Pepalindo i kasusa
77
1 Idemi nanina Asaf au napahawe i tadulako toponani, to Yedutun.
2 Merararoana i Pue Ala
meraroa liliuna Iria, hai Napehadingina.
3 I paringku mohaokina Pue;
hahambengia mopatubalana taiengku Iria, hai barana mawowe,
agaiana lalungku bara mau rapalindo.
4 Ane mokatuinaona Pue Ala, meraroana;
ane mampepekirina, maledemi buungku.
5 Pue Ala barana mopaleta kaindi;
wiorana, ido hai bara kubuku mololita.
6 Kubuhuinao alo-alo au hangkoia;
pare au liu-liumi kukatuinao.
7 Ane kaindi, kupepekiri
hai mekune-kune liliuna i lalungku.
8 “I hae-haenami pae Pue Ala meae?
Barapi pae maahi laluNa?
9 Opemi pae ahiNa au bara mokahopoa irikami?
Hopomi pae dandiNa au monono irikami?
10 Naliumi pae inaona Pue Ala ahi laluNa meampungi?
Ba Nahombokimi ahi laluNa anti karumpuNa?”
11 Mewali kuuli, “Idemi au mopamahai lalungku:
Tebalimi laluna Pue Ala, barapi metulungi.”
12 O Pue, ina kukakatuinao hinangka bagoMu.
Io, ina kubuhuinao liliu ope-ope tanda kuasa
au Nubabehi hangkoia.
13 Ina mokakabelaina hinangka bagoMu,
hai mampepekirina ope-ope tanda kuasa au Nubabehi.
14 O Pue Ala, ope-ope raraMu malelaha;
hema pae au himbela kuasana hai Oio, Pue Ala au kipenombai?
15 Oiomi Pue Ala au mobabehi hinangka au mewulii;
Nupatongawami kuasaMu i humalele tauna.
16 Hai kamarohoMu, Nuhoremahe taunaMu,
pemuleana Yako hai Yusupu.
17 O Pue Ala, owai moimbora moitaKo,
owai moimbora moitaKo, hai mewali langa,
tahi maemba mobabalumbahe wulunga.
18 Gawu mampopendaulu uda, gumpata moperere,
kila mombehangke-hangke nodo mata pana
au rapanaka nodehou node mai.
19 Gumuru gumpata mehana-hana,
kila mewangka mopamabaa dunia,
tampo moringki hai moenggo.
20 MolumaoKo i tumu balumba,
mamporaraiKo tahi maemba,
agaiana inalaiMu bara raita.
21 Nuninimohe taunaMu
nodo dimba hambanguna
au raporewu Musa hai Haruni.