Pue, labangku
Hangko i Daudi
28
1 O Pue, Topeperuruingku, meraroana Irio,ineena Nupengkamuntua,
lawi ane mandii-ndiiKo,
nodona tauna au raulu i lalu talumba.
2 Pehadingi pengkadedengku
merapi tulungi Irio,
hai mopatubalana taiengku
i paidaaMu au malelaha.
3 Ineena Nuhuku hihimbela hai tauna au kadake,
ba tauna au motengko lalunda.
Pololitanda maroa hai maalusu i hangka ranganda,
agaiana kadake lalunda.
4 Nuhukuhe moula babehianda,
hai moula poantinda au kadake,
hukuhe hibali hai babehianda
hurungihe hintoto hai apa au rababehi.
5 Lawi barahe moholoi au nababehi Pue
hai barahe mohaile hinangka au Napopewali;
ido hai ina Napakanawohe;
hai barapohe Napopearo.
6 Tetoiami Pue, lawi Napehadingimi
pamperapiku.
7 Pue iami rohongku hai labangku;
Iria peana meharunga.
Natulungimona, ido hai matanami lalungku
pane kuoremi wamba petoia Iria.
8 Pue iami rohonda taunaNa,
hai pengkatuwoa tauna au Natawimi.
9 O Pue, horemahe taunaMu,
hai Nuwatihe au mewalimohe kiraMu.
Nukampaihe hai Nukambihe i hae-haena.