Pekampaina Pue Ala
Hangko i Daudi
27
1 Pue iami hulongku hai Topehoremangku,bara ara au kupokalanga.
Pue iami rohongku.
I hema manina langa?
2 I karabungkaku tauna kadake au ina mopapatena,
ihirari au tehube alanda manawo.
3 Nauri ratolibuna surodado,
barana langa.
Nauri membutumi pombeala moewana,
batengku pea meharunga i Pue.
4 Hampaka pea au kuperapi i Pue,
itimi au kupeinao;
bona maidana i souna Pue
i hungkana katuwongku;
bona mampeminana kamasukuna Pue
hai kupokatana liliu.
5 Lawi Nakampaina i bambaruNa
i lalu kamaparingku;
Nawunina i souNa,
hai Naantina i wowo bulu watu.
6 Ide-ide iwalingku au motolibuna
kunangimohe.
Anti kamatanana lalungku, mohuhumona popenombaku i bambaruNa,
hai monanina motoia Pue.
7 O Pue, pehadingi peraroangku Irio,
Nupokaahina hai Nuhanaina!
8 O Pue, Nuuliangaana node, “HaokiNa hai menombako Iriko.”
Mewali, kuhaoki mpuumoKo.
9 Inee wongkoia Nupentabungia,
hai ineeKo moae tuduaMu ide i lalu karumpuMu.
Oiomi Topetulungingku,
ineena Nutende hai Nupalehi,
O Pue Ala, Topehoremangku.
10 Nauri rapalehina umangku hai inangku,
agaiana Pue au mokadipurana.
11 O Pue, tudungiana raraMu,
hai Nuninina i rara au manoto,
lawi bosahe iwalingku.
12 Ineena Nuhuhu i tunggaianda iwalingku,
lawi rapobungkaa peamona i podongkonda
hai rapopara peamona rapapate.
13 Kupoinalai mpuu kaina moitangku kamaroana Pue
i lalu katuwongku i dunia ide.
14 Nipegiami Pue,
pakaroho hai nipamoleogu lalumi,
nipegia liliumide Pue.