6 Ta cha chaꞌnu̱ ra Er, seꞌe nuu ra Judá, ta satandaꞌa̱ ra chi ra chiꞌin noo ñaꞌan cha nañí Tamar. 7 Soko ña taꞌa̱n iñi Nyoo kuꞌva iyó ra Er, yukuan chaꞌa chiꞌi̱ ra saꞌa̱ Nyoo. 8 Tyikuan ta katyí ra Judá chi ra Onán:

―Na̱keꞌen chi ñasɨꞌɨ yañun, tari kuꞌva taꞌán chi, ta koo seꞌun chiꞌin ña. Tyikuan ta kuvi koo tata ra Er, ndɨ yañun ―katyí sutu ra chi ra.

9 Chitó ra Onán vatyi tatu koo seꞌe ra chiꞌin ku Tamar, ñima seꞌe ra kua kuvi, yukuan chaꞌa taꞌan ri cha kixí ra chiꞌin ña, ndukú ra kuꞌva cha ma koo seꞌe ña, tyikuan kaa ta ma koo tata yañi ra chiꞌin ña. 10 Ta ña chitaꞌa̱n iñi Nyoo cha sakuvi̱ ra tyikuan kaa, yukuan chaꞌa chiꞌi̱ tuku ra kuan, saꞌa̱ Nyoo. 11 Tyikuan ta katyí ra Judá chi ku Tamar, chono ra:

―Kua̱nuꞌun veꞌe sutun, ta ma ndukun rayɨɨ, tyi nya kuaꞌnu ra Sela, seꞌi, ta kuvi tandaꞌa ra chuꞌun tyi vityin ni luꞌlu ra ―katyí ra Judá chi ña.

Tyikuan kaa katyi̱ ra tyi chiká iñi ra tyi koto kúvi ra Sela, tari chiꞌi̱ nduvi yañi ra.

Tyikuan ta kuanuꞌun ku Tamar kua koo ña veꞌe sutu ña.

12 Kuaꞌa kɨvɨ yaꞌa̱ ta chiꞌi̱ ñasɨꞌɨ ra Judá, ñaꞌan kuví seꞌe ra Súa. Ta cha yaꞌa̱ ndɨꞌɨ̱ cha kuiꞌya kuñí ra Judá, keꞌe̱n ra ityi ta kuaꞌan ra nya Timnat nu nyikú ra kasatyá ixi mbee sana ra, ta kuaꞌan ra Hira, ra taꞌan ra, ra ñuu Adulam, chiꞌin ra. 13 Ta sakoto̱ ñu chi ku Tamar tyi kuaꞌan ra tyiso ña nya Timnat kua satya ra ixi mbee sana ra, 14 tyikuan ta nasama̱ ña saꞌma toon cha ñiꞌno ña, cha kuenda cha chiꞌi̱ yɨɨ ña, ta chasɨ̱ ña saꞌma ndɨkɨn nuu ña, ta chikunyaa̱ ña yuꞌu ñuu Enaim, yatyin ityi cha kuaꞌan nya Timnat. Tyikuan kaa sakuvi̱ ña tyi cha chaꞌnu̱ ra Sela, ta ña satandaꞌa̱ ra Judá chi ña chiꞌin ra.

15 Ta nyeꞌe̱ ra Judá chi ña, ta chika̱ iñi ra tyi ñaꞌan kata iñi kuví ña, tyi nyasɨ́ nuu ña. 16 Ta tuꞌva̱ ra nu nyaá ña ta ña nɨkoꞌo̱n nuu ra cha chono ra kuví chi ña, ta katyí ra chi ña:

―¿Atu ma kuvi kave chiin chuꞌun? ―katyí ra chi ña.

Ta nakaꞌa̱n ña:

―Ta ¿ñáá cha kua kuꞌvon chii tatu kavon chiꞌin? ―katyí ña.

Ta katyí ra:

17 ―Kua sakichi noo ndixiꞌyu luꞌlu sane chuun ―katyí ra.

―Vaꞌa ―katyí ña―. Soko kuꞌvon ñáá cha ndaꞌún chii ta nya sakichun chi tɨ ta kunakuꞌve cha chuun ―katyí ña chi ra.

18 ―Ta ¿ñáá cha kuñun cha kuꞌve chuun? ―katyí ra.

Ta katyí ña:

―Sellun^a chiꞌin yuꞌva cha nuꞌñí ta chiꞌin tatun cha ndaꞌún ―katyí ña.

Ta chaꞌa̱ ra chi ña, ta katuvi̱ ra chiꞌin ña, ta chikoꞌo̱n seꞌe ña. 19 Yaꞌa̱ kuan ta ndɨkuita̱ ña ta kuaꞌan ña ta tava̱ ña saꞌma cha chinyasɨ̱ nuu ña ta nandɨꞌvɨ̱ noo ña inga chaꞌa saꞌma tukuiꞌya iñi cha chiꞌi̱ yɨɨ ña.

20 Yaꞌa̱ kuan ta tachi̱ ra Judá chi ra taꞌan ra, ra ñuu Adulam kuan, na kunyaka ra mbee kuan chi ña, ta na nakuꞌva ña cha chaꞌa̱ ra chi ña, soko ña nañiꞌi̱n ra kuan chi ña. 21 Ta ndaka̱ tuꞌun ra chi ra ka iyó ñuu kuan tuꞌun ña, ta katyí ra:

―¿Ta ñaꞌan kata iñi cha chinyaá yuꞌu ityi ñuu Enaim iꞌya? ―katyí ra.

Ta kanakaꞌa̱n ra kuan ta kakatyí ra:

―Yori ni noo ñaꞌan kata iñi iyó iꞌya ―kakatyí ra chi ra.

22 Tyikuan ta kuanuꞌu̱ ra ta cha nachaa̱ ra ta katyí ra chi ra Judá:

―Ña nañiꞌi̱n chi ñaꞌan kuan, ta sɨɨn ri kakatyi̱ ra ñuu kuan chii tyi yori ni noo ñu kata iñi iyó kuan ―katyí ra.

23 Ta nakaꞌa̱n ra Judá:

―Na ndoo maa ña chiꞌin tandɨꞌɨ cha chaꞌi̱ chi ña, tyikuan ta yori kuaku kueꞌe nyeꞌé chi yo, tyi yuꞌu sakuꞌi̱n mbee kuan ta ña nañiꞌu̱n chi ña ―katyí ra.

24 Cha yaꞌa̱ uñi yoo, ta chaa̱ tyiño nuu ra Judá vatyi ku Tamar, chono ra, ñoꞌón seꞌe ña, vatyi sakuvi̱ ña kuatyi chiꞌin inga rayɨɨ.

Ta katyí ra Judá:

―¡Ta̱va ndo chi ña, ta ka̱ꞌmi ndo chi ña! ―katyí ra.

25 Soko chichi cha katavá ra chi ña, sakuꞌu̱n ña tyiño chi tyiso ña, ta katyí ña chi ra: “Chitoꞌo ndaꞌa tyiño iꞌya kuví sutu cha lee cha ñoꞌón chichi. ¿Atu nɨkoꞌo̱n nuun sellu ta yuꞌva iꞌya ta tatun iꞌya?”, katyí ña sakuꞌu̱n ña tuꞌun chi ra. 26 Nɨkoꞌo̱n nuu ra Judá ndaꞌa tyiño kuan ta katyí ra: “Cha kuenda cha ña satandaꞌi̱ chi ña chiꞌin ra Sela, seꞌi. Vaꞌa ka sakuvi̱ ñaꞌan kuan ta ñima ka yuꞌu”, katyí ra. Ta ña chiyo̱ ka ra chiꞌin ña.

27 Ta kuꞌva cha kua kaku seꞌe ña, tɨnɨꞌɨ lee ñoꞌón chichi ña. 28 Kuꞌva cha kaku̱ seꞌe ña ta tava̱ noo cha lee kuan ndaꞌa kue, ta ñaꞌan cha nyeꞌé nu kakú ndotyin, keꞌe̱n ña ndaꞌa kue ta chaꞌñi̱ ña noo yuꞌva kuaꞌa, ta katyi̱ ña: “Ikan kue iꞌya kita̱ cha xiꞌna ri”, katyí ña. 29 Soko natyiꞌi̱ kue ndaꞌa kue inga chaꞌa, ta xiꞌna ka inga yañi kue kaku̱. Ta katyi ña: “¿Yoso kaa cha xiꞌna ka yoꞌo kaku̱?”, katyí ña chi kue. Yukuan chaꞌa sakunañi̱ ñu chi lee kuan Fares. 30 Yaꞌa̱ kuan ta kaku̱ cha lee cha nuꞌñí yuꞌva kuaꞌa ndaꞌa, ta sakunañi̱ ñu Zara chi kue.