Nu nasoko̱ ra Jacob chi ra Efraín chiꞌin ra Manasés, seꞌe ra José
48
1 Yaꞌa̱ suꞌva kɨvɨ ta kakatyí ñu chi ra José tyi kuꞌví sutu ra. Ta keꞌe̱n ra chi nɨnduvi seꞌe ra, ra Manasés ta ra Efraín ta kuaꞌan ra kua nyeꞌe ra chi sutu ra. 2 Cha chitó ra Jacob tyi chaa̱ ra José, seꞌe ra, vachí nyeꞌe ra chi ra, ta sañiꞌín ra iñi ra ta nɨkunyaa̱ ra yuꞌu chito nu kixí ra. 3 Ta kaꞌa̱n ra chiꞌin ra José, ta katyí ra:―Ta cha naꞌa nya ñuu Luz, ñuꞌún Canaán, yukuan kita̱ Nyoo nui, Nyoo ra iyó tandɨꞌɨ tunyee iñi chi, ta nasoko̱ ra chii. 4 Ta katyi̱ ra chii: “Nye̱ꞌe xiꞌna Israel, kuaꞌa xaan ñáyɨvɨ taton kua sakoi, ta kuaꞌa xaan ñuu kua kuvi ñu, ta kua kuꞌve ñuꞌún Canaán iꞌya chi ñu ta kua kuvi chi chii ñu tyikuan ri maa”, katyi̱ Nyoo chii kɨvɨ kuan. 5 Ta vityin nɨnduvi seꞌun, ra Efraín ta ra Manasés, ra cha kakaku̱ cha nɨɨ ri ka cha kumañi ka chai Egipto iꞌya, tari cha seꞌi kakuví chi ra, tari kuví ra Rubén ta ra Simeón. 6 Seꞌun cha kua koo ityi nuu ka, ikan ra kuan kua kuvi seꞌe maun, ta kukañiꞌin ra ñuꞌún nu kua ñiꞌin ra Efraín ta ra Manasés. 7 Kɨvɨ kite̱ Padan-aram ta kuaꞌin Canaán, ityi kuaꞌan ndi ta chiꞌi̱ ku Raquel sɨꞌun, chiꞌi̱ ña cha nɨɨ ri ka cha kumañi chaa ndi ñuu Efrata ta suri maa yukuan tyiꞌi̱ chi ña chichi ñuꞌún nu kuví Belén vityin ―katyí ra Israel chi ra José.
8 Ta nanyeꞌe̱ ra Israel nu kanyikú seꞌe ra José ta katyí ra:
―¿Yóó ra kakuví ra iꞌya? ―katyí ra.
9 Ta nakaꞌan ra José ta katyí ra:
―Seꞌi, cha chaꞌa̱ Nyoo chii ñuu iꞌya, kakuví ra ―katyí ra José chi sutu ra.
Tyikuan ta katyí sutu ra chi ra:
―Sa̱tuꞌva chi ra nu nyaí, tyi kua nasoke chi ra ―katyí sutu ra chi ra.
10 Ta ña ndichin ka nyeꞌé ra Israel vatyi cha chaꞌnu xaan ra. Yukuan chaꞌa satuꞌva̱ ra José chi ra kuatyaa kuan nu nyaá sutu ra. Ta sutu ra chiꞌí ra xɨtɨn ndotyin ta numi ra chi ndotyin. 11 Ta katyí ra chi ra José:
―Ña chika̱ iñi vatyi nyeꞌé ke chuun, soko chaꞌa̱ Nyoo cha nyeꞌé ke chuun ta nyakua nya seꞌun nyeꞌí ―katyí ra.
12 Ta sakuachiyo̱ ra José nduvi seꞌe ra nu sɨꞌɨn sutu ra, ta chaku̱n ra tyaan ra nya nu ñuꞌún. 13 Ta keꞌe̱n ra chi nɨnduvi seꞌe ra, ta satuꞌva̱ ra chi ndotyin chi sutu ra. Satuꞌva̱ ra chi ra Efraín chiyo satyin sutu ra, ta satuꞌva̱ ra chi ra Manasés chiyo vaꞌa sutu ra. 14 Tyikuan ta sanakaa̱ ra Israel ndaꞌa chiyo vaꞌa ra ta tyiso̱ ra xiñi ra Efraín, ra luꞌlu ka, ta tyiso̱ ra ndaꞌa chiyo satyin ra xiñi ra Manasés, vasɨ ikan ra kuví ra cha ñiꞌin ka. 15 Tyikuan ta nasoko̱ ra chi ra José chiꞌin tuꞌun iꞌya:
“Maa Nyoo, ra saꞌá kuenda chii,
nya kɨvɨ kaki̱ ta nyakua nya vityin,
Nyoo cha tyaa̱ yaꞌvi ra Abraham, chii, ta ra Isaac, suti,
16 ra cha kuví Ángel cha sakakú chii nuu tandɨꞌɨ cha ña vaꞌa cha kuvi̱ chii,
ikan ra na nasoko chi ra kuatyi iꞌya.
Ta cha kuenda ra iꞌya kua nɨkoꞌon iñi ñáyɨvɨ sɨvi,
ta sɨvɨ ra Abraham, chii, ta sɨvɨ ra Isaac, suti.
Ta na koo kuaꞌa seꞌe ra,
ta kuaꞌa xaan ñáyɨvɨ kua kuvi tata ra nu ñuꞌún ñayɨvɨ̱”, katyí ra Israel.
17 Nyeꞌe̱ ra José tyi ndaꞌa chiyo vaꞌa sutu ra yosó xiñi ra Efraín, ta ña taꞌa̱n iñi ra; tyikuan ta keꞌe̱n ra ndaꞌa chiyo vaꞌa sutu ra ta natyiso̱ ra xiñi ra Manasés. 18 Ta katyí ra José chi sutu ra:
―Ña vaꞌa yosó ndaꞌun xiñi ra kua tyaa iꞌya, ra iꞌya kuví seꞌe nui, tyi̱so ndaꞌa chiyo vaꞌun xiñi ra ―katyí ra.
19 Ta ña kichaꞌa sutu ra ta katyí ra:
―Cha chité seꞌe luꞌli, cha chité. Suri kuchaa tuku ra iꞌya kuvi ra noo ñuu ta suri kaꞌnu kukuvi ra, soko yañi ra, ra cha luꞌlu ka, kaꞌnu ka kukuvi ra ikan saꞌa ra iꞌya, ta kuaꞌa xaan ñuu naꞌnu kukita chiꞌin tata ra ―katyí ra Israel.
20 Ta nasoko̱ ra chi ra kɨvɨ kuan ta katyí ra:
―Ñáyɨvɨ Israel ta kukotyiño ñu sɨvɨ ndo ta kukatyi ñu tyeꞌe kaa: “Na sakuvi Nyoo chuꞌun, tari sakuvi̱ ra chiꞌin ra Efraín ta chiꞌin ra Manasés”, kua katyí ñu.