―Kua̱ꞌan ndo inga chaꞌa nya ñuu kuan ta sata ndo suꞌva ka trigu kachi yo ―katyí ra chi ra.

3 Ta nakaꞌa̱n ra Judá ta katyi̱ ra chi sutu ra:

―Soko ra nyaká ñaꞌan ñuu kuan katyi̱ vaꞌa ra chi ndi, tyi tatu ma kichi ra Benjamin chiꞌin ndi, ma kuvi nyeꞌe ndi chi ra. 4 Yukuan chaꞌa tatu kuꞌvon cha kuꞌun ra chiꞌin ndi, kuꞌun ndi inga chaꞌa kusata ndi trigu. 5 Soko tatu ma tachun chi ra chiꞌin ndi, ma kuꞌun ndi, vatyi katyí ra kuan chi ndi, tyi ma kuvi nyeꞌe ndi chi ra tatu ma kuꞌun yañi ndi chiꞌin ndi ―katyí ra Judá chi sutu ra.

6 Ta nakaꞌa̱n ra Israel ta katyi ra:

―Ta ¿ñáá tuꞌun cha sakuvi̱ xaan ndo cha ña vaꞌa chii? ¿Ñáá tuꞌun katyi̱ ndo chi ra kuan vatyi iyó inga yañi ndo? ―katyí sutu ra chi ra. 7 Ta kanakaꞌa̱n ra, ta kakatyí ra:

―Soko ra kuan nduku̱ tuꞌun xaan ra chi ndi, ta katyí ra chi ndi: “¿Atu iyó ka sutu ndo? ¿Atu iyó inga yañi ndo?”, katyi̱ ra. Ta katyí ndi chi ra: “Iyó sutu ndi ta iyó inga yañi ndi”, katyi̱ ndi. Ta nakaꞌa̱n ra ta katyi̱ ra: “Kua keꞌen ndo chi ra yañi ndo”, katyi̱ ra. ¿Atu chitó xaan nyuꞌu cha kua kakan ra kuan cha kuꞌun yañi ndi? ―kakatyí ra chi sutu ra.

8 Ta ra Judá katyí ra chi ra Israel, sutu ra:

―Ku̱ꞌva na kuꞌun ra tyivaa iꞌya chiꞌin, ta na kuꞌun ri ndi takuꞌva vatyi yoꞌo ta seꞌe yo koo nyito ka yo. 9 Sɨkɨ mai kuꞌun ñáá cha kuvi chi ra, yuꞌu kukuꞌva kuende ñáá cha kuvi chi ra. Tatu ma ndichi ra chiꞌin, ta ma kananyai chi ra nuun, na kuꞌun maa kuatyi kuan sɨki tyikuan ri maa. 10 Tyeꞌe ta ña kukuee̱ xaan ndi, cha yaꞌa̱ chaꞌa̱n ndi uvi taꞌan chaꞌa ta nandichi̱ ndi ―katyí ra chi sutu ra.

11 Ta katyí sutu ra chi ra:

―Ñaꞌri ka kuꞌva sakuvi yo. Kua̱ꞌan ndo. Ke̱ꞌen ndo suꞌva cha vaꞌa ka cha iyó nu ñuꞌún iꞌya, kɨꞌɨ ndaꞌa ndo kuꞌun suꞌva bálsamo, suꞌva tyañuñu, suꞌva ndutya vixi chaꞌán, suꞌva mirra, nuez ta limendra, tyi̱ꞌi ndo nuu tɨndaa ndo ta kuꞌva ndo chi ra kuví nuu kuan. 12 Ta kɨꞌɨ ndaꞌa ndo xuꞌun cha kusata ndo trigu, ta kɨꞌɨ ndaꞌa tuku ndo xuꞌun cha nañiꞌi̱n ndo chichi tɨndaa ndo kɨvɨ kuan, ñaꞌri yɨɨ ña saꞌa̱ ra kuenda. 13 Ta ke̱ꞌen ndo chi yañi ndo ta kuaꞌan ndo kua nyeꞌe ndo chi ra kuan. 14 Ta Nyoo, ra iyó tandɨꞌɨ tunyee iñi chi, na kuꞌva ra cha vaꞌa iñi ra kuan nyeꞌe ra chi ndo, ta kuꞌva ra ndichi yañun, ra Simeón, ta ra Benjamin. Ta yuꞌu tatu taꞌan chi cha ndoi cha yori ka seꞌi, ndoo mai vaꞌa ―katyí ra Israel chi seꞌe ra.

15 Ta kuaꞌan koyo ra ta kakeꞌe̱n ra cha suꞌva ka xuꞌun kuaꞌan chiꞌin ra, ta cha mañi cha kua kuꞌva maa ra chi ra kuví tyiño ñuu kuan, ta kuaꞌan ra Benjamin chiꞌin ra nya ñuu Egipto. Ta chaa̱ koyo ra nuu ra José. 16 Kuꞌva cha nanyeꞌe̱ ra José chi ra Benjamin vatyi vachí ra chiꞌin ra, ta katyí ra chi ra cha saꞌá kuenda veꞌe ra:

―Kua̱ꞌan kua nyaka chi tandɨꞌɨ ra iꞌya nya veꞌi, ta kaꞌñi ndo noo sɨndɨkɨ, ta sanduvaꞌa ndo chi tɨ, vatyi kakusama ra chiꞌin ora ―katyí ra chi musu ra.

17 Ta tyikuan kaa sakuvi̱ musu ra José, ta keꞌe̱n ra chi tandɨꞌɨ ra ta chinyaka̱ ra chi ra nya veꞌe ra José. 18 Ta kanayuꞌvi̱ xaan ra, kuꞌva cha chaa̱ koyo ra veꞌe ra José, ta kakatyí ra chi yañi ra:

―Cha katyi xuꞌun cha nakuꞌva̱ ra chi yo chichi tɨndaa yo kɨvɨ kichi̱ yo cha xiꞌna ri, cha katyi kuan vachí nyaka ra chi yo iꞌya, ta kua tyaa ra kuatyi chi yo, ta kua kuvi yo musu ra ta kusakuvi yo tyiño nuu ra chiꞌin tandɨꞌɨ kɨtɨ sana yo ―kakatyí ra.

19 Ta katuꞌva̱ ra nu nyaá ra saꞌá kuenda veꞌe ra José vatyi kakaꞌan ra chiꞌin ra.

20 Ta kakatyí ra:

―Ta kichi̱ nuu ndi kichi̱ sata̱ ndi trigu ñuu iꞌya, yoꞌo tata, 21 ta cha kuanuꞌun ndi, kuꞌva cha chaa̱ ndi nu kua kusu ndi, ta nuña̱ ndi yuꞌu tɨndaa ndi, ta nanyeꞌe̱ ndi vatyi yɨꞌɨ́ tandɨꞌɨ xuꞌun noo noo ndi chichi noo noo tɨndaa kuan, ta xuꞌun kuan vachí nanyaká ndi. 22 Tyi ña chitó ndi yóó cha natyiꞌi̱ xuꞌun kuan nuu tɨndaa ndi, ta nyisó sɨɨn ndi xuꞌun cha kuenda cha kua sata ka ndi trigu ―kakatyí ra chi musu kuan.

23 Ta katyí musu kuan chi ra:

―Ma kaka iñi ndo, ta ma nayuꞌvi ndo. Vasɨ maa Nyoo ndo, ta Nyoo sutu ndo, tyiꞌi̱ xuꞌun kuan chichi tɨndaa ndo, tyi yuꞌu nakiꞌi̱n xuꞌun cha sata̱ ndo trigu kuan ―katyí ra.

Ta chaꞌa̱n musu kuan chitava̱ ra chi ra Simeón, ta chinyaka̱ ra chi ra nu nyikú yañi ra. 24 Ndɨꞌɨ kuan ta chinyaka̱ ra chi ra veꞌe ra José. Ta chaꞌa̱ ra ndutya kakoꞌo ra ta nakatya ra chaꞌa ra, ta chaꞌa̱ ra cha kachi burru sana ra. 25 Ta kuꞌva cha kachitó ra vatyi kuchaa ra José cha ora kuan vatyi kakusama ra chiꞌin ra, ta katava̱ ra tandɨꞌɨ cha kua kuꞌva maa ra chi ra.

26 Ta kuꞌva cha nachaa̱ ra José veꞌe ra, ta chaꞌa̱ yañi ra tandɨꞌɨ maa cha kanyisó ra, cha kua kuꞌva maa ra chi ra, ta kanakaꞌnu̱ chɨtɨ ra nuu ra. Ta nyakua nya nu ñuꞌún kachaku̱n ra xiñi ra. 27 Ta ndaka̱ tuꞌun ra José chi ra, ta katyí ra:

―¿Atu iyó vaꞌa ndo? ¿Yoso kaa iyó ra cha vaꞌa sutu ndo, ra cha kaꞌa̱n ndo tuꞌun chiꞌin? ¿Atu nyitó ka ra? ―katyí ra José.

28 Ta kakatyí ra chi ra:

—Nyito ka ra, ta vaꞌa kuñí musun, ra kuví sutu ndi ―kakatyí ra chi ra José, ta kanakaꞌnu̱ chɨtɨ tandɨꞌɨ ra nuu ra, vatyi kasaꞌa̱ ra ñáyɨvɨ chi ra.

29 Ta nanyeꞌe̱ ra José chi ra Benjamin yañi ra, seꞌe sɨꞌɨ ra, ta katyí ra:

―¿Atu ikan ra iꞌya kuví yañi luꞌlu ndo cha kaꞌán ndo tuꞌun chiꞌin? ―katyí ra.

Ta kakatyí ra chi ra:

―Ikan ra iꞌya kuví ra ―kakatyí ra chi ra.

Ta katyí ra chi ra luꞌlu kuan:

―¡Nyoo nanyeꞌe ndaꞌvi ra chuun, seꞌi! ―katyí ra chi ra.

30 Sɨɨ xaan kuñí ra nanyeꞌe̱ ra chi yañi ra, ta cha sɨɨ kuñí ra kichaꞌa̱ kuñí ra kuaku chaa ra, ta numi ri kɨꞌvɨ̱ ra chichi veꞌe nu kixi ra ta kichaꞌa̱ chakú chaa ra. 31 Ta ndɨꞌɨ chaku̱ chaa ra, ta nakatya̱ ra nuu ra ta kita̱ ra ta katyí ra chi musu ra: “Tyi̱ꞌi ndo cha kachi ndi”, katyí ra.

32 Ta maa ri maa ra José chikunyaa̱ noo mesa kuan, ta tandɨꞌɨ yañi ra chikunyiku̱ ra inga mesa. Ta ra ñuu Egipto cha kua kakachi chiꞌin ra chikunyiku̱ ra inga mesa, vatyi ra Egipto ña kuví kakachi ra ɨɨn ri chiꞌin ra kakuví hebreo, vatyi kuñí maa ra vatyi ña vaꞌa. 33 Ra kakuví yañi ra José kachikunyiku̱ ra noo nu mesa ityi nuu ra José. Ta ra José katyí ra chi ra na kunyiku ra yukun yukun ri yoso kuꞌva kuiya ra, ra cha ñiꞌin ka ta ra luꞌlu ka. Ta iyo xaan kakuñí yañi ra, ta kananyeꞌe̱ nuu taꞌan ra. 34 Keꞌe̱n ra José nyayu cha tayukú nu mesa maa ra ta chaꞌa̱ ra kakachi yañi ra, ta kuaꞌa ka chaꞌa̱ ra chi ra Benjamin cha nuu tandɨꞌɨ ka yañi ra. Kachachi̱ ra ta kachiꞌi̱ ra ta kakusɨɨ̱ xaan kakuñi̱ ra chiꞌin ra José.