Nu katyi̱ ra Jacob yoso kaa kua kuvi chi seꞌe ra nu kuaꞌan chi ityi nuu
49
1 Ta kana̱ ra Jacob chi tandɨꞌɨ seꞌe ra ta katyí ra: “Tuꞌva ndo ta kua katyi chi ndo yoso kaa kua kuvi chi ndo ityi nu kuaꞌan ka chi.2 ”Tu̱ꞌva ndo ta kuɨ̱ñɨ nyoꞌo cha kuví ndo seꞌe yuꞌu ra Israel, sutu ndo.
Tyaa̱ vaꞌa ndo soꞌo ndo cha kua katyi chi ndo.
3 ”Yoꞌo, Rubén, seꞌe nui kuví chuun,
ta kaku̱n tyembu cha iyó xaan fuerza chii,
ta seꞌe nuu tunyee iñi koño ñuꞌín kuví chuun.
Ikon kuví ra xiꞌna ka saꞌa ñáyɨvɨ chi ta ikon kuvi ra xiꞌna ka cha iyó tunyee iñi chi.
4 Soko ma kuvi kuvun ra xiꞌna ka,
vatyi kuvún tari yuvi ndutya cha yori kuvi kasɨ chi,
vatyi ña saꞌu̱n ñáyɨvɨ nu kixí sutun,
ta ndau̱n nu chite ta chiyo̱n chiꞌin ku Bilha, ñaꞌan cha kumí vaꞌi tari ñasɨꞌi.
5 ”Ta yoꞌo, Simeón, ta yoꞌo, Leví, ɨɨn ri yañi ndo,
ta cha xaan cha nyisó ndo kuví cha sañukueꞌé xaan chi ñáyɨvɨ.
6 Añime ña kuñí chi kutaꞌan chi chiꞌin ndo,
chiꞌin cha tyaá ndo kuꞌva sakuvi ndo.
Ta nɨ ña kuñí chi nduɨɨn ri chi chiꞌin ndo,
vatyi chaꞌñi̱ xaan ndo chi ñáyɨvɨ.
Ta cha sɨɨ ri iñi ndo sañikueꞌe̱ ndo chaꞌa sɨndɨkɨ sana ñu.
7 Kaꞌnu cha ña vaꞌa kuví cha xaan ndo
vatyi yaꞌa xaan nduxaan ndo.
Yukuan kuenda kua kutya kuatyi chi ndo nɨkakaꞌnu ñuꞌún Israel.
8 ”Ta yoꞌo, Judá, kua sakaꞌnu ra yañun chuun;
ta kua kɨꞌɨ ndaꞌun sukun ra xaan iñi nyeꞌé chuun,
ta tandɨꞌɨ ra yañun kua kuɨñɨ chɨtɨ ra nuun.
9 Yoꞌo, Judá, seꞌe luꞌli,
kuvún tari noo seꞌe ndɨkaꞌa,
cha yaꞌa chachi̱ tɨ kɨtɨ cha chaꞌñi̱ tɨ,
ta chikava̱ taxin tɨ, tari chikava̱ ndɨkaꞌa chaꞌnu,
ta yori kañá iñi sanakanda chi tɨ.
10 Yori kuvi tinyaa tatun ndaꞌá ra Judá,
ta yori kuvi kasɨ nu kuvi ra, ra nyaka ñaꞌan,
nya chaa ra kuvi Rey cha ndicha.
Ta tandɨꞌɨ maa ñuu ta kusakuvi ñu cha katyí ra.
11 Ta kuaꞌa xaan yoꞌo tichaꞌa ndɨvɨ vaꞌa kukoo chuun,
ta nyakua kuvi kuꞌñun burru sanon chichi yoꞌo tichaꞌa ndɨvɨ kuan,
vatyi ma yuꞌvun vasɨ ni maa kachi tɨ chi chi.
Ta nyakua kua nakatyon saꞌmon chiꞌin ndixi tichaꞌa ndɨvɨ kuan.
12 Ta yaꞌa xaan cha kuaꞌa toon chɨtɨ nuun ta ñima ka ndutya vixi tichaꞌa ndɨvɨ;
ta yaꞌa̱ ka kuichin noꞌun ta ñima ka sɨkuɨ.
13 ”Ta yoꞌo, Zabulón, kukoun yuꞌu tyañuꞌun,
nu kuaꞌa tundoo chaá.
Ta nyakua nya ñuu Sidón kua kuvi xaꞌñi ñuꞌún.
14 ”Ta yoꞌo, Isacar, kuvún tari noo burru ndachan
cha chikavá tɨ nyitatú tɨ nu iyó cha kachi tɨ.
15 Ta nyeꞌé tɨ vatyi vaꞌa xaan ñuꞌún kuan,
ta vaꞌa kaá ñuꞌún kuan nu nyitatú tɨ,
ta sanoo̱ tɨ soko tɨ ta keꞌe̱n tɨ ndaꞌa tyiño kuan nyisó tɨ.
Tari burru kuan kua kuvun noo musu cha saꞌatyiñó ñiꞌin.
16 ”Ta yoꞌo, Dan, kua kunyaka ñaꞌun ñáyɨvɨ veꞌun,
tari kukunyaka ñaꞌan inga ra yañun ñáyɨvɨ veꞌe ra.
17 Kua kuvun tari koo cha katuví yuꞌu ityi,
tyi koo chachiyɨꞌɨ́ tɨ sɨyɨ caballua,
ta sanakavá tɨ chi ra yosó chi caballu kuan”, katyí ra Jacob.
18 Ta katyí ra Jacob chi Nyoo:
“¡Sutu Mañi yuꞌu!, nyatí cha sakakún chii”, katyí ra.
19 Ta kaꞌán ka ra chiꞌin seꞌe ra ta katyí ra:
”Ta yoꞌo, Gad, kuaꞌa xaan sɨndaro kua kañi taꞌan ra chuꞌun,
soko nu ndɨꞌɨ tuꞌun, maun kukunyaa ndaꞌun chi ra.
20 ”Ta yoꞌo Aser, kuaꞌa xaan cha kachi yo kukoo veꞌun,
maa ri maa cha asɨn kua kachun veꞌun,
ta maa ri maa cha tuꞌvá rey chachí kua kuꞌvon kachi ñáyɨvɨ.
21 ”Ta yoꞌo Neftalí, kuvún tari noo isu cha ña nuꞌñí,
ta chinó tɨ tandɨꞌɨ ri ityi,
ta tyakɨ xaan seꞌe tɨ iyó.
22 ”Ta yoꞌo, José, kuvún tari noo yutun cha kuaꞌa chɨtɨ chaꞌa, yutun nanyaá yuꞌu yuvi ndutya
ta kuaꞌa xaan chɨtɨ chaꞌá tun,
ta nyakua ndaá soko tun chata nyaka yuu.
23 Ñáyɨvɨ xaan iñi nyeꞌé chuun chaꞌá ñu tɨsɨꞌɨ chuun ta tuchí ñu chuun chiꞌin nduva,
cha kuenda tyi ña kuvi nyeꞌe ñu chuun.
24 Soko ndachan xaan sukun ndaꞌun, yoꞌo José,
ta yɨꞌɨ́ ndaꞌa vaꞌun nduva cha kuenda cha iyó fuerza chuun.
¡Tyaꞌvi Nyoo chi Nyoo ra iyó tunyee iñi chi,
ra yɨꞌɨ́ ndaꞌa chi ñáyɨvɨ Israel,
ta saꞌá kuenda ra chi ñu!
25 ¡Tyaꞌvi nyoo chi Nyoo, ra sakaꞌnú yuꞌu ra kuví sutun,
Nyoo ra iyó tandɨꞌɨ tunyee iñi chi, maa ra kua nasoko chuun!
¡Ta na kuꞌva ra cha vaꞌa cha iyó ityi andɨvɨ chuun!
¡Ta na kuꞌva ra cha vaꞌa cha iyó ityi yuvi tyañuꞌun chuun!
¡Ta na nasoko ra chuun na koo kuaꞌa taton nu kuaꞌan chi ityi nuu!
26 Yaꞌa̱ xaan ka cha kuaꞌa nasoké chuun,
ta ñima ka cha nasoko̱ suti chii,
ma ndɨꞌɨ cha vaꞌa chaꞌí chuun tari ma ndɨꞌɨ yuku naꞌnu cha ma ndɨꞌɨ maa,
vatyi Nyoo kuví ra cha nakachí chuun cha nuu tandɨꞌɨ ka yañun.
27 ”Ta yoꞌo, Benjamin, kuvún tari noo ina yuku cha xaan vavaꞌa,
ta cha ñaꞌan ri chachí tɨ kɨtɨ cha tɨɨ̱n tɨ,
ta cha cha iñi chaꞌa̱ tɨ cha ndoo̱ ka nakachi̱ inga taꞌan tɨ”, katyí ra Jacob chi noo noo seꞌe ra.
28 Ikan ra iꞌya kakuví ndɨ uchi uvi taꞌan seꞌe ra Israel, ta ikan iꞌya kuví tuꞌun kaꞌa̱n sutu ra chiꞌin ra, nu nasokó ra chi noo noo ra yoso kuꞌva kataꞌan chi chi ra.
Nu chiꞌi̱ ra Jacob
29-30 Ta noo kɨvɨ kuan, katyí ra Jacob chi tandɨꞌɨ seꞌe ra: “Yuꞌu kukúvi ta kunduɨɨn ri chiꞌin ñáyɨvɨ ñui, ku̱chi ndo chii nu ñoꞌón ñáyɨvɨ chii chichi yavi yuu cha nyaá nu ñuꞌún ra Efrón, ñáyɨvɨ Het, chichi yavi yuu nyaá Macpela ityi nu kañá ñanyii Mamre nu ñuꞌún Canaán, nu xiko̱ ra Efrón yavi yuu chiꞌin ñuꞌún chi ra Abraham, vatyi kakɨꞌvɨ ñáyɨvɨ chi ra tatu chiꞌi̱ ñu. 31 Yukuan kɨꞌvɨ̱ ra Abraham chiꞌin ñasɨꞌɨ ra, ku Sara, ta ra Isaac, suti, chiꞌin ku Rebeca, sɨꞌi. Suri yukuan tyiꞌi̱ tiki chi ku Lea chichi ñuꞌún. 32 Ñáyɨvɨ Het xiko̱ ñuꞌún kuan ta yavi yuu kuan chi ra Abraham, chii”, katyí ra Jacob chi seꞌe ra.
33 Ta cha ndɨꞌɨ chaꞌa̱ ra Jacob tuꞌun iꞌya chi tandɨꞌɨ seꞌe ra, ta naxita̱ ra chaꞌa ra, ta chikava̱ ra nu chito ra, ta chiꞌi̱ ra.