 16 tyi ña kuñi̱ ña nyeꞌe ña nu kúvi ra soko ndutya. Ta kuaꞌan ña ta chikunyaa̱ ña nya sava ri. Yukuan ta kuiꞌya xaan nakuaku̱ chaa ra luꞌlu kuan kuꞌva cha chikunyaa̱ ña yukuan.
17 Ta chiñi̱ Nyoo cha chakú chaa ra. Ta nakaꞌa̱n ángel Nyoo sɨvɨ ku Agar nya ityi andɨvɨ, ta katyí ra: “¿Ñáá cha kuví chuun, Agar? Ma yuꞌvun, vatyi Nyoo chiñi̱ ra cha chakú ra luꞌlu nu katuví ra chiña. 18 Kua̱ꞌan kua nakeꞌen chi ra, ta sanakandon chi ra ta tɨun ndaꞌa ra, tyi kaꞌnu xaan ñuu kua sakuvi chiꞌin tata ra”, katyí Nyoo chi ña.
19 Tyikuan ta sañaꞌa̱ Nyoo noo ndoꞌyo nu kañá ndutya chi ña, ta chaꞌa̱n ña ta sakutu̱ ña kɨyɨ ñɨɨ cha nyisó ña, ta chaꞌa̱ ña ndutya koꞌo ra luꞌlu kuan. 20 Ta tyinyee xaan Nyoo chi ra ta cha yaꞌa̱ chaꞌnu̱ ra kuvi̱ ra noo ra tuchí chiꞌin nduva. 21 Ta satandaꞌa̱ sɨꞌɨ ra chi ra chiꞌin noo ñaꞌan Egipto ta chikoo̱ ra nu chiki ndɨɨ nu nañí Parán.
Nu tyiꞌi̱ taꞌan ra Abimelec tuꞌun chiꞌin ra Abraham
22 Ta suri tyembu kuan, chaꞌa̱n ra rey Abimelec chiꞌin ra Ficol, ra kuví nuu chi sɨndaro kuenda ra, chikaꞌa̱n ra chiꞌin ra Abraham ta katyí ra:
―Chité tyi tyinyeé xaan Nyoo chuun chiꞌin tandɨꞌɨ maa kuꞌva sakuvún. 23 Yukuan kuenda kuñí cha katyun chii vityin ityi nuu Nyoo, tyi ma sakuvun cha ña vaꞌa chiꞌin, ta nɨɨ ri chiꞌin seꞌi ta nɨɨ ri chiꞌin seꞌe ñañi. Tari kundaꞌvi kuñi̱ nyeꞌi̱ chuun, tyikuan kaa kua sakuvun chiꞌin, ta chiꞌin ñáyɨvɨ ñui, nu iyón vityin ―katyí rey kuan.
24 Ta katyí ra Abraham chi rey kuan:
―Tyikuan kaa kua sakuvi ―katyí ra.
25 Ta nakatyi̱ tuku ra Abraham chi ra Abimelec vatyi musu ra katinyaa̱ ra noo yavi ndutya chi ra. 26 Ta nakaꞌa̱n ra Abimelec chiꞌin ra:
―Ña chitó yuꞌu yóó cha sakuvi̱ tyikuan kaa, ta nɨɨ ri yoꞌo ta ña sakoto̱n chii, ta ta kuɨñɨ ka maa yuꞌu tuꞌun iꞌya nya vityin ―katyí rey kuan.
27 Tyikuan ta keꞌe̱n ra Abraham mbee ta sɨndɨkɨ ta chaꞌa̱ ra chi ra Abimelec, ta ndoo̱ nduvi taꞌan ra tuꞌun. 28 Ta tava̱ sɨɨn ra Abraham ucha taꞌan mbee sɨꞌɨ chichi chaku kuan. 29 Ta ndaka̱ tuꞌun ra Abimelec chi ra:
―¿Ñáá cha kuñí chi katyí cha tava̱ sɨun ucha taꞌan mbee chiña? ―katyí ra.
30 Ta katyí ra Abraham:
―Kua keꞌun ucha taꞌan mbee sɨꞌɨ iꞌya, vatyi kua kuvi tɨ cha ndaa tyi yuꞌu chatya̱ yavi ndutya iꞌya ―katyí ra.
31 Cha kuenda kuan chikunañi̱ yukuan Beerseba, vatyi yukuan kachaꞌñi̱ taꞌan ra tuꞌun ra Abraham chiꞌin ra Abimelec.
32 Cha yaꞌa̱ kanatyiꞌi̱ taꞌan ra tuꞌun, ta kuanuꞌu̱ ra Abimelec chiꞌin ra Ficol, ra kuví nuu chi sɨndaro kuenda ra, nya nu ka iyó ra nu kuví ñuꞌún Filistia. 33 Ta nu kuví Beerseba kuan tachi̱ ra Abraham noo yutun tamarisco ta kaꞌa̱n ndaꞌvi ra chiꞌin ra Jehová Nyoo nyito. 34 Ta naꞌan xaan chiyo̱ ra ñuꞌún Filistia kuan.