—Abraham ―katyí ra.

―Maa yuꞌu iꞌya ―katyí ra Abraham.

2 ―Ke̱ꞌen chi ra Isaac, seꞌun cha kuñí xaun chi, ta kuꞌun chiꞌin ra nya ñuꞌún Moriah, ta kuꞌva kuendon chi ra chi yuꞌu nuu kuví xiñi yuku nu kua sañaꞌi chuun ―katyí Nyoo chi ra.

3 Ta ñaꞌan kuii ri cha inga kɨvɨ kuan, ndoyo̱ ra Abraham ta tyiꞌi̱ ra tyayu burru sana ra, ta keꞌe̱n ra uvi taꞌan musu, ta ra Isaac, seꞌe ra, ñandɨꞌɨ, vatyi kuꞌun ra chiꞌin ra. Ta cha yaꞌa̱ chaꞌnya̱ ra nduku cha kukayu nu kua kuꞌva kuenda ra chi Nyoo, ta kuaꞌan koyo ra nu katyí Nyoo chi ra. 4 Ta uñi kɨvɨ kachiká ityi ra. Ta nya sava ka vachí ra ta nanyeꞌé ra Abraham nu katyí Nyoo chi ra. 5 Ta katyí ra chi musu ra:

―Iꞌya ri kuatu ndo chii chiꞌin burru iꞌya tyi kuaꞌin chiꞌin ra kueꞌe iꞌya tyi kua sakaꞌnu ndi chi Nyoo, ta kundichi maa ndi vityin―katyí ra.

6 Tyikuan ta keꞌe̱n ra nduku kuan ta chaꞌa̱ ra kuiso ra Isaac, seꞌe ra, ta maa ra keꞌe̱n ra tyikaa ta ñuꞌu̱n, ta kuaꞌan koyo ra. 7 Tyikuan ta ra Isaac katyí ra chi ra Abraham, sutu ra:

―Tata ―katyí ra.

―¿Ñáá cha kuñún, seꞌi? ―katyí ra chi seꞌe ra.

Ta katyí ra Isaac chi ra:

―Nyisó yo ñuꞌu̱n ta nduku, soko ¿nya nyaá mbee cha kua kaꞌmi yo ta kuꞌva kuenda yo chi Nyoo? ―katyí ra.

8 Ta katyí sutu ra chi ra:

―Kukuꞌva maa Nyoo mbee cha kukaꞌmi yo, seꞌe luꞌli ―katyí ra chi ra.

Ta kuaꞌan koyo ra ɨɨn ri. 9 Ta cha kachaa̱ ra nu katyí Nyoo chi ra, savaꞌa̱ ra noo arta ta tyiso̱ ra nduku sɨkɨ arta kuan. Tyikuan ta chaꞌñi̱ ra ndaꞌa seꞌe ra, ta chaku̱n ra chi ra nuu nduku kuan. 10 Ta kuꞌva cha keꞌe̱n ra tyikaa cha kua kaꞌñi ra chi seꞌe ra, 11 ta chaa xaan nakaꞌa̱n ángel ra Jehová chiꞌin ra ityi andɨvɨ, ta katyí ra:

―¡Abraham, Abraham! ―katyí ra.

Ta katyí ra Abraham:

―¿Ñáá?, Sutu mañi yuꞌu ―katyí ra nakaꞌa̱n ra.

12 ―Ma sakaun ndaꞌun sɨkɨ ra tyivaa chiña, ta ñaꞌri sakuvun chi ra, vatyi cha chité tyi chinó iñun chii, tyi ña katyun cha ma kuꞌvon chi seꞌe mañun chii ―katyí ángel kuan.

13 Tyikuan ta nanyeꞌe̱ ra Abraham ityi chata ra, ta nanyeꞌe̱ ra noo mbee chikón ndɨkɨ tɨ maꞌñu soko yutun iñu kuan. Ta chikeꞌe̱n ra chi tɨ ta chaꞌñi̱ ra chi tɨ, ta chaꞌa̱ kuenda ra chi tɨ tyiño nuu seꞌe ra. 14 Ta ra Abraham sakunañí ra xiñi yuku kuan: “Ra Jehová kuꞌva ra cha chiñuꞌún chi yo”. Yukuan kuenda nañí yuku kuan nyakua nya vityin: “Yuku ra Jehová, nu kuꞌva ra cha chiñuꞌún chi yo”.

15 Ta nakaꞌa̱n ángel kuan chiꞌin ra Abraham ityi andɨvɨ cha ku uvi chaꞌa, 16-17 ta katyí ra:

―Ra Jehová katyí ra tyeꞌe kaa: “Cha kuenda cha kichaꞌu̱n tuꞌun kaꞌín ta ña kuxiu̱n cha kuꞌvon chi seꞌe mañun chii, vityin kaꞌín cha ndicha, ta tyanaꞌin suri chi mai, vatyi kaꞌnu xaan kua nasoke chuun. Tari cha kuaꞌa tiñoo andɨvɨ ta tari cha kuaꞌa ñiyɨtɨ yuꞌu tyañuꞌun, tyikuan kaa cha kuaꞌa taton kua sanakuñe. Ta tandɨꞌɨ maa chaꞌa kua kuvi chasaꞌa taton chi ra xaan iñi chi ra. 18 Ta kua kanasoko ra chi tandɨꞌɨ maa ñuu cha iyó nu ñuꞌún ñayɨvɨ̱, vatyi kichaꞌu̱n tuꞌun kaꞌín”, katyí ra Jehová ―katyí ángel Nyoo chi ra.

19 Ta kuanuꞌun ra Abraham chiꞌin ra Isaac nu kanyikú musu ra, ta kuanuꞌun koyo ra ɨɨn ri nya Beerseba nu ndoo̱ ra iyó ra.

20 Ta cha yaꞌa̱ tuꞌun iꞌya ta sakoto̱ ñu chi ra Abraham vatyi kaku̱ seꞌe ku Milca, ñasɨꞌɨ ra Nacor, yañi ra. 21 Ta seꞌe nuu ra kuví chi ra Uz, ta seꞌe ku uvi ra kuví chi ra Buz, ta seꞌe ku uñi ra kuví chi ra Kemuel, sutu ra Aram. 22 Ta inga ka seꞌe ra Nacor kuví chi ra Quesed, ra Hazo, ra Pildas, ra Jidlaf ta ra Betuel. 23 Sutu ku Rebeca kuví chi ra Betuel. Uña taꞌan ra kakuví seꞌe ku Milca, ñasɨꞌɨ ra Nacor, yañi ra Abraham.

24 Ta chiyo̱ ka seꞌe ra Nacor chiꞌin ku Reúma, ñaꞌan cha kuví tari ñasɨꞌɨ ra, ikan kuví ra iꞌya: ra Teba, ra Gaham, ra Tahas ta ra Maaca.