Nu nakoto̱ ra José uvi taꞌan ñumaꞌna
40
1 Cha yaꞌa̱ tuꞌun kuan, ra kuví nuu chi ra kachaꞌá vinu koꞌo ra faraón, ra kuví rey Egipto, ta ra cha kuví nuu chi ra kasavaꞌá paan cha kachi rey kuan, kachaꞌa̱ ra tɨsɨꞌɨ chi chitoꞌo ra, ra kuví rey kuan. 2 Ta kuxaa̱n xaan ra faraón chi nduvi taꞌan ra kakuví nuu kuan. 3 Ta tachi̱ ra tyiño na kutyiꞌi ra chi ra veꞌe kaa cha nyaá veꞌe ra kuví nuu chi sɨndaro cha kasaꞌá kuenda veꞌe ra, suri ikan veꞌe kaa kuan kuví nu ñoꞌón ra José. 4 Ta ra kuví nuu kuan katyí ra chi ra José na saꞌa kuenda ra chi nɨnduvi taꞌan ra kuvi̱ tyiño kuan, ta kuaꞌa xaan kɨvɨ kañoꞌón ra veꞌe kaa kuan.5 Noo chakuaa kuan, nɨnduvi taꞌan ra, kanyeꞌe̱ ra ñumaꞌna, noo noo ra, sɨɨn sɨɨn ñumaꞌna kanyeꞌe̱ ra, ta sɨɨn sɨɨn cha kuñí chi katyí. 6 Cha tuví inga kɨvɨ kuan, chaꞌa̱n ra José chinyeꞌe̱ ra chi ra kakuví musu ra faraón cha kañoꞌón chiꞌin ra veꞌe kaa kuan, ta nanyeꞌe̱ ra vatyi kuiꞌya xaan kanyikú ra. 7 Ta ndaka̱ tuꞌun ra chi ra ta katyí ra chi ra:
―¿Ñáá tuꞌun cha kuiꞌya xaan kuñí ndo vityin? ―katyí ra chi ra.
8 Ta kakatyí ra kuan chi ra:
―Nduvi taꞌan ndi kanyeꞌe̱ ndi numaꞌna, ta yori maa kuví nakatyi chi ndi ñáá cha kuñí chi katyi ñumaꞌna kuan ―kakatyi ra.
Ta katyi ra José chi ra:
―Soko Nyoo, kaꞌnu kuvi ra, ta kuvi katyi ra chi yo ñáá cha kuñí chi katyí ñumaꞌna kuan. Na̱katyi ndo chii ―katyí ra.
9 Tyikuan ta kichaꞌa̱ nakatyí ra kuvi̱ nuu chi ra kachaꞌá vinu koꞌo ra faraón, ta katyí ra:
―Nyeꞌí noo yoꞌo tichaꞌa ndɨvɨ.a 10 Ta nuu yoꞌo kuan kita̱ uñi taꞌan soko, ta nyeꞌi̱ yoso kaa kita̱ ita nuu soko kuan, ta nanduvi̱ chi tichaꞌa ndɨvɨ chityí. 11 Ta nanyeꞌi̱ vatyi ndaꞌí vasu cha chiꞌí ra faraón vinu, ta toꞌi̱n tichaꞌa ndɨvɨ kuan ta chaꞌñi̱ ndutya chi chichi vasu kuan, ta chaꞌi̱ chi ra faraón ―katyí ra.
12 Ta katyí ra José chi ra:
―Tyeꞌe kaa kuñí chi katyí ñumaꞌna cha nyeꞌu̱n. Uñi taꞌan soko cha nyeꞌu̱n kuan, uñi kɨvɨ kuví kuan. 13 Chichi cha uñi kɨvɨ kutava ra faraón chuun ta kunakuꞌva ra tyiño saꞌu̱n inga chaꞌa, ta kukuꞌvon cha koꞌo ra tari nu kichi̱ chi. 14 Chikén chuun vatyi ñaꞌan naa iñun tuꞌin na kiton iꞌya, kaꞌun chiin tuꞌin chiꞌin ra faraón, na tava ra chii veꞌe kaa iꞌya. 15 Vatyi ra hebreo kuví, ta kaxiko̱ suꞌu ra chii nya ñui, ta ñaꞌri cha ña vaꞌa chinyakuvi̱, ta ñoꞌín veꞌe kaa iꞌya ―katyi ra José.
Ñumaꞌna cha nyeꞌe̱ ra kuvi̱ nuu chi ra kasavaꞌá paan
16 Ta cha chiñi̱ ra kuvi̱ nuu chi ra kasavaꞌá paan kuan vatyi ra José vaꞌa xaan chaꞌa̱ kuenda ra ñáá cha kuñí chi katyí ñumaꞌna kuan, ta kichaꞌa̱ nakatyí tuku ra kuan ñumaꞌna cha nyeꞌe̱ ra chi ra José, ta katyí ra:
―Ta ñumaꞌna cha nyeꞌi̱ kuví iꞌya: yosó uñi taꞌan tika paan kuichin xiñi. 17 Ta tika cha yosó nu sukun ka kuan, ndɨꞌɨ nuu maa paan kuenda ra faraón yɨꞌɨ́ chichi, soko kuaꞌa xaan saa kachachí tɨ paan cha ñoꞌón chichi tika kuan ―katyi ra.
18 Ta nakaꞌa̱n ra José ta katyí ra:
―Tyeꞌe kaa kuñí chi katyi ñumaꞌna cha nyeꞌu̱n, uñi taꞌan tika cha nyeꞌu̱n, uñi taꞌan kɨvɨ kuví kuan. 19 Ta chichi cha uñi kɨvɨ kukatakaa ra faraón chuun nu yutun ta kukachi saa koño ñuꞌún ―katyí ra José.
Nu chino̱ kava ñumaꞌna cha kanyeꞌe̱ ra kakuvi̱ musu ra faraón
20 Nu ku uñi kɨvɨ, ra faraón ndɨꞌɨ̱ ra kuiya, ta savaꞌa̱ ra noo viko kaꞌnu cha kuenda tandɨꞌɨ ra kasaꞌatyiñó chiꞌin ra. Ta tava̱ ra tyiño chi musu ra ta katyí ra:
―Kua tava ndo chi ra kuvi̱ nuu chi ra kachaꞌá vinu koꞌi ta chiꞌin ra kuvi̱ nuu chi ra kasavaꞌa̱ paan kuan ―katyí ra chiꞌin nuu tandɨꞌɨ ra kanyikú viko kuan.
21 Ta nakuꞌva̱ ra tyiño kuan inga chaꞌa chi ra cha chaꞌa̱ vinu koꞌo ra.