Nu chiꞌi̱ ku Sara ta nu kɨꞌvɨ̱ ña chichi ñuꞌún
23
1 Ta cientu oko ucha kuiya chiyo̱ ku Sara nu ñuꞌún ñayɨvɨ̱. 2 Ta chiꞌi̱ ña nu kuví Kiriat-arba, nu kuví ñuu Hebrón, cha nyaá suri maa ñuꞌún Canaán kuan. Ta kuiꞌya̱ xaan kuñí añima ra Abraham, ta chaku̱ chaa xaan ra. 3 Ta yaꞌa̱ kuan ta kita̱ ra nu katuví koño ñuꞌún ña ta chaꞌa̱n ra chikaꞌa̱n ra chiꞌin ñáyɨvɨ tata ra Het cha nyaká ñaꞌan ñuꞌún kuan, ta katyí ra:4 ―Xi̱ko ndo suꞌva ñuꞌún nu kukuchi yuꞌu koño ñuꞌún ñasɨꞌi, vatyi ñima ra ñuu iꞌya kuví ta iyé ñuu ndo ―katyí ra.
5 Ta kakatyí ra kakuví seꞌe ra Het kuan chi ra Abraham:
6 ―Nyeꞌe̱ tata, ku̱chi koño ñuꞌún ñasɨꞌun chichi ñaña ndi, nduku maun noo nuu vaꞌa ka kuchun chi ña, ta ni noo ndi ta ma kasɨ ndi nu kukuchun koño ñuꞌún ñasɨꞌun. Tyi kuvún noo ra kuví nuu cha nakachi̱ Nyoo maꞌñu ndi ―kakatyí ra.
7 Tyikuan ta ndukuita̱ ra Abraham ta chaꞌa̱ ra nokumi ta nakañi noo ra xiñi ra nu ñáyɨvɨ tata ra Het.
8 Ta katyí ra:
―Tatu tyikuan kaa kuñí ndo cha kuchi koño ñuꞌún ñasɨꞌi iꞌya, sa̱ꞌa ndo tumañi iñi ka̱ꞌan ndo cha kuende chiꞌin ra Efrón, seꞌe ra Zohar, 9 na xiko ra kava Macpela, cha nya nuu ñuꞌún ra chii, ta tyiyaꞌvi yuꞌu yaꞌvi cha taꞌán chi tyiyaꞌvi, ta tyikuan kaa ta kuví chi mai ñaña yukuan vatyi kuchi chi ñáyɨvɨ chii―katyí ra.
10 Ta nyaá ra Efrón maꞌñu ñáyɨvɨ ra Het kuan, ta nakaꞌa̱n ra chiꞌin ra Abraham nuu tandɨꞌɨ ñáyɨvɨ kuan, ta nuu ñáyɨvɨ cha yaꞌá koyo yuꞌu ñuu kuan, ta katyí ra:
11 ―Vaꞌa, yoꞌo ra cha vaꞌa. Kua kuꞌve ñuꞌún kuan chuun ta kua kuꞌve kava kuan ñandɨꞌɨ. Ta nuu tandɨꞌɨ ñáyɨvɨ ñuu iꞌya kua kuꞌve chuun. Ku̱chi koño ñuꞌún ñasɨꞌun yukuan ―katyí ra.
12 Tyikuan ta nakañi̱ noo ra Abraham xiñi ra nuu ñáyɨvɨ ñuu kuan. 13 Ta katyí ra chi ra Efrón chiꞌin nuu tandɨꞌɨ ñu kuan:
―Tatu kundaa iñun, tya̱a soꞌo tuꞌun kua kaꞌin, kua tyiyaꞌvi mai yaꞌvi ñuꞌún kuan chuun. Sa̱ꞌa tumañi iñi ke̱ꞌen yaꞌvi ñuꞌún kuan. Ta kua kuchi koño ñuꞌún ñasɨꞌi yukuan ―katyí ra chi ra Efrón.
14 Ta nakaꞌa̱n ra Efrón chiꞌin ra Abraham ta katyí ra:
15 ―Nye̱ꞌe xiꞌna, ra cha vaꞌa, kumi cientu xuꞌun kuichin kuví yaꞌvi ñuꞌún kuan, soko ma kaꞌan yo tuꞌun xuꞌun kuan. Kua̱ꞌan kua kuchi koño ñuꞌún ñasɨꞌun yukuan―katyí ra chi ra.
16 Tyikuan ta keꞌe̱n ra Abraham tyiño cha tyiyaꞌvi ra yaꞌvi ñuꞌún kuan nuu tandɨꞌɨ ñáyɨvɨ Het kuan, kumi cientu xuꞌun kuichin chaꞌa̱ ra chi ra Efrón, kuꞌva taꞌán maa chi. 17 Tyikuan kaa sata̱ ra ñuꞌún ra Efrón kuan cha nyaá Macpela, cha nyaá ityi nu kañá ñanyii nya Mamre, ta chiꞌin tandɨꞌɨ yutun cha tayukú nu ñuꞌún kuan ta yavi yuu kuan ñandɨꞌɨ. 18 Ta ndoo̱ ñuꞌún kuan kuví chi chii ra Abraham nuu tandɨꞌɨ ñáyɨvɨ Het ta ñáyɨvɨ cha yaꞌá koyo yuꞌu ñuu kuan. 19 Yaꞌa̱ kuan ta chikuchi̱ ra Abraham koño ñuꞌún ñasɨꞌɨ ra, ku Sara, chichi yavi yuu nu ñuꞌún Macpela, ityi nu kañá ñanyii Mamre, nu kuví Hebrón, ñuꞌún Canaán. 20 Tyikuan ta ndoo̱ ñuꞌún kuan chi ra Abraham, nu xiko̱ tata ra Het chi ra, ta yukuan chikuchi̱ ra chi ndɨ ñasɨꞌɨ ra.