Kamatanana tauna au teampungi dosana
Nani pepaturona Daudi
32
1 Morasimi tauna au raampungimi babehiana au kadake,hai dosana ragewomi.
2 Morasimi tauna
au bara Napeita Pue dosana
hai au bara meakalangi.
3 Ane bara manina mopangaku salangku, malede mpuu watangku
lawi hahangaloana meraroa.
4 Maroa kaindi ba mabaa, taieMu morimbikina,
opemi rohongku
nodo owai au nahihipi kamapanana alo.
5 O Pue, kupangaku dosangku Irio
hai salangku bara kuwuniangi,
kuuli, “Irio Pue mopangakuna ope-ope kamasalangku,”
hai Nuampungimi babehiangku au kadake.
6 Idomi hai ope-ope tauna au manoto lalunda hangangaa mekakaehe Irio,
liaMu mani peisa rapohidupaa,
datihe narumpa kapari au ina merampe.
7 Oiomi pentabungiangku
i lalu kamaparingku, Oiomi au mokampaina,
Nutolelikina alana tehoremana hai monanina i lalu katana.
8 Nauli Pue, “Ina Kupakanotoako
rara au hangangaa nupolumaongi.
Ina Kupaturoko
hai Kukamatako.”
9 Ineeko nodo dara au bara ara pekirina.
Anti kamailana, rakoloroi hai rahamai
Ane bara, batena mopalehi ampuna.
10 Ngkaia kapari au ratodiha tauna au kadake babehianda,
agaiana tauna au mepoinalaihe i Pue,
Nakampaihe hai ahiNa.
11 Ee ope-opekau tauna au manoto lalumi,
matana-tanamokau i lalu hangana Pue,
hai ikamu au bula lalumi, monani-nanimokau i lalu katana-tana.