Nu nañiꞌi̱n taꞌan ra Jacob chiꞌin ra Esaú
32
1 Ta keꞌe̱n ra Jacob ityi kuaꞌan ra. Ta ityi nu kuaꞌan ra kita̱ koyo ángel Nyoo nuu ra. 2 Ta kuꞌva cha nanyeꞌe̱ ra chi ángel kuan, katyí ra: “Sɨndaro Nyoo kakuví chi ra iꞌya”, katyí ra. Yukuan kuenda sakunañi̱ ra Mahanaim yukuan.3 Sakuꞌu̱n ra Jacob tyiño chiꞌin musu ra na kakusakoto ra chi ra Esaú, yañi ra, vatyi kuchaa ra nu iyó ra nya ñuꞌún Seir nu kuví Edom. 4 Ta tyeꞌe kaa tuꞌun chaꞌa̱ ra chi musu kuan: “Tyeꞌe kaa katyi ndo chi ra Esaú, yañi: ‘Ra Jacob, yañun, chiyo̱ ra kuaꞌa xaan tyembu veꞌe ra Labán, xito ndo. 5 Ta tyayɨɨ xaan ra, kuaꞌa xaan kɨtɨ sana ra iyó: iyó sɨndɨkɨ, burru, mbee, ta iyó musu ra rayɨɨ ta ñusɨꞌɨ. Ta tachi̱ ra chi ndi nuu yoꞌo tata, tyi kuñí ra koto ra tatu saꞌún tukaꞌnu iñi chi ra’, katyi ndo chi ra”, katyí ra Jacob.
6 Cha yaꞌa̱ cha kachaꞌa̱n musu kuan, ta nachaa̱ koyo ra ta kanakuꞌva̱ ra tyiño nu chaꞌa̱n koyo ra chi ra Jacob, ta katyí ra:
―Chaꞌa̱n ndi chinyeꞌe̱ ndi chi ra Esaú, yañun, ta vachí tuku maa ra, vachí sataꞌan ra chuun chiꞌin kumi cientu taꞌan rayɨɨ ―kakatyí ra chi ra.
7 Ta yuꞌví xaan ra kuvi̱ ta ndoo̱ ra chiká iñi ra. Ta nataꞌvi̱ sava ra uvi taꞌan ityi ñáyɨvɨ cha ndɨꞌɨ chiꞌin ra, ta mbee ta sɨndɨkɨ ta camellu sana ra. 8 Ta ndichí xiñi ra tyi tatu kichi ra Esaú sɨkɨ noo ityi ñu, ta kañi taꞌan ra chiꞌin ñu, inga ityi ñu kuví kono ñu. 9 Ta chikán taꞌvi ra Jacob chi Nyoo ta katyí ra: “Yoꞌo Jehová, Nyoo ra Abraham, chii, ta Nyoo ra Isaac, suti, kuvún, ta maun katyu̱n chii na kunuꞌi nya ñui nu iyó ñáyɨvɨ chii ta kua sakuvun cha vaꞌa chiꞌin”, katyu̱n. 10 Ña nañé cha vaꞌa xaan sakuvún chiꞌin. Tyikuan ri maa tyinyeún chii, vatyi chiꞌin nundaꞌa nundɨi yaꞌa̱ save yuvi Jordán iꞌya, noo yutun ri tuvi̱ kɨvɨ kuan, ta vityin nya uvi taꞌan ityi ñáyɨvɨ chii sasɨi̱n. 11 Sa̱ꞌa tumañi iñi ta sa̱kaku chi ndi ndaꞌa ra Esaú, yañi, vatyi yuꞌví koto kaꞌñi ra chii chiꞌin seꞌi ta sɨꞌɨ ndotyin. 12 Katyu̱n chii tyi kua chaa vaꞌi ñui ta katyi̱ tukun tyi kuaꞌa ñáyɨvɨ tata yuꞌu kua koo, tari cha kuaꞌa ñiyɨtɨ yuꞌu tyañuꞌun ta ma kuvi nakaꞌvi ñáyɨvɨ tate cha kua koo, katyu̱n”, katyí ra chi Nyoo.
13 Ta ndoo̱ ra kixi̱ ra chakuaa yukuan. Ta nakachi̱ ra cha kua kuꞌva maa ra chi yañi ra, ra Esaú. 14 Sasɨɨ̱n ra uvi cientu ndixiꞌyu sɨꞌɨ, ta oko taꞌan kɨtɨ yɨɨ, uvi cientu mbee sɨꞌɨ ta oko mbee yɨɨ. 15 Oko uchi camellu kɨtɨ nyaká chiꞌin seꞌe, uvi xiko sɨndɨkɨ sɨꞌɨ ta uchi taꞌan toro, oko taꞌan burru sɨꞌɨ ta uchi burru yɨɨ sasɨɨ̱n ra. 16 Ta nakuꞌva̱ kuenda ra chi ra kakuví musu ra noo noo ityi tɨ ta katyí ra chi ra:
―Kuaꞌan ndo ityi nui ta nyasava ri kuꞌun ndo chiꞌin taꞌan taꞌan ityi kɨtɨ iꞌya ―katyí ra chi ra musu ra.
17 Ta katyí ra chi ra cha sakuꞌu̱n ra cha xiꞌna ri:
―Tatu taꞌun chi ra yañi, ra Esaú, ta ndaká tuꞌun ra chuun: “¿Nyá kuaꞌun? ¿Yóó chi kuví kɨtɨ chiña? ¿Ta yóó ra kuví chitoꞌun?”, katyi ra. 18 Ta katyun chi ra: “Chi ra Jacob musun kuví chi tɨ, ta tachi̱ ra vatyi kuꞌva maa ndi chi tɨ chuun, cha kuvún ra Esaú, yañi ra, ta cha vachí tuku maa ra ityi chata ka”, katyun chi ra ―katyí ra Jacob chi musu kuan.
19 Ta suri tyikuan kaa chaꞌa̱ kuenda ra chi ra ku uvi, ra ku uñi ta chi tandɨꞌɨ ra kuaꞌan koyo chata noo noo ityi kɨtɨ kuan. Ta katyí ra:
―Tyikuan kaa katyi tuku ndo chi ra Esaú, kuꞌva cha taꞌan ndo chi ra. 20 Ta katyi tuku ndo chi ra: “Vachí ra Jacob, musun, ityi chata ndi”, katyi ndo ―katyí ra Jacob chi musu ra.
Tyikuan kaa katyí ra vatyi chiká iñi ra: “Kusandukame iñi ra chiꞌin cha kua tachi ityi nuu ka, cha kuꞌva mai chi ra, tyikuan ta kunatɨɨn kuenda vaꞌa ra chii kuꞌva cha kunañiꞌin taꞌan ndi”, chiká iñi ra. 21 Xiꞌna ka tachi̱ ra cha kua kuꞌva maa ra chi yañi ra ityi nuu ka, ta ndoo̱ ra kixi̱ ra nu chikuɨñɨ̱ ra chiꞌin ñáyɨvɨ chi ra.
Nu tɨɨ̱n taꞌan ra Jacob chiꞌin ángel Nyoo nya nu kuví Peniel
22 Ta suri maa chakuaa kuan ndukuita̱ ra Jacob, ta keꞌe̱n ra chi ku Raquel, chi ku Lea, chi ku Bilha, ta chi ku Zilpa, ta chi ndɨ uchi ɨɨn taꞌan seꞌe ra, ta sayaꞌa̱ ra chi ñu nu yaxin yuvi ndutya cha nañí Jaboc. 23 Sayaꞌa̱ ra chi ñu chiꞌin tandɨꞌɨ maa cha chii ra yuvi ndutya kuan. 24 Tyikuan ta ndoo̱ maa ri maa ra. Ta kichaꞌa̱ kañí taꞌan noo rayɨɨ chiꞌin ra, nyakua nya kundichin. 25 Ta nyeꞌé rayɨɨ kuan vatyi ña kuñiꞌín ra chi ra Jacob, tyikuan ta kañi̱ ra ndaꞌa ra nu yɨꞌɨ́ taꞌan sɨꞌɨn ra Jacob, ta yaꞌa̱ taꞌan sɨꞌɨn ra. 26 Ta katyí ra chi ra Jacob:
―Sa̱ña chii vatyi cha kua kundichin ―katyí ra.
Ta nakaꞌa̱n ra Jacob, ta katyí ra:
―Ma sañe chuun tatu ma nasokon chii ―katyí ra.
27 Ta ndaka̱ tuꞌun rayɨɨ kuan chi ra:
―¿Ñáá nañún?
Ta nakaꞌán ra:
―Nañí yuꞌu Jacob ―katyí ra chi ra.
28 Ta katyí rayɨɨ kuan chi ra:
―Ñima ka Jacob kunañun vityin, tyi kañi̱ taꞌun chiꞌin Nyoo, ta chiꞌin rayɨɨ, ta kuvi̱ chasaꞌun, yukuan kuenda kunañun Israel ―katyí ra kuan chi ra.
29 Ta ndaka̱ tuꞌun ra Jacob chi rayɨɨ kuan:
―¿Ñáá nañún?
Ta katyí ra kuan chi ra:
―¿Ñáá kuenda ndaká tuꞌun sɨvi? ―katyí ra.
Ta yukuan nasoko̱ rayɨɨ kuan chi ra.
30 Ta Peniel sakunañi̱ ra Jacob yukuan. Vatyi katyí ra: “Nyeꞌi̱ chi Nyoo chiꞌin chɨtɨ nui ta ña chiꞌi̱”, katyí ra.