―Sa̱kutu noo noo tɨndaa ra iꞌya chiꞌin trigu, yoso kuꞌva cha kakuví kakuiso ra, ta tyiꞌun xuꞌun cha kasata̱ ra trigu yuꞌu tɨndaa noo noo ra. 2 Yaꞌa kuan, ta keꞌun copa xuꞌun kuichin cha kuví copa mai ta tyiꞌun chichi tɨndaa ra cha tyivaa ka kuan, ta tyiꞌi tuku xuꞌun cha sata̱ ra trigu ―katyí ra José chi musu ra.

Ta tyikuan kaa sakuvi̱ musu kuan, tari kuꞌva katyí ra José.

3 Cha kundichi inga kɨvɨ kuan, ta kuaꞌan koyo yañi ra José chiꞌin burru sana ra. 4 Ña kañi xaan kachika̱ ra cha kita̱ koyo ra yuꞌu ñuu kuan, ta katyí ra José chi musu ra:

―Ndɨ̱kuita ta kua̱ꞌan chata ra kuan, ta kuꞌva cha nataꞌun chi ra, ta katyun chi ra: “¿Ñáá tuꞌun cha sakuvi ndo cha ña vaꞌa chiꞌin ndi, vatyi nyuꞌu sakuví ndi cha vaꞌa chiꞌin ndo? ¿Ñáá tuꞌun cha suꞌu̱ ndo copa xuꞌun kuichin chitoꞌi? 5 Copa cha chiꞌí ra chiꞌin kuví, ta suri chiꞌin copa kuan tuꞌvá ra nakotó. ¡Ña vaꞌa maa cha sakuvi̱ ndo!”, katyun chi ra ―katyí ra chi musu kuan.

6 Ta kuaꞌan musu kuan, ta kuꞌva cha nataꞌa̱n ra chi ra nu kuaꞌan koyo ra, ta nakatyí ra chi ra suri maa tuꞌun cha katyi̱ ra José chi ra. 7 Ta kakatyí yañi ra José chi ra:

―¿Ñáá tuꞌun cha katyí chitoꞌun tyikuan kaa? ¡Ma kaña iñi ndi suꞌu ndi cha chii ra! 8 ¿Ñáá tuꞌun suꞌu ndi xuꞌun kuaan o xuꞌun kuichin veꞌe chitoꞌun? Ñima ñáyɨvɨ suꞌu kuví ndi, tyi kɨvɨ kichi̱ nuu ndi kichi̱ sata̱ ndi trigu, ta xuꞌun cha nañiꞌi̱n ndi chichi tɨndaa ndi, vachí chiꞌin ndi kɨvɨ kita̱ ndi nya Canaán, ta nakuꞌva̱ kuenda ndi chuun. 9 Tatu nañiꞌun copa kuan chichi tɨndaa nya noo ndi, kuví kaꞌñi ndo chi ra nyisó copa kuan, ta tandɨꞌɨ ndi kua nanduvi ndi musu ndo ―katyí ra.

10 Ta katyí ra kuan:

―Vaꞌa, na kuvi tari kuꞌva katyi̱ ndo, soko noo tuꞌun ri ra cha nyisó copa kuan kua kuvi ra musi, ta tandɨꞌɨ ka ndo kuvi kunuꞌun ndo ―katyí ra chi yañi ra José.

11 Ta numi ri kichaꞌa̱ kasanoó ra tɨndaa kuan nu ñuꞌún, ta taꞌan taꞌan ra kichaꞌa̱ ndachí ra yuꞌu tɨndaa ra. 12 Kichaꞌa̱ nandukú ra chichi tɨndaa ra cha chaꞌnu ka kuan, ta nyakua nya chichi tɨndaa ra cha tyivaa ka, ta nañiꞌi̱n ra copa kuan chichi tɨndaa ra Benjamin. 13 Tyikuan ta kachaꞌnya̱ ra saꞌma ra cha kuiꞌya kakuñi ra ta noo noo ra kasanandaa̱ ra tɨndaa ra xiin burru kuan ta kuanuꞌun koyo ra nyaá ñuu kuan inga chaꞌa. 14 Ta nyaá ka ra José veꞌe ra kuꞌva cha chaa̱ ra Judá chiꞌin yañi ra, ta kachikuɨñɨ̱ chɨtɨ ra nyakua nya taꞌan tyaan ra nu ñuꞌún. 15 Ta katyí ra José chi ra:

―¿Ñáá tuꞌun cha sakuvi̱ ndo tyikuan kaa? ¿Atu ña chitó ndo tyi kuví yuꞌu noo ra nakotó? ―katyí ra José.

16 Ta nakaꞌa̱n ra Judá kuan ta katyí ra chi ra:

―Ña ñiꞌín ka ndi tuꞌun kaꞌan ndi chuꞌun. Ma kuvi ka savaꞌa ndi chi ndi nuun. Nyoo chito̱ ra tyi iyó kuatyi ndi, na kuvi maa ndi musun chiꞌin ra cha nañiꞌi̱n ndo copa chichi tɨndaa iꞌya. 17 Ta nakaꞌa̱n ra José ta katyí ra:

―Ma kuvi cha tandɨꞌɨ ndo ndoo, noo tuꞌun ri maa ra cha suꞌu̱ copa yuꞌu, ikan ra kukuvi musi, ta tandɨꞌɨ ka ndo kuvi kunuꞌun ndo nu nyaá sutu ndo chiꞌin cha taxi ri ta chiꞌin cha vaꞌa ―katyí ra.

18 Soko tuꞌva̱ ra Judá chi ra José ta katyí ra chi ra:

―Tata, chikén tumañi iñi chuun, na tyasoꞌun noo tuꞌun cha kua katyi yuꞌu ra kuví musu chuun, ta ma kuxaun chiꞌin musun vatyi yoꞌo tari cha vatyi ra faraón kuvún. 19 Kɨvɨ kuan ndaka̱ tuꞌun chi ndi tatu iyó ka sutu ndi, tatu iyó inga yañi ndi. 20 Ta nyuꞌu katyí ndi chuun tyi iyó ka sutu ndi, soko cha chaꞌnu xaan ra, ta iyó inga yañi ndi ra luꞌlu ka, ta cha chaꞌnu sutu ndi ta kaku̱ ra kuan, ta yaꞌa̱ xaan cha kuñí ra chi ra. Uvi taꞌan ri maa ra cha ɨɨn ri sɨꞌɨ ra, ta yañi ra cha chiꞌi̱ ra, ta noo tuꞌun ka maa ra luꞌlu iꞌya ndoo̱. 21 Ta katyu̱n chi ndi na kichi nyaka ndi chi ra tyi kuñún koꞌon nuun chi ra. 22 Soko nyuꞌu katyi̱ ndi chuun tyi ña kuvi sandoo ra chi sutu ra, tyi tatu kanyaꞌa ra xiin sutu ra, kúvi sutu ra. 23 Ta katyu̱n chi ndi tatu ma kichi ra tyivaa yañi ndi chiꞌin ndi ma kichi ka ndi tyi ma nyeꞌe ka ndi nuun, katyu̱n.

24 ”Ta nachaa̱ ndi nu iyó sutu ndi, ta kanakatyi̱ ndi chi ra tuꞌun cha katyu̱n chi ndi. 25 Ta katyí sutu ndi chi ndi: “Kua̱ꞌan ndo kua sata ndo suꞌva ka trigu kachi yo”, katyi̱ ra. 26 Ta katyí nyuꞌu chi ra:

―Ma kuvi kuꞌun ndi, tatu ma kuꞌun ra yañi ndi chiꞌin ndi, ma kuvi nyeꞌe ndi chi ra kuan”, katyi̱ ndi chi sutu ndi. 27 Ta katyí sutu ndi chi ndi: “Nyoꞌo chitó ndo tyi uvi taꞌan seꞌe ñasɨꞌi chiyo̱. 28 Noo ra yori ka ra, ndaꞌa kuaꞌan ra, ta chiká iñi vatyi kɨtɨ kuꞌu chachi̱ tɨ chi ra. Ta nya vityin ta ña nyeꞌé ke chi ra. 29 Tatu keꞌén ndɨꞌɨ ndo chi ra luꞌlu iꞌya, kuꞌun ra chiꞌin ndo, tatu ñáá cha kuvi chi ra, cha katyi ndo, ta kukúvi ndɨꞌi chiꞌin tɨkuiꞌya iñi”, katyí ra chi ndi.

30-31 ”Yukuan chaꞌa tatu yuꞌu ta kunuꞌi nu iyó suti ta yori yañi kunuꞌun chiꞌin, kuꞌva cha nanyeꞌe suti tyi yori ra yañi na chaa chiꞌin ndi, ta tyikuan kaa kuꞌun sɨkɨ ndi tatu kúvi sutu chaꞌnu ndi cha kuiꞌya iñi ra. 32 Kɨvɨ cha vachí, katyi̱ yuꞌu chi suti: “Sɨki nyaá cha saꞌakuendé chi ra, vatyi kua ndichi maa ra luꞌlu iꞌya chiꞌin ndi. Tatu ma ndichi ra chiꞌin ndi, kua kuvi noo ra iyó kuatyi nuu yoꞌo nyakua nya kúvi”, katyi̱ yuꞌu chi suti. 33 Yukuan chaꞌa chakú ndaꞌvi nuun, na kunuꞌun ra luꞌlu iꞌya chiꞌin yañi ra, ta na ndoo mai kuvi musun tyiño nuu ra. 34 Ma kuvi nachai nu iyó suti, tatu ra luꞌlu iꞌya ta ma kunuꞌun ra chiꞌin. Ña kuñí nyeꞌi cha ña vaꞌa kutaꞌan chi chi suti ―katyí ra Judá chi ra José.