Nani petoia i Pue Ala au rapenombai to Isaraeli
33
1 Ikamu au manoto katuwomi, nioremi wamba petoia i Pue,lawi tauna au bula lalunda, hintoto mpuuhe motoia Pue.
2 Tapahawe kamatananta i Pue hai kecapi;
tatoia Pue hai gambusu.
3 Tapahawe nani au wou Iria,
takawimi kecapi maroa-roa; hai monanike matana-tana.
4 Lawi Ngkorana Pue tou,
hai Ia peisa rapoinalai i paka-pakana au Nababehi.
5 Ia mampokatana kamaroa hai kanoto.
Huma dunia buke hai ahiNa.
6 Mongkora pea Pue, mewalimi langi;
hai lolitaNa pea, tebabehimi alo, wula hai betue.
7 Hinangka owai tahi, Napateruhu i hambua paidaa;
Ia mamboli tahi maemba i lalu patompo.
8 Palikangaamohe ope-ope tauna
au maida i dunia mengkoru i Pue hai menombahe Iria.
9 Lawi mongkora pea, hinangkana mewali,
hai parentaNa pea, mampopengaa ara.
10 Pue mohomboki tunggainda humalele tauna,
hai tangara lalunda tina-tina Napamatanta.
11 Agaiana tunggaiana Pue bara tebali i hae-haena,
hai tangaraNa bara ina mokahopoa.
12 Morasimi humalele tauna au mopangaku Pue,
iami Pue Ala au rapenombai.
Morasimi tina au Napilei mewali taunaNa.
13 Pue mepetiro hangko i suruga,
hai mokamata ope-ope tauna.
14 Hangko i sou kadatuaNa,
Pue mampetiro ope-ope tauna
au maida i dunia.
15 Iami au moteru lalunda ope-ope tauna
hai au moisa hinangka babehianda.
16 Hadua datu bara ina tehorema anti kamakuasana;
hadua tadulako pombeala bara ina menangi anti kamarohona.
17 Dara bara moanti penangi,
nauri maroho hai malingkati
batena bara nabuku mehorema.
18 Tou mpuu, Pue au mokampai tauna au mengkoru Iria,
hai au meharungahe i kamaahiNa.
19 Pue mokabahahe hangko i kapate,
hai Nakadipura katuwonda i tempo rimi.
20 Meharunga peake i Pue,
Iami topetulungi hai labanta.
21 Anti kaIana, lalunta matana,
lawi tapoinalai hangaNa au malelaha.
22 Kiperapi Pue, Nupokaahi liliungkai,
lawi meharungamongkai Irio.