Pekakae merapi peampungi hai pekampai
Nani petoiana Daudi
25
1 Irio Pue, kuhuhu katuwongku.2 Pue Ala au kupenombai, Oiomi au kupoinalai;
inee wongkoia rapakaea,
hai ineena raele-ele iwalingku.
3 Ope-ope tauna au mepoinalai Irio barahe ina maea,
agaiana tauna au meewa Irio ina rapakaeahe.
4 O Pue, tudungiana hinangka raraMu,
pakanotoana apa au hangangaa kubabehi.
5 Nupaturona hai Nuninina i rara au manoto,
lawi Oiomi Pue Ala au mohoremana;
mepongka madondo hawe kaindi, batenami Oio au kuharunga.
6 O Pue, katuinao hinangka roaMu hai ahiMu,
au Nupatongawami hangkoia hawe ide-ide.
7 O Pue, hinangka dosangku hai salangku i tempoku mani mangura
ineemi Nukakatuinao,
agaiana Nukatuinaona moula kamaahiMu hai kamaroaMu.
8 Pue maroa hai manoto,
idomi hai Ia motudungia rara manoto i tauna au puha.
9 Pue monini tauna au mengkaiwoi
hai napaturohe moula tunggaiaNa.
10 Hinangka rarana Pue iami ahi hai kanoto.
Rara iti Napatongawa i tauna
au mokingki dandiNa hai parentaNa au Natotowimi.
11 O Pue, anti hangaMu au malelaha Nuampungina,
lawi mahile mpuu salangku.
12 Hema pea au langa i Pue,
iriami Pue ina motudungia rara au hangangaa napolumaongi.
13 Tauna iti ina molambi roa ngkatuwo,
hai tampona ina rapososora pemuleana.
14 Pue mampohimada tauna au langa Iria,
hai pototowiaNa Napopaingaa mbulihe.
15 Petotokingku batena pea i Pue,
lawi hea ngkapari nabolehimi hangko i bitingku.
16 Nuhailena hai Nupokaahina,
lawi tuwo sadudua peana hai maparina.
17 Nungaahi kamasusana lalungku,
hai Nukabahana hangko i kamaparingku.
18 Nupetiro pantodihangku hai kamaparingku,
hai Nuampungi hinangka dosangku.
19 Peita, bosa mpuuhe iwalingku,
hai rumihi karakahihingku.
20 Kuperapi Nukampaina hai Nukabahana,
datina maea, lawi Irio peana meonga.
21 Kuperapi roa hai noto mokampaina,
lawi meharungana Irio.
22 O Pue, horemahe to Isaraeli
hangko i hinangka parinda.