Nu nasoko̱ Nyoo chi ra Jacob nya Bet-el
35
1 Ta kaꞌa̱n Nyoo chiꞌin ra Jacob ta katyí ra: “Ndu̱kuita, ta kua̱ꞌan nya Bet-el, ta ndoun yukuan, ta kuñí cha savaꞌun noo arta cha kuende tyi yukuan tuvi̱ nuun kɨvɨ cha chika̱ chinón chi ra Esaú, yañun”, katyí Nyoo chi ra Jacob. 2 Tyikuan ta katyí ra Jacob chi ñáyɨvɨ chi ra ta tandɨꞌɨ ñáyɨvɨ cha kuaꞌan chiꞌin ra:―Sa̱kuita ndo xitoꞌyo cha iyó chi ndo. Ku̱tyi ndo ta na̱sama ndo saꞌma ndo. 3 Ta ndɨkuita ndo ta koꞌo ndo nya Bet-el, tyi yukuan kua savaꞌi noo arta chi Nyoo ra tyinyee̱ chii kɨvɨ ñoꞌí chichi tɨndoꞌo, ta saꞌá kuenda ra chii tandɨꞌɨ ri ityi nu chiká noi ―katyí ra chi ñu.
4 Ta nakuꞌva̱ ñu tandɨꞌɨ xitoꞌyo cha kumí ñu ta cha yɨꞌɨ́ soꞌo ñu chi ra Jacob, ta tyiꞌi̱ ra tandɨꞌɨ kuan chichi ñuꞌún chaꞌa noo tunyii cha nyaá yatyin ñuu Siquem. 5 Tyikuan ta kita̱ ñu kuaꞌan ñu, ta ñáyɨvɨ ñuu cha nyikú yatyin ri kuan, ña chinyiko̱n ñu chi ñu tyi kɨꞌvɨ̱ cha yuꞌví chi ñu, saꞌa̱ Nyoo.
6 Ta chaa̱ ra Jacob chiꞌin tandɨꞌɨ ñáyɨvɨ kuaꞌan chiꞌin ra ñuu Luz, ta nañí tuku ñuu kuan Bet-el, nu kuví kuenda ñuꞌún Canaán. 7 Savaꞌa̱ ra noo arta yukuan chi Nyoo, ta sakunañi̱ ra yukuan El-Bet-el, vatyi yukuan kuví nuu tuvi̱ Nyoo nuu ra kɨvɨ cha chika̱ chinó ra chi yañi ra. 8 Ta chiꞌi̱ ku Débora, ñaꞌan cha saꞌakuenda̱ chi ku Rebeca, ta kɨꞌvɨ̱ ña chichi ñuꞌún yatyin Bet-el nu nanyaá noo tunyii. Ta chikunañi̱ yukuan Alón-bakut, ta kuñí chi katyí “Yutun tukuiꞌya iñi”.
9 Ta tuvi̱ Nyoo nuu ra Jacob inga chaꞌa cha kuandichi̱ ra cha chaꞌa̱n ra Padan-aram, ta nasoko̱ ra chi ra. 10 Ta katyí ra chi ra:
“Jacob nañún soko ma kunañi kon Jacob,
vatyi Israel kunañun vityin.”
“Yuꞌu kuví Nyoo, ra iyó tandɨꞌɨ tunyee iñi chi, ta ñaꞌri cha yɨɨ chi yuꞌu,
na koo kuaꞌa seꞌun ta na nakuña kuaꞌa taton.
Kua kuvun noo ñuu kaꞌnu ta kuaꞌa ka ñuu kua kuvi taton,
ta chichi taton kua kita koyo ra kua kuvi rey.
12 Ta ñuꞌún iꞌya chaꞌi̱ chi ra Abraham ta chi ra Isaac,
ta vityin chaꞌá ndɨꞌi ñuꞌún iꞌya chuun,
ta cha yaꞌa̱ kúvun, kua nakuꞌve kuan chi ñáyɨvɨ taton”, katyi̱ Nyoo chi ra kɨvɨ kuan.
13 Ta cha yaꞌa̱ kanyaꞌa̱ Nyoo nu ndatuꞌu̱n ra chiꞌin ra, 14 ta keꞌe̱n ra noo yuu ta nakananyaa̱ ra na kuvi chi cha ndaa tyi yukuan kaꞌa̱n Nyoo chiꞌin ra, ta choso̱ ra acetye ta vinu sɨkɨ yuu kuan. 15 Ta sakunañí ra Bet-el tyi yukuan kaꞌa̱n Nyoo chiꞌin ra.
Nu chiꞌi̱ ku Raquel
16 Yaꞌa̱ kuan, ta kita ñu Bet-el, ta kumañi ka chaa ñu nya Efrata kichaꞌa̱ kɨꞌvɨ cha uꞌvi chi ku Raquel ta kaku̱ seꞌe ña sava ityi ta nyeꞌe̱ xaan ña tɨndoꞌo. 17 Ta cha nɨɨ ri ka cha nyeꞌé xaan ña tɨndoꞌo, ñaꞌan cha nyeꞌé chi ña katyí ña: “Ma yuꞌvun vatyi cha sakaku̱ tukun inga ra lee seꞌun iꞌya”, katyí ña. 18 Ta kuꞌva cha kua kúvi ku Raquel ta katyí ña:
―Benoni kua kunani seꞌi ―katyí ña.
Soko nasama̱ ra Jacob sɨvɨ cha lee kuan ta sakunañi̱ ra Benjamin chi kue.
19 Yukuan kuví nu chiꞌi̱ ku Raquel, ta kɨꞌvɨ̱ ña chichi ñuꞌún yuꞌu ityi nu kuaꞌan nya Efrata, nu kuví Belén nyakua nya vityin. 20 Ta nu ñaña kuan chinanyaa̱ ra Jacob noo nyakaa yuu ta kuví nyaka kuan noo cha ndaa nyakua nya vityin, tyi yukuan kɨꞌvɨ̱ ku Raquel chichi ñuꞌún.
21 Yukuan kita̱ ra ta kuaꞌan ra chiꞌin tandɨꞌɨ ñáyɨvɨ chi ra, ta yatyin nu nyaá nyaka Migdal-edar, yukuan chikoo̱ ra. 22 Ta chichi cha iyó ñu yukuan, kuxaán xaan ra Jacob vatyi chito̱ ra cha sakuvi̱ ra Rubén, seꞌe ra, tyi chaꞌa̱n ra chikusu̱ ra chiꞌin ku Bilha, ña cha kuví tari ñasɨꞌɨ sutu ra.
Ra kakuví seꞌe ra Jacob
Ta uchi uvi taꞌan seꞌe ra Israel chikoo̱. 23 Seꞌe ra Jacob chiꞌin ku Lea kuví ra Rubén, seꞌe nuu ña, ra Simeón, ra Leví, ra Judá, ra Isacar ta ra Zabulón. 24 Ta seꞌe ra chiꞌin ku Raquel, ikan kuví ra José chiꞌin ra Benjamin. 25 Ta seꞌe ra chiꞌin ku Bilha, musu ku Raquel, ikan kuví ra Dan chiꞌin ra Neftalí. 26 Ta seꞌe ra chiꞌin ku Zilpa, musu ku Lea, ikan kuví ra Gad chiꞌin ra Aser. Ikan ra iꞌya kakuví seꞌe ra Jacob cha kaku̱ nya Padan-aram.
Nu chiꞌi̱ ra Isaac
27 Ta chaꞌa̱n ra Jacob chinyeꞌe̱ ra chi ra Isaac, sutu ra, nya Mamre, nya ñuu Arba nu kuví Hebrón, nu chiyo̱ chii ra ta sutu ra. 28-29 Cientu kumi xiko kuiya chiyo̱ ra Isaac ta chiꞌi̱ ra. Yaꞌa̱ xaan cha chaꞌnu ra ta kañi xaan kuiya chiyo̱ ra, ta chiꞌi̱ ra, ta nduɨɨ̱n ri ra chiꞌin ñáyɨvɨ chii ra nu kuví tuꞌun chiꞌí. Ta nɨnduvi seꞌe ra, ra Esaú ta ra Jacob, kachikuchi̱ ra chi sutu ra.