―Tata, kuñí cha kuꞌun kukakon chi ku Dina, tyi kuñí tandaꞌi chiꞌin ña ―katyí ra chi sutu ra.

5 Chito̱ ra Jacob tyi cha yaꞌa̱ satɨvɨ̱ ra Siquem chi ku Dina, soko ña kaꞌa̱n maa ra tuꞌun cha numi ri tyi seꞌe ra kanyikú ra nu chiki saꞌá kuenda ra mbee. Ta nachaa̱ koyo ra ta sakoto̱ ra chi ra cha kuvi̱ chi ku Dina, kuꞌva ra. 6 Ta kuaꞌan ra Hamor, sutu ra Siquem, kua kaꞌan ra chiꞌin ra Jacob, sutu ña.

7 Soko ra kakuví kuꞌva ku Dina xaan xaan kakuñí ra cha kachito̱ ra cha satɨvɨ̱ ra Siquem chi kuꞌva ra. Ña vaꞌa maa cha sakuvi̱ ra kuan tyikuan kaa tyi kaꞌnu xaan tɨkaꞌan nuu kuví kuan cha kuenda ñáyɨvɨ chii ña. 8 Soko ndatuꞌu̱n ra Hamor chiꞌin ra kuꞌva ña, ta katyí ra:

―Chakú ndaꞌvi nuu ndo, ku̱ꞌva ndo chi ña, na tandaꞌa ña chiꞌin ra Siquem, seꞌi, tyi yaꞌa xaan cha kuñí ra chi ña. 9 Ta tyikuan kaa ta kuvi ndo ñáyɨvɨ chi ndi, ta nyuꞌu kuvi tandaꞌa ndi chiꞌin seꞌe ndo ta nyoꞌo kuvi tandaꞌa ndo chiꞌin seꞌe ndi. 10 Ndo̱o ndo koo ndo ñuu iꞌya chiꞌin ndi, nuña xaan nu ñuꞌún iꞌya, sa̱ꞌatyiño ndo ta sa̱ta ndo ñuꞌún koo ndo ―katyí ra Hamor chi kuꞌva ña.

11 Ta kaꞌán ra Siquem chiꞌin sutu ku Dina ta chiꞌin ra kuꞌva ña, ta katyí ra:

―Sa̱ꞌa ndo tumañi iñi ta na keꞌen ndo tuꞌun kaꞌán ndi. Kuꞌva maa yuꞌu ñáá cha kakan ndo chii. 12 Ñaꞌri saꞌa, vasɨ sukun ka yaꞌvi cha kakan ndo, ta ñima ka cha taꞌán chi, kuꞌve yoso kakan ndo chii, soko kuꞌva ndo chi ña chii vatyi kuvi ñasɨꞌi chi ña ―katyí ra.

13 Soko cha katyi cha satɨvɨ̱ ra Siquem chi ku Dina, ra kuꞌva ña, kasandavi̱ ñaꞌan ra chi ra Siquem ta chi sutu ra. 14 Ta kakatyí ra:

―Ma kuvi kuꞌva ndi tandaꞌa taꞌan ndi chiꞌin noo ra cha ñima ñuu ndi kuví, vatyi tɨkaꞌan nuu kuví chi ndi. 15 Soko ndoo ndi vaꞌa tatu sakuvi ndo tyeꞌe kaa: ka̱ꞌnya ndo ñɨɨ nu yɨka tandɨꞌɨ rayɨɨ ñuu ndo tyi tyikuan kaa iyó maa ndi. 16 Tyikuan ta kuvi tandaꞌa seꞌe sɨꞌɨ ndi chiꞌin seꞌe ndo, ta kuvi tandaꞌa tuku maa ndi chiꞌin seꞌe sɨꞌɨ ndo; ta koo yo chiꞌin cha vaꞌa, ta noo ri ñuu kua kuvi yo. 17 Soko tatu ña kuñí ndo sakuvi ndo tyikuan kaa, kua keꞌen ndi chi ñaꞌan kuꞌva ndi ta kuꞌun ndi ―kakatyí ra.

18 Ndoo̱ ra Hamor ta ra Siquem, seꞌe ra, vaꞌa kuꞌva kakaꞌa̱n ra kuan. 19 Ña nyatú ka ra tyivaa kuan, ta sakuvi̱ ra kuꞌva kakatyí ra kuan chi ra, tyi yaꞌa xaan cha kuñí ra chi ku Dina. Ta tandɨꞌɨ ñáyɨvɨ ñuu ra Siquem saꞌá ka ñu ñáyɨvɨ chi maa ra ta ñima ka tandɨꞌɨ ka ñáyɨvɨ chi ra. 20 Yukuan chaꞌa kuaꞌan ra tyivaa kuan chiꞌin sutu ra nya yuveꞌe kaꞌnu ñuu kuan, kua sakoto ra chi tandɨꞌɨ rayɨɨ ñuu kuan ta katyí ra chi ra kuan:

21 ―Ra vaꞌa kakuví ra iꞌya vatyi ñaꞌri tɨsɨꞌɨ kuñí ra chiꞌin yo, ta kua koo ra ñuu yo ta kusaꞌatyiño ra vatyi keꞌen ñuꞌún iꞌya ta yoo kua keꞌen yo chi ñu seꞌe ra vatyi kuvi ñasɨꞌɨ yo ta kuꞌva tuku maa yo chi ñu seꞌe yo chi ra. Nye̱ꞌe xiꞌna ndo, ra Jacob chiꞌin ñáyɨvɨ chi ra, kuví ra noo ra vaꞌa yɨꞌɨ́ iñi nyeꞌe chi yo, kua koo ra ta kua saꞌatyiño ra ñuu yo. Vaꞌa tyi iyó ñuꞌún nu kua saꞌatyiño ra, ta inga tuꞌun tyi kuvi tandaꞌa seꞌe yo chiꞌin seꞌe ra. 22 Ta kandoó ra vaꞌa cha kakuví ra noo ri ñuu chiꞌin yo soko tatu sakuví yo tari kuꞌva cha kakuñí ra, na taꞌnya ñɨɨ nu yɨka chi tandɨꞌɨ maa yoo nu kuví yo rayɨɨ tari kuꞌva ka iyó maa ra. 23 Tatu sakuví yo cha kakatyí ra, kakoo ra ñuu yo, ta tandɨꞌɨ ndaꞌa tyiño ra ta kɨtɨ sana ra chii maa yo kua kuvi kuan ―katyí ra.

24 Ta tandɨꞌɨ ra ñuu kuan nyakua nya ra kuatyi cha chaꞌun uñi kuiya ta na kachi taꞌan tuꞌun kaꞌa̱n ra Hamor ta ra Siquem, seꞌe ra, ta kachaꞌnya̱ ra ñɨɨ nu yɨka chi ra. 25 Soko nu ku uñi kɨvɨ, kɨꞌvɨ cha uꞌvi vavaꞌa chi ra, uvi taꞌan seꞌe ra Jacob: ra Simeón ta ra Leví, ra kakuví kuꞌva ku Dina, kakeꞌe̱n ra mityi ra ta chaꞌa̱n koyo ra sɨkɨ ñuu kuan, ta sana iñi ñuu kuan ta kachaꞌñi̱ ra chi tandɨꞌɨ rayɨɨ ñuu kuan. 26 Ta kachaꞌñi̱ ra chi ra Hamor ta chi seꞌe ra, ra Siquem, chiꞌin mityi, ta kakeꞌe̱n ra chi ku Dina nu nyaá ña veꞌe ra Siquem, ta kuaꞌan koyo ra. 27 Yaꞌa̱ kuan, ta inga ka seꞌe ra Jacob, chaa̱ koyo ra nu kayukú ndɨyɨ kuan, ta kasuꞌu̱ ra tandɨꞌɨ maa cha iyó ñuu kuan, cha katyi cha satɨvɨ̱ ra Siquem chi kuꞌva ra. 28 Kakeꞌe̱n ra mbee, sɨndɨkɨ, burru, ta tandɨꞌɨ cha iyó chichi ñuu kuan ta cha iyó chichi kuꞌu. 29 Kasuꞌu̱ ra tandɨꞌɨ maa cha iyó chichi veꞌe ñáyɨvɨ kuan, kakeꞌe̱n ra tandɨꞌɨ maa ra kuatyaa nyiꞌi ta ñusɨꞌɨ, ta kuaꞌan koyo chiꞌin ra. 30 Ta katyí ra Jacob chi ra Simeón ta ra Leví:

―Cha kuaꞌa xaan tɨsɨꞌɨ chaꞌa̱ ndo chii. Ñáyɨvɨ ñuu Canaán ta ñáyɨvɨ Férez, kua kutasɨ kuñi ra kanyeꞌé ra chi yo. Ta ña kuaꞌa yo, ta ñáyɨvɨ ñuu kuan kukichi ra sɨkɨ yo, ta kua kaꞌñi ra chi yo chiꞌin ñáyɨvɨ chi yo ―katyí ra Jacob chi ra Simeón ta ra Leví.

31 Ta kanakaꞌa̱n ra ta kakatyí ra:

―Soko ña vaꞌa maa cha sakuvi̱ ra chiꞌin kuꞌva ndi tyikuan kaa, ¿atu ñaꞌan chiká noo maa kuví ña, nyeꞌé ra? ―kakatyí ra.