Nani katana lalu lawi tehorema
30
1 Idemi nanina Daudi au raponani i potawi Souna Pue Ala.
2 O Pue, kutoiaKo
lawi Nuhoremamona,
hai iwalingku barahe Nupogiangaa mogee-geekina.
3 Pue Ala au kupenombai, merapi tulungina Irio,
hai Nupakaohamona.
4 O Pue, Nuhoremamona hangko i kapate hai Nupatuwomona
hangko i olonda tauna au rauluhe i kalolu talumba.
5 Ikamu au matundukau i Pue, niponanimi nani petoia;
hai nipahawemi kamatanana lalumi i Pue au malelaha.
6 Lawi karumpuNa hampalai pea,
agaiana kamaroana laluNa bara mokahopoa;
nauri moteriana hambengia,
agaiana pewangkana sowea moanti katana-tana.
7 I lalu kamatanangku mololitana node,
“Ina maroho liliuna hawe i hae-haena!”
8 O Pue, anti kamaroana laluMu iriko,
Nupopaidamona i wowo bulu au maroho;
agaiana ane Nupentabungiana, langamona.
9 Irio Pue, meraroana;
i Pue au kupenombai merapi tulungina.
10 “Apa mani bunduna Irio Pue,
ane matemona hai ratawumona?
Peisa mani pae tomate motoiaKo
hai mobambari kamaroana laluMu?
11 Pehadingi Pue, pokaahi wongkoia,
Pue, Nutulungi wongkoia!”
12 Poteriangku Nubalikimi mewali pengele-ngele;a
Nuweiha kamaparingku hai Nuweina katana lalu.
13 Mewali tanoanangku motoiaKo
hai nani katana lalu,
hai barana mengkaroo motoiaKo.
O Pue Ala au kupenombai,
mamponanina katana lalu Irio hawe i hae-haena.