6 Ta ra Esaú keꞌe̱n ra tandɨꞌɨ ñáyɨvɨ chi ra ta kuaꞌan ra inga ñuu. Kuaꞌan koyo nɨɨ nduñi ñasɨꞌɨ ra ta tandɨꞌɨ seꞌe ra, tandɨꞌɨ ñáyɨvɨ kanyikú veꞌe ra, kɨtɨ sana ra, ta tandɨꞌɨ cha ñiꞌi̱n ra Canaán kuan kuaꞌan chiꞌin ra. Ta tyikuan kaa kusɨɨ̱n ra chiꞌin ra Jacob, yañi ra. 7 Tyikuan kaa sakuvi̱ ra tyi ña kuví ka kakoo ra ɨɨn ri vatyi ña ñiꞌin ka kuꞌu kakachi kɨtɨ sana ra tyi kuaꞌa xaan kɨtɨ sana ra ka iyó. 8 Yukuan kuenda kuaꞌan ra Esaú, ra nañí tuku Edom, kua koo ra nya yuku Seir.

9 Ikan ra iꞌya kakuví tata ra Esaú, ra kuví sutu ñáyɨvɨ Edom cha kachiyo̱ ra yuku Seir. 10 Ta ikan iꞌya kakuví sɨvɨ seꞌe ra Esaú. Ta seꞌe ra Esaú chiꞌin ku Ada kuví ra Elifaz, ta seꞌe ra chiꞌin ku Basemat kuví ra Reuel. 11 Ta seꞌe ra Elifaz chiꞌin ñasɨꞌɨ vaꞌa maa ra kuví ra Temán, ra Omar, ra Zefo, ra Gatam, ra Cenaz. 12 Ta seꞌe ra Elifaz chiꞌin inga ñaꞌan cha nañí Timna, kuví ra Amalec. Ta ikan ra iꞌya kakuví tata ku Ada, ñasɨꞌɨ ra Esaú. 13 Ta seꞌe ra Reuel kuví ra Nahat, ra Zera, ra Sama ta ra Miza. Ikan ra iꞌya kakuví tata ra Esaú chiꞌin ku Basemat. 14 Ta seꞌe ra Esaú chiꞌin ku Aholibama, kuví ra Jeús, ra Jaalam ta ra Coré. Ku Aholibama kuví seꞌe ra Aná, ta seꞌe ñañi ra Zibeón,

15-16 Ta ra kakuví nuu chiꞌin tata ra Esaú nu ka iyó ra ñuꞌún Edom kuví seꞌe ra Elifaz, ra kuví seꞌe nuu ra Esaú. Ikan ra kakuví ra Temán, ra Omar, ra Zefo, ra Cenaz, ra Coré, ra Gatam, ta ra Amalec. Ikan ra iꞌya kakuví seꞌe ñañi ku Ada. 17 Ta inga ra kakuví nuu chiꞌin tata ra Esaú, nu iyó ra ñuꞌún Edom, kakuví seꞌe ra Reuel, inga seꞌe ra Esaú. Ikan iꞌya kakuví sɨvɨ ra: ra Nahat, ra Zera, ra Sama ta ra Miza. Ikan ra iꞌya kakuví seꞌe ñañi ra Esaú chiꞌin ku Basemat. 18 Ta kakuví tuku ra iꞌya nuu chiꞌin tata ra Esaú nya ñuꞌún Edom: ra Jeús, ra Jaalam ta ra Coré, kakuví ra seꞌe ra Esaú chiꞌin ku Aholibama seꞌe ra Aná. 19 Ikan ra iꞌya kakuví seꞌe ra Esaú, chiꞌin seꞌe ñañi ra, ta kakuví ra nuu chiꞌin tata ra Esaú ra nañi tuku Edom.

20-21 Ta seꞌe ra Seir, ra iyó maa ñuu nu chaa̱ ra Esaú, ikan kuví ra iꞌya: ra Lotán, ra Sobal, ra Zibeón, ra Aná, ra Disón, ra Ezer, ta ra Disán. Ta ikan ra iꞌya kakuví nuu kuenda ñáyɨvɨ tata ra Hor nu kuví ñuꞌún Edom. 22 Ta seꞌe ra Lotán kuví chi ra Hori, ta ra Hemam. Ta kuꞌva ra Lotán kuvi chi ku Timna. 23 Ta seꞌe ra Sobal kuví chi ra Alván, ra Manahat, ra Ebal, ra Sefo, ta ra Onam. 24 Seꞌe ra Zibeón kuví chi ra Aja, ta ra Aná. Ta ra Aná kuví ra nañiꞌi̱n nu iyó ndoꞌyo nu chiki ndɨɨ kɨvɨ saꞌá kuenda ra burru sana sutu ra, ra Zibeón. 25 Ta seꞌe ra Aná kuví chi ra Disón ta ku Aholibama, seꞌe ra Aná. 26 Ta seꞌe ra Disón kuví chi ra Hemdán, ra Esbán, ra Itrán ta ra Querán. 27 Ta seꞌe ra Ezer kuví chi ra Bilhán, ra Zaaván ta ra Acán. 28 Ta seꞌe ra Disán kuví chi ra Uz ta chi ra Arán.

29-30 Ta tyikuan kaa ta ra kakuví nuu chi ñáyɨvɨ tata ra Hor, ikan kuví ra Lotán, ra Sobal, ra Zibeón, ra Aná, ra Disón, ra Ezer, ra Disán, ikan ra iꞌya kakuví nuu, ta kayɨꞌɨ́ ndaꞌa ra chi ñáyɨvɨ tata ra Hor nu kuví ñuꞌún Seir.

31 Ikan ra iꞌya ra kakuvi̱ rey cha yɨꞌɨ̱ ndaꞌa nu kuví ñuꞌún Edom cha kumañi ka koo rey kuenda tata ra Israel. 32 Ra Bela, seꞌe ra Beor, kuvi̱ ra rey ñuꞌún Edom ta sɨvɨ ñuu ra kuvi̱ Dinaba. 33 Ta chiꞌi̱ ra Bela, ta ra Jobab, seꞌe ra Zera, nanduvi̱ ra rey, ta ñuu ra Jobab kuvi Bosra. 34 Chiꞌi̱ ra Jobab, ta ra Husam, ra ñuꞌún Temán, nanduvi̱ ra rey. 35 Ta chiꞌi̱ ra Husam, ta ra Hadad, seꞌe ra Bedad, nanduvi̱ ra rey. Ra Hadad kuvi̱ ra cha kuvi̱ chasaꞌa chi ñáyɨvɨ Madián nu kuví ñuꞌún Moab. Ta Avit nañí ñuu ra Hadad. 36 Chiꞌi̱ ra Hadad, ta tyiño nuu ra, ra Samla, ra ñuu Masreca, nanduvi̱ ra rey. 37 Ta chiꞌi̱ ra Samla, ra Saúl, ra ñuu Rehobot, ñuu cha nyaá yatyin yuvi Éufrates, nanduvi̱ ra rey. 38 Cha yaꞌa̱ chiꞌi̱ ra Saúl, ra Baal-hanán, seꞌe ra Acbor, nanduvi̱ rey. 39 Chiꞌi̱ ra Baal-hanán, seꞌe ra Acbor, tyikuan ta kɨꞌvɨ̱ ra Hadar kuvi̱ ra rey, ta Pau nañí ñuu ra, ta sɨvɨ ñasɨꞌɨ ra kuví Mehetabel, seꞌe ra Matred ta seꞌe ñañi ra Mezaab.

40-43 Ta tyikuan kaa ikan iꞌya kuví sɨvɨ ra kakuví nuu chi tata ra Esaú, nu iyó ra ñuꞌún Edom ta kanañí ra: Ra Timna, ra Alva, ra Jetet, ra Aholibama, ra Ela, ra Pinón, ra Cenaz, ra Temán, ra Mibzar, ra Magdiel, ta ra Iram. Ikan ra iꞌya kakuví nuu chiꞌin ñáyɨvɨ chi ra chiꞌin ñuꞌún nu kachiyo̱ ra nu ñuꞌún Edom. Ta suri maa ra Esaú nañí ra Edom. Ta ikan ra iꞌya kuví sutu tandɨꞌɨ ñáyɨvɨ Edom.