Nu kuaꞌan ra Jacob nya Egipto
46
1 Kita̱ ra Israela chiꞌin tandɨꞌɨ maa ndaꞌa tyiño ra. Ta chaa̱ ra nya Beerseba, ta chaꞌa̱ kuenda ra noo cha chaꞌa̱ ra nuu Nyoo, Nyoo cha sakaꞌnu̱ ra Isaac, sutu ra. 2 Ta chakuaa kuan kaꞌa̱n Nyoo chiꞌin ra chichi ñumaꞌna ta katyí ra:―Jacob, Jacob ―katyí ra.
Ta nakaꞌán ra ta katyí ra:
―Maa yuꞌu iꞌya, Sutu mañi yuꞌu ―katyí ra.
3 Ta katyí Nyoo chi ra:
―Yuꞌu kuví Nyoo, Nyoo sutun. Ma yuꞌvun cha kuꞌun nya Egipto, vatyi yukuan kua sakuvi noo ñuu kaꞌnu chiꞌin ñáyɨvɨ taton. 4 Ma yuꞌvun cha kuꞌun nya Egipto, tyi suri mai kutava chi ñáyɨvɨ taton ñuu kuan. Ta kua kunyaa ra José chuꞌun kɨvɨ kúvun ―katyí Nyoo chi ra.
5 Yukuan ta kita̱ ra Jacob nya Beerseba chiꞌin ñáyɨvɨ chi ra. Seꞌe ra kasandaa̱ ra chi ra nu carreta cha sakichi̱ ra faraón, kasandaa̱ tuku ra chi ra kuatyaa seꞌe ra ta chiꞌin ñasɨꞌɨ ra, ta kuaꞌan koyo tandɨꞌɨ ñu nya Egipto. 6 Tandɨꞌɨ ndaꞌa tyiño ra, ta tandɨꞌɨ kɨtɨ sana ra, tandɨꞌɨ maa cha ñiꞌi̱n ra nya Canaán kuaꞌan chiꞌin ra nya Egipto. 7 Seꞌe ra ta seꞌe ñañi ra ta tandɨꞌɨ ñáyɨvɨ vachí tata ra kuaꞌan koyo ñu nya Egipto.
Sɨvɨ ñáyɨvɨ Israel cha kuaꞌan Egipto
8 Tandɨꞌɨ seꞌe ra Israel chiꞌin tandɨꞌɨ seꞌe ñañi ra chaa̱ koyo ra Egipto. Ta ikan ra iꞌya kakuví ra:
Ra Rubén ra kuví seꞌe nuu ra Jacob. 9 Ta ra kakuví seꞌe ra Rubén kuví ra ra Hanoc, ra Falú, ra Hezrón ta ra Carmi.
10 Ta ra Simeón chiꞌin ra kakuví seꞌe ra: ra Jemuel, ra Jamín, ra Ohad, ra Jaquín, ra Zohar, ta ra Saúl ra kuví seꞌe ra chiꞌin noo ñaꞌan Canaán.
11 Ta ra Leví chiꞌin ra kakuví seꞌe ra: ra Gersón, ra Coat ta ra Merari.
12 Ta seꞌe ra Judá ikan kakuví ra iꞌya: ra Er, ra Onán, ra Sela, ra Fares ta ra Zara. Ta ra Er chiꞌin ra Onán kachiꞌi̱ ra nya ñuꞌún Canaán. Soko seꞌe ra Fares: ra Hezrón ta ra Hamul, chaa̱ koyo chiꞌin ra Judá, ra Fares, ra Sela ta ra Zara.
13 Ta ra Isacar chiꞌin ra kakuví seꞌe ra: ra Tola, ra Fúa, ra Job ta ra Simrón.
14 Ta ra Zabulón chiꞌin ra kakuví seꞌe ra: ra Sered, ra Elón ta ra Jahleel.
15 Ta ikan ra iꞌya kakuví seꞌe ku Lea chiꞌin ra Jacob, tandɨꞌɨ ra kaku̱ nya Padan-aram, ta ku Dina ñandɨꞌɨ. Ta tandɨꞌɨ tata ñu kuví oko uchi uñi taꞌan ñáyɨvɨ.
16 Ta chaa̱ tuku ra Gad chiꞌin ra kakuví seꞌe ra: ra Zifión, ra Hagui, ra Ezbón, ra Suni, ra Eri, ra Arodi, ta ra Areli. 17 Ta chaa̱ tuku ra Aser chiꞌin ra kakuví seꞌe ra: ra Imna, ra Isúa, ra Isúi, ra Beria, ta ku Sera ñaꞌan kuꞌva ra. Ta seꞌe ra Beria: ra Heber ta ra Malquiel chaa̱ koyo tuku ra. 18 Ikan ra iꞌya kakuví seꞌe ku Zilpa, ñaꞌan cha chaꞌa̱ ra Labán na kuvi ña musu ku Lea, seꞌe ra; ta seꞌe ra Jacob chiꞌin ku Zilpa kakuví ra iꞌya. Ta chaꞌun ɨɨn taꞌan ñu kuví tandɨꞌɨ tata ñu.
19 Ta ra kakuví seꞌe ku Raquel ñasɨꞌɨ ra Jacob ikan kuví ra iꞌya: ra José ta ra Benjamin. 20 Ta chikóo seꞌe ra José nya ñuu Egipto chiꞌin ku Asenat, seꞌe ra Potifera, ra kuví sutu ñuu On, ta ikan ra iꞌya kakuví ra: ra Manasés ta ra Efraín. 21 Ta seꞌe ra Benjamin kuvi chi ra Bela, ra Bequer, ra Asbel, ra Gera, ra Naamán, ra Ehi, ra Ros, ra Mupim, ra Hupim, ta ra Ard. 22 Ta ikan ra iꞌya kakuvi̱ tata ku Raquel chiꞌin ra Jacob, uchi kumi taꞌan kuví ra.
23 Ta ra Dan chiꞌin seꞌe ra: ra Husim.
24 Ta ra Neftalí chiꞌin ra kakuví seꞌe ra: ra Jahzeel, ra Guni, ra Jezer ta ra Silem. 25 Ta ikan ra iꞌya kakuví seꞌe ra Jacob chiꞌin ku Bilha, ñaꞌan cha kuví musu ku Raquel cha chaꞌa̱ ra Labán, sutu ña, chi ña chi ra Jacob. Nduvi ra kuan chiꞌin seꞌe ra kakuvi̱ tata ra Jacob chiꞌin ku Bilha, ucha taꞌan kuví ñu.
26 Ta tandɨꞌɨ ñáyɨvɨ chi ra Jacob cha chaa̱ koyo chiꞌin ra nya Egipto, kuví uñi xiko iñu taꞌan ñu, ta ña nakaꞌvi ñu chi ñu ñasɨꞌɨ seꞌe ra. 27 Ta seꞌe ra José cha kaku̱ Egipto kuan kuví uvi taꞌan ra. Ta tandɨꞌɨ ñáyɨvɨ veꞌe ra Jacob cha chaa̱ koyo Egipto kuan kita̱ uñi xiko uchi taꞌan ra.
28 Ta kumañi ka cha chaa ra Jacob nya Gosén, ta sakuꞌu̱n ra chi ra Judá cha kukana chi ra José, na kuꞌun ra kunyeꞌe ra chi sutu ra nya Gosén. Ta cha nɨɨ ri ka cha kuaꞌan ra Judá, ta chaa̱ ra Jacob chiꞌin ñáyɨvɨ chi ra ñuꞌún Gosén. 29 Ta ra José sanduvaꞌa̱ ra carreta ra ta kuaꞌan ra nya Gosén, kua sataꞌan ra chi sutu ra, ra Israel. Ta kuꞌva cha nanyeꞌé ra chi ra, nanumi̱ ra chi ra ta chaku̱ chaa ra, naꞌan xaan chaku̱ chaa ra. 30 Tyikuan ta katyí ra Israel chi ra José:
―Na kúvi mai vityin, soko cha nyeꞌí chuun, chité tyi iyó kon ―katyí ra.
31 Ta katyí ra José chi tandɨꞌɨ yañi ra ta chi ñáyɨvɨ chi ra kuenda sutu ra:
―Kuaꞌin kua sakote chi ra faraón tyi cha chaa̱ ndo. Ta kua katyi chi ra tyeꞌe kaa: “Suti ta tandɨꞌɨ ñáyɨvɨ chi ra cha chiyo̱ nya Canaán cha chaa̱ ñu ñuu iꞌya nu iyé. 32 Ta ra kasaꞌá kuenda mbee ta sandɨkɨ kakuví ra. Tandɨꞌɨ kɨtɨ sana ra ta ndaꞌa tyiño ra vachí chiꞌin ra.” 33 Tyikuan kaa kua katyi chi ra faraón, ta tatu kana ra faraón chi ndo ta ndaka tuꞌun ra ñáá tyiño saꞌá ndo, 34 ka̱tyi ndo chi ra tyi ra sakuñá mbee kuví ndo, ta ikan kuan tyiño saꞌá ndo, yoso vachí iyó ndo tari kuꞌva chiyo̱ sutu chaꞌnu yo. Tyikuan ta kuvi koo ndo Gosén iꞌya, tyi ña taꞌán iñi ra Egipto cha koo ra saꞌakuendá mbee ñuu ra ―katyi ra José chi yañi ra.