Kamakuasana Pue tongawa i angi mata
Nani petoiana Daudi
29
1 Hinangka au maida i suruga, nitoiami Pue.Iria pea kameawa hai karoho.
2 Toiami hangana Pue au meawa,
menombako Iria i lalu kamalelahaNa.
3 Pue Ala au makuasa
mowotu nodo gumpata i wongko tahi,
wotuNa mehana-hana i wongko tahi au maemba.
4 Wotuna Pue buke karoho
wotuna Pue buke peawa.
5 Wotuna Pue motepo kau himburu;
Pue, modungka kau himburu i Libanon.
6 Ia mampopelumpa-lumpa bulu i Libanon nodo ana japi,
hai bulu Sirion mesende-sende nodo ana bante.
7 Wotuna Pue nodo pehangke kila.
8 Wotuna Pue mampopoenggo pada wungi,
Pue mampopodua-dua pada wungi Kadesi.
9 Wotuna Pue mampopoana ngkangura lagiwa lundara au kalaea,
hai mopamaoru tawengkau i pandulu,
hai i lalu souna Pue, taunaNa mololitahe masisimbuku, rauli, “Toiami Pue!”
10 Pue makuasa i owai au melaboa,
Pue makuasa mewali Datu i hae-haena.
11 Taperapi i Pue bona mowei karoho i taunaNahe.
Taperapi bona Pue mowati taunaNa hai Naweihe roa ngkatuwo.