Tata ra Abraham chiꞌin ku Cetura
25
1 Ta ra Abraham keꞌe̱n ra inga ñusɨꞌɨ ta nañí ña Cetura. 2 Ta chikoo̱ seꞌe ra chiꞌin ña ta kanañí ra tyeꞌe kaa: ra Zimram, ra Jocsán, ra Medán, ra Madián, ra Isbac ta ra Súa. 3 Ta seꞌe ra Jocsán kuví chi ra Seba chiꞌin ra Dedán, ta ra Dedán kuan kuví sutu ñáyɨvɨ Asur, ñáyɨvɨ Letus ta ñáyɨvɨ Leum. 4 Ta ra Madián kuví sutu ra Efa, ra Efer, ra Hanoc, ra Abida, ta ra Elda. Tandɨꞌɨ ra iꞌya kakuví seꞌe ku Cetura chiꞌin seꞌe ñañi ña. 5 Soko chi ra Isaac chaꞌa̱ ra Abraham tandɨꞌɨ maa cha tyayɨɨ cha iyó chi ra. 6 Ta sasɨɨ̱n ra chi ra Isaac, ta chi seꞌe ku Agar chiꞌin seꞌe ku Cetura. Ta chaꞌa̱ ra suꞌva cha iyó chi ra chi tandɨꞌɨ ra kuan cha ñɨɨ ri ka cha iyó ra, ta sakuꞌu̱n ra chi ra kuan ityi ñuꞌún nu kañá ñanyii.Nu chiꞌi̱ ra Abraham ta nu kɨꞌvɨ̱ ra chichi ñuꞌún
7 Ta cientu uñi xiko chaꞌun kuiya chiyo̱ ra Abraham nu ñuꞌún ñayɨvɨ̱. 8 Ta cha chaꞌnu xaan ra, ta chiꞌi̱ vaꞌa ra. Ta nduɨɨ̱n ri ra chiꞌin ñáyɨvɨ chi ra, nu kuví tuꞌun chiꞌí. 9 Ta ra Isaac chiꞌin ra Ismael katyiꞌi̱ ra chi ra nu kuví kava kuenda Macpela, nu ñuꞌún ra Efrón, seꞌe ra Zohar, ñáyɨvɨ Het, yatyin Mamre ityi nu kañá ñanyii, 10 ñuꞌún cha sata̱ ra Abraham chi ra kakuví seꞌe ra Het, nu kɨꞌvɨ̱ koño ñuꞌún ku Sara, ta suri yukuan kɨꞌvɨ̱ koño ñuꞌún ra Abraham. 11 Ta cha yaꞌa̱ chiꞌi̱ ra Abraham, nasoko̱ xaan Nyoo chi ra Isaac, seꞌe ra. Ta yatyin nu nyaá ndoꞌyo cha nañí “Ra nyitó ta nyeꞌé ra chii”, yukuan chiyo̱ ra Isaac.
Tata ra Ismael
12 Ikan ra iꞌya kakuví tata ra Ismael, seꞌe ra Abraham chiꞌin ku Agar, ñaꞌan ñuu Egipto, ñaꞌan kuvi̱ musu ku Sara, 13 ikan iꞌya kakuví sɨvɨ ra. Ta kichaꞌa̱ chi chiꞌin sɨvɨ seꞌe nuu ra: ra Nebaiot, yukuan ta vachí ra Cedar, ra Adbeel, ra Mibsan, 14 ra Misma, ra Duma, ra Massa, 15 ra Hadar, ra Tema, ra Jetur, ra Nafis ta ra Cedema. 16 Ikan ra iꞌya kakuví uchi uvi taꞌan seꞌe ra Ismael. Ta ikan iꞌya kakuví sɨvɨ ra, ta sɨvɨ noo noo ñuu ra nu ka iyó ra, vatyi uchi uvi ra kuan kakuví ra nuu chi ñáyɨvɨ chi ra.
17 Ta cientu oko chaꞌun uvi kuiya chiyo̱ ra Ismael, ta chiꞌi̱ ra, ta nduɨɨ̱n ri ra chiꞌin ñáyɨvɨ ñuu ra cha yaꞌa̱ chiꞌi̱ ra. 18 Nya Havila ta nyakua nya Shur chikoo̱ ra ityi nuu Egipto, ityi cha kuaꞌan ityi Asiria. Ta chiꞌi̱ ra nuu tandɨꞌɨ yañi ra.a
Nu kaku̱ ra Jacob ta ra Esaú
19 Ikan ra iꞌya kakuví ñáyɨvɨ tata ra Isaac, seꞌe ra Abraham. 20 Uvi xiko kuiya ra Isaac kɨvɨ tandaꞌa̱ ra chiꞌin ku Rebeca, ñaꞌan kuví kuꞌva ra Labán, seꞌe ra Betuel, ra ñuu Aram, ñuu nu nañí Padan-aram. 21 Ta ñasɨꞌɨ ra Isaac, ña kuví koo seꞌe ña, yukuan kuenda kaꞌa̱n ndaꞌvi ra chiꞌin ra Jehová. Ta tɨɨ̱n kuenda Nyoo nu kaꞌa̱n ra, ta chikoꞌo̱n seꞌe ña. 22 Ta tɨnɨꞌɨ seꞌe ña cha ñoꞌón chichi ña, ta ñiꞌin xaan kakañí taꞌan ndotyin chichi ña, ta chika̱ iñi ña: “Tatu kua sañiꞌin ka tyeꞌe kaa, ñaꞌri ka tuꞌun cha iyé ñayɨvɨ̱.” Tyikuan ta ndaka̱ tuꞌun ña chi ra Jehová, ta katyí ña: “Sutu mañi yuꞌu, ¿ñáá tuꞌun cha taꞌín tyeꞌe kaa?”, katyí ña. 23 Ta katyí ra chi ña:
“Uvi taꞌan ñuu naꞌnu ñoꞌón chichun,
ta ña kuví ku ɨɨn ri uvi ñuu kuan,
kua kusɨɨn ra nya nu ñoꞌón ra chichun,
noo ñuu kuan, ñiꞌin ka kua kuvi cha nuu inga ñuu kuan,
ra cha ñiꞌin ka kua sakuvi ra tyiño nuu ra luꞌlu ka”, katyí Nyoo chi ña.
24 Ta chaa̱ kɨvɨ cha kua kaku seꞌe ku Rebeca, ta tɨnɨꞌɨ seꞌe ña kaku̱. 25 Ta cha lee cha kaku̱ xiꞌna ka, iñi xaan kue ixi ta kuaꞌa ñɨɨ kue, ta sakunañi̱ ñu Esaú chi kue. 26 Yaꞌa̱ kuan ta kaku̱ yañi kue, ta sakunañi̱ ñu Jacob chi kue, tyi yɨꞌɨ́ ndaꞌa kue sɨyɨ yañi kue kuꞌva cha kaku̱ kue. Ta uñi xiko kuiya ra Isaac kɨvɨ kuan.
Nu xiko̱ ra Esaú nyatu cha kuví ra seꞌe nuu
27 Ta kachaꞌnu̱ ra nyiꞌi kuan, ta ra Esaú, vaꞌa xaan chaꞌñí ra kɨtɨ kuꞌu ta saꞌatyiñó ra chichi kuꞌu. Ta ra Jacob, yañi ra, ra iyó cha taxin ri añima kuví ra, ta ndoó ra iyó ra veꞌe ri. 28 Kuñí xaan ka ra Isaac chi ra Esaú tyi taꞌán xaan iñi ra kachi ra cha tuꞌvá ra ñiꞌín nu chiki. Soko ku Rebeca, sɨꞌɨ ra, kuñí xaan ka ña chi ra Jacob.
29 Ta noo chaꞌa̱, ra Jacob satyiꞌyó ra noo nyayu kuaꞌa, ta nachaa̱ ra Esaú, ta chitatú xaan ra cha chaꞌa̱n ra chisaꞌatyiño̱ ra nu chiki, 30 ta katyí ra chi ra Jacob:
―Sa̱ꞌa tumañi iñi, ku̱ꞌva chiin nyayu kuaꞌa cha savaꞌún vatyi kachi, tyi chitatú xain ―katyí ra.
(Yukuan chaꞌa chikunañi̱ tuku ra Esaú Edom tyi Edom kuñí chi katyí “tyaku kuaꞌa”.)
31 Tyikuan ta nakaꞌa̱n ra Jacob chiꞌin ra:
―Na xikon nyatu cha kuvún ra seꞌe nuu chii ―katyí ra.
32 Ta katyí ra Esaú chi ra:
―Nyeꞌé maun tyi yaꞌá xaan cha chisoké, ta nyatu cha taꞌán chi chii, cha kuví seꞌe nuu, ña chiñuꞌún xaan chi chii ―katyí ra.
33 Ta katyí ra Jacob chi ra:
―Tatu ndichon cha kaꞌún, na ndoo vaꞌa yo noo tyiño cha ndicha vityin ―katyí ra chi ra.