Pekampaina Pue
31
1 Idemi nanina Daudi au napahawe i tadulako toponani.
2 O, Pue meongana Irio,
ineena Nupogiangaa molambi ea.
Nuhoremana anti notoMu.
3 Nupehadingina hai holigana Nukabaha.
Nukampaina nodoKo bulu watu;
Nuperuruina nodo bente au maroho.
4 Lawi Oiomi pentabungiangku hai pengkatuwoangku.
Nuninina hai Nupoteteana moula dandiMu.
5 Nukabahana hangko i tilobu
au rababehiana tauna,
lawi Oiomi pempaisareangku.
6 O Pue Ala au madudu, i lalu taieMu kupaisare katuwongku;
Oiomi au mohoremana.
7 Tauna au menomba i anitu Nukahihihe,
agaiana iko mepoinalaina i Pue.
8 Ina mopahawena kamatanangku anti kamaahiMu au bara mokahopoa,
lawi Nuitami pantodihangku
hai Nuisami kamasusangku.
9 Hai barana Nuhuhu i iwalingku,
agaiana Nupopeangkana i paidaa au maemba.
10 Pokaahina O Pue, lawi maparina; anti poteriangku, mapoimi matangku,
maparimi pehadingku hai meahi-ahimi katuwongku.
11 Mapari mpuu katuwongku lawi narumpa liliuna kapari,
hai hungkaku tuwo, kapari pea au kupohidupaa.
Rohongku makurami anti kamaparingku,
hai ope-ope buungku maledemi.
12 Raele-elemona ope-ope iwalingku
nodo wori hihintonggiku.
Ane raitana tauna au kukaisanga
tingkarahe hai melangkahe hangko iriko.
13 Matantamona hangko i pekirinda,
nodomona tauna au mate ba anu-anu au mapihe.
14 Lawi mombekakanenimohe tauna bosa kuhadi;
iumba-umba pea kaaraangku rapopalangana,
hintuwumohe mampoiwalina
hai motunggaihe mopapatena.
15 Agaiana iko, meharunga peana Irio Pue,
kuuli, “Oiomi Pue Ala au kupenombai!”
16 Tampana katuwongku ara i lalu taieMu; peruruina
hangko i ope-ope iwalingku hai ope-ope tauna au mowulaina.
17 Pue, kuperapi bona lenggeMu mosimbaki hawiMu ide;
Horemana i lalu ahiMu au bara mokahopoa.
18 O Pue, inee wongkoia Nupogiangaa maea,
lawi meraroana Irio.
Palikangaamohe ope-ope tauna au kadake rapakaea
hai mendauluhe i paidaa tomate.
19 Sisingi humenda topodongko
hai tomampemahile,
au mokakabosaihe tauna au manoto.
20 Melumbu mpuu pewatiMu
au Nupasilolongaahe tauna au matundu Irio.
Maroa laluMu i tauna au meharunga Irio
i lindonda manusia.
21 Nuwunihe i lalu pekampaiMu
hangko i tunggaianda tauna kadake,
hai Nukampaihe i lalu kamarohoMu
hangko i perainda iwalinda.
22 Tetoiami Pue, lawi maahi laluNa iriko.
Natudungiana kamakuasaNa au mewulii
i tempoku ratolibu hai rabungka.
23 I lalu kawulingku kupehangu
tetendemona hangko i pekamataMu.
Agaiana katouana Nupehadingimi peraroangku
merapi tulungi Irio.
24 Nipokaahimi Pue, ikamu au Napokaahimokau!
Pue mokampai tauna au mengkoru Iria,
agaiana ope-ope tauna au mampemahile,
mantimi mpuu kaNahukunda.
25 Ikamu au meharunga i Pue,
nipakaroho liliu lalumi!